Rọ ata inu, kakpọ udun̄
11
Gwook inorie kwun̄ wele me inyọn̄ isi mun̄,owuwa usen isiraka, owu môyaka imun̄.
2 Che usini nyi ene jaaba, iin̄, nyi so ene jeeta,
mije, òkariọọn̄ ùrioon̄ mônube me linyọn̄.
3 Ibot isijot emen oduku inyọn̄,
îra irep igwook me ijọn̄.
Akpat ere uti orọn̄be ilaak ke uti okilaak ibia,
mè ìre ìrọn̄ inyi agan̄ osiki, mè ìyaka ire agan̄ inyọn̄.
4 Ogwu òkup ikikpọ efet ibe inyọn̄ ijaan̄,
ene ya ìkpowop uko;
ogwu òkikpọ oduku inyọn̄
iboriọọn̄ mè ìre ibot môrep,
sabum ọmọ ònowop mfut, ene ya ìkporọkọ uko.
5 Ike owu òkariọọn̄ oniin̄ efet okiwut ije,
mè ìre ike gwun̄ okitibi me emen owot ogwu uga,
ikeya si, owu òkpokọt iriọọn̄ ubọk ikwaan̄ Awaji,
ogwu òrorom otutuuk inu geelek.
6 Wop mfut kwun̄ me ewelegwe,
mè katele si iwowop me ikakwun̄,
mije, òkariọọn̄ eyi òbotibi,
mè môre eyi, mè môre eyilọ,
mè ìre iba cha mêgbaan̄ itibi ijaan̄.
Riọọn̄ Awaji kwun̄ mgbọ orebe nsabọn irieen̄
7 Utoon̄ îtop,
ura îjaan̄ isasa chieen̄ ikimun̄.
8 Owuwa otu ifuk acha geelek ene olukbe ugwem,
ene ya ikibele ejit otutuuk mgbọ ya.
Ire, ikawuuk ibe ke usen udun òkinu,
ke usen kecha ìbowawa.
Inu geelek òkinu me isi ìre inu ikike.
9 Owu ogwu nsabọn irieen̄,
bele ejit ibe ke owu ìre nsabọn irieen̄,
mè tele ibe unwọọn̄ ikup me ejit kwun̄
mgbọ orebe nsabọn irieen̄.
Rọ inu echi ejit kwun̄ otọbe,
mè echi chieen̄ kwun̄ omun̄be.
Ire, riọọn̄ ibe, me lek otutuuk inu chi,
ke Awaji môsibi owu oyerebet me ibot.
10 Eya orọ, san̄a ufieejit me ejit kwun̄,
mè san̄a si ufialek eyi anam akpalek kwun̄ san̄a,
mije, mgbọ nsabọn irieen̄ mè mgbọ ijeek ikakana isọọn̄,
otutuuk cha ìre inu ikike.