12
Keek Òrom kwun̄me mgbọ orebe nsabọn irieen̄,
me mgbọ usen ufialek cha ìkanunu,
sabum acha cha ònonu, mgbọ owu môkibe,
“Kpunu utop geege me lek inu geege,”
2 sabum ura mè utoon̄ mè onyan̄
mè ebi kè ntoronyan̄ edun owu me chieen̄,
mè oduku inyọn̄ ògwu okom ònu
mgbọ ibot môrepbe ifieek;
3 mgbọ ebi ìkibem uwu mêkiran,
mgbọ ebi unye mênwunbe ekpuk me udun̄;
mgbọ ebi ìkọk akpa kpebeyaka ikọk,
mije, ema kpeyaka iwa;
mgbọ chieen̄ ebi ìkitaak chieen̄ itibi nruruk môdunbe;
4 mgbọ otunchit ekije isibi lek oniin̄ môchitbe,
mgbọ ida ewuuk ikọk-akpa ìkpoyakabe inye;
mgbọ ida ofut môkitimi ene, mije, kpeyaka ikọt ilaak;
mgbọ utọn̄ ìkpoyaka ikọt inọ ida okwa ofut;
5 mgbọ ene okitet ukpook ere òbebene;
mgbọ lek oniin̄ môkupbe unan unan ijeje ije;
mgbọ uti alimọn isigwook ajakajak;
mgbọ akaka isikidut lek kan̄ ije;
mgbọ inu geege ìkayaka ìlọk ene,
mije, ogwu ebilene mônikwu
ifo ere ìbokup ire mgbọ geelek.
6 Keek Òrom kwun̄
sabum mêfieekbe olik alata okuket,
mè ibum ngigọ alata araran̄;
sabum ugọn̄ môkpukpukube me otu udọn̄ mun̄,
mgbọ ekpirikpo itaba-mun̄
môfan̄abe me otu udọn̄ mun̄;
7 mgbọ ya, mfuun̄ mônenigwu ikom ifo ijọn̄ ere înan̄abe,
mè ekwukwu ògwu okom ofo
lek Awaji ogwu ònyinyi ọmọ.
8 “Inu ikike ògak inu ikike!”
Kubọk Ogwu Etip otumube,
“Otutuuk ìre inu ikike!”
Ikakana ikọ igwook
9 Bak me lek Ogwu Etip oriọọn̄be inu, îjeen̄ ebi ene iriọọn̄-inu. Ọmọ îriọọn̄ ubọk igen ibot, mè iwọlọ owuwa urọk isibi, mè isun̄ me onineen̄. 10 Ogwu Etip îsa lek igobo utop utop usem òjeje itat. Inu îgebe ìre inu òtatat mè ire atikọ.
11 Ikọ ebi ìriọọn̄ inu ìbet lek uti òsọọk otu ekisa irọ anam ije inin̄ agan̄ eweekbe. Urọk chi ema etitiin̄be ìbet lek omimin egonbe ikam me lek uti ya, isa ikichichiin̄ anam cha lek. Ogwu òkpukpo arọọn̄ ge onyi ikọ cha. 12 Ofifi kan̄, gwun̄ n̄a, ilọ me lek inu kechi, gbagbala chieen̄. Igege owuwa ikpa, ìkakaan̄ okputut. Ogbogbo ikwekween̄ inu ìkiwọwọ ene lek.
13 Owu ora inọ otutuuk inu ire okputut.
Ikakana igwook kan̄ ìre ikeyi:
Tet ukpook me lek Awaji, mè sun̄ ikan kan̄,
mije, eyiyi ore otutuuk ikwaan̄
òkukup inyi ogwu ebilene.
14 Awaji môsibi oyerebet me lek inu geelek ene orọbe,
ire lek echi òlelet,
mè ìre atata, mè ìre ijo ijo.