Ogwu ima
3
Me inyọn̄ mkpilaak n̄a me eririeen̄,mweek ogwu ejit n̄a omabe;
mweek ọmọ, ǹkakọt ìmun̄ lek kan̄.
2 Mânan̄a ikeke ije ikana ama,
ikana me lek oniin̄ mè oyet ile,
iweek ogwu ejit n̄a omabe ya.
Mweek igak, ǹkamun̄ lek kan̄.
3 Ebi ìkibem ama mîchichini emi
mgbọ ema ekije ikana ikpọ ama.
Nnenibe ema,
“Ìre enyi mîmun̄ ogwu ejit n̄a omabe ya?”
4 Ǹkakwakwala ukot ìraka ema,
mmumun̄ ogwu ejit n̄a omabe ya.
Nkakana ọmọ itet, ǹkachieek ibe ije,
mege nsabe ọmọ initap me uwu nga n̄a,
me emen agwut ogwu òbeben emi me owot.
5 Enyi nsabọn ibaan̄ Jeruselem, ntap mbuban inyi enyi,
kè lek òsô, kè lek ogaan̄ òkup me oron:
Ikariki, ikatitimi si imumechieen̄,
mege ire mgbọ îkembe me lek kan̄.
6 Ekene ire eyi òkinan̄a me emen èwê inu,
mè ikicho ntọn̄ ibumu ifo inyọn̄ kubọk oduku,
mè ikidun̄u utop olu mâa mè farankinsens me lek,
echi ònan̄a me lek inu utop olu ogwu ewe okinyam?
7 Kpọ, îre uji ijọn̄ kè Solomọn òbet lek mkpilaak;
akọp ebi unye gweregwen ekisa ọmọ ije,
ema ìre usini me etete ebi unye me Ijeren.
8 Otutuuk kiban̄ mîriọọn̄ chieen̄ oge akọn̄,
mè iriọọn̄ ukot akọn̄;
ogwu ikup, îkwaan̄ oge akọn̄ kan̄ me agba ebon,
mè ibem lek ikikpọ inu ukpook òkirọ me eririeen̄.
9 Ogwu ubọọn̄ Solomọn înama uji ijọn̄
òbet lek mkpilaak inyi lek kan̄,
ìsa uti ònan̄a me Lebanọn inama.
10 Esa alata okuket irọ atà kan̄,
mè isa alata araran̄ irọ inyọn̄ mè akpalek mè irak kan̄.
Esa ekwut irio irio igbaka ere ikweek irek;
nsabọn ibaan̄ Jeruselem esasa me imumechieen̄
igbaka otutuuk emen kan̄.
11 Nsabọn ibaan̄ Sayọn, ìnan̄a ìsibi,
ìnikpọ ogwu ubọọn̄ Solomọn okwuun̄be okpibot ubọọn̄,
okpibot ubọọn̄ nga kan̄ okwuun̄be ọmọ
me usen ido-nwa kan̄,
usen ejit kan̄ obelebe.