Ogwu emabe
2
Emi ìre ajakajak rôs eyi Sarọn,mè ajakajak lili emen iteke.
Ogwu ima
2 Ogwu mmabe ìkup me etete nsabọn ibaan̄
kubọk ajakajak lili òkup me etete ukpak.
Ogwu emabe
3 Ogwu ima n̄a ìkup me etete nsabọn irieen̄
kubọk uti apulu òkup me etete uti oron.
Mma isisiki ikweek ikwek lek me irak kan̄,
mfut kan̄ ìkitotop emi me otu.
4 Ọmọ îsa emi isi uwu inwọ miin̄,
egop kan̄ îsabe ikwek emi ibot ìre imumechieen̄.
5 Ìnyi emi nchicha nchat gerep ǹtaka ǹsa ǹkaan̄ unye,
mè inyi emi mfut uti apulu ǹtaka ǹsa ǹtet efuuk,
mije, imumechieen̄ îtet emi kubọk orukan̄.
6 Ubọk agan̄ ujit kan̄ me irak ibot n̄a,
ubọk agan̄ ulom kan̄ îkat emi ikaan̄.
7 Enyi nsabọn ibaan̄ Jeruselem, ntap mbuban inyi enyi,
kè lek òsô, kè lek ogaan̄ òkup me oron:
Ikariki, ikatitimi si imumechieen̄,
mege ire mgbọ îkembe me lek kan̄.
Ogwu ima
8 Ida ogwu ima n̄a ire eya!
Kpọ, ọmọ okinu ya!
Òkiwulu inu me inyọn̄ ibot ogoon̄,
òkirama isaba inyọn̄ ibot orioon̄ inu.
9 Ogwu ima n̄a ìfet ukot kubọk òsô mè ìre gwun̄ ogaan̄.
Kpọ! Ọmọ okeke ya me udun̄ ogọ kiji,
ikitaak chieen̄ me otu nruruk,
ikikpọ itibi chieen̄ odidọ nruruk.
10 Ogwu ima n̄a îtumu ikọ, mè ibe emi,
“Ogwu mmabe, nan̄a keke,
ujuja ogwu eyi n̄a, na mè eji eje.
11 Kpọ! Mgbọ utọọk îraka;
ibot îta, mè ifo.
12 Ajakajak îgwook ichit ere geelek me inyọn̄ ijọn̄;
mgbọ unọn okikọt okwa îre,
ida ekerekwukwu îbene ikitaan̄ me lek ijọn̄ kiji.
13 Uti figi òkigwook adasi isi mfut,
ajakajak gerep òkidun̄u utop olu.
Ogwu mmabe, nan̄a keke na;
ujuja ogwu eyi n̄a, na mè eji eje.”
Ogwu ima
14 Ekerekwukwu n̄a, òkilet me emen udọn̄ me lek ewuuk,
mè emen ere nlelet me agba lek orioon̄,
san̄a isi kwun̄ sibi jeen̄ emi,
san̄a amọn, inyi ǹnọ owu ida;
ida kwun̄ ìkitotop,
isi kwun̄ ìjajaan̄ ikup.
15 Ìtet ekpuuruk cha ìnyi eji,
asabọn ekpuuruk cha òkijijaka uko gerep,
mije, uko gerep kiji îgwook ajakajak.
Ogwu emabe
16 Ogwu ima n̄a ìre eyi n̄a, emi ìre eyi kan̄;
ọmọ ìkisa arọọn̄ kan̄ isi urie me etete ajakajak lili.
17 Sabum egwe otoon̄ òta,
mè ogugo inu geelek olibi òchieen̄,
gwu kom ka, ogwu ima n̄a.
Libi kubọk òsô,
mè ìre gwun̄ ogaan̄,
me inyọn̄ kpunukpunu ogoon̄ cha.