Okwa Ògak Okwa
1
Eyi ìre okwa ògak okwa kè Solomọn.Ogwu emabe
2 Sa otu kwun̄ tuun̄ emi otu,
mije, ima kwun̄ îtop igak miin̄.
3 Aran̄ utop olu kwun̄ òkibubaan̄ olu;
erieen̄ kwun̄ ìtop kubọk aran̄ utop olu ògbugbuku.
Mkpọ si, nsabọn ibaan̄ emabe owu!
4 Sa emi gbaalek kwun̄ je,
eji elibi!
Owu ogwu ubọọn̄,
sa emi si tap me agwut kwun̄.
Ebi unene
Eji ekibele ejit mè ikinwọọn̄ owu;
eji ekitọn̄ ima kwun̄ igak miin̄;
îgbe ibe nsabọn ibaan̄ ema owu!
Ogwu emabe
5 Jei ebibaan̄ Jeruselem, emi m̀fifit mè ijaan̄ uja;
emi m̀fit kubọk uwu ọfọ ebi Keda,
mè ijaan̄ ibet lek ekwut isotu uwu ubọọn̄ kè Solomọn.
6 Ikayaka ìkpọ emi bak me lek nrebe ofifit,
mije ke ura îwọp emi ifit.
Bọn nga n̄a enanaan̄ ejit inyi emi,
mè isa emi ito ogwu òkikpọ chieen̄ me lek uko gerep;
uko gerep eyi n̄a ǹkayaka ìkpọ chieen̄ me lek.
7 Enyi ebi mmabe, ìtumu ìnyi emi nu,
ìre ere owa ke enyi ekisa urum arọọn̄ isi inyi urie?
Ìre ere owa ke enyi ekisa ema isi
mè esi esiki efuuk me ikarek?
Ìtumu ìnyi emi, inyi nkajijen̄e ìkana ere
kubọk ogwu òje oyet òsasa ekwut ichit isi
me agba lek urum arọọn̄ echi ebi unene kinyi.
Ebi unene
8 Jei, ogwu òjaan̄ uja ichit me etete ebibaan̄, ire òkariọọn̄,
je sibi gọọk akpat ukot urum arọọn̄,
mè sa bọn ebot kwun̄ si nyi urie
me agba lek uwu ọfọ ebi òkpukpo arọọn̄.
Ogwu ima
9 Ogwu mmabe, ǹsa owu itọ me lek uman inyinya n̄a,
eyi òkup me lek uji akọn̄ ogwu Fero.
10 Agba isi kwun̄ îjaan̄ enenen
melek mkputọn̄ cha otapbe,
ebek kwun̄ si îjaan̄ enenen
melek asi ebek ewuuk unye otu ewe otapbe.
11 Eji mêrom mkputọn̄ alata araran̄,
mè asi ebek alata okuket inyi owu.
Ogwu emabe
12 Mgbọ ogwu ubọọn̄ oyakabe lek imaan̄ me inyọn̄ ujọn̄ọ ikasi kan̄,
aran̄ nâdì n̄a okekidun̄u utop olu kan̄.
13 Ogwu ima n̄a ìkup me lek n̄a
kubọk gwun̄ akpa utop olu aran̄ mâa
olaak me agbagba ebe n̄a iba.
14 Ogwu ima n̄a ìkup me lek n̄a
kubọk njọ ajakajak uti ena
ònan̄a me uko gerep me Engedi.
Ogwu ima
15 Ogwu mmabe, owu ojaan̄ uja!
Me atikọ, owu ojaan̄!
Chieen̄ kwun̄ ìkup ilaak ilaak
kubọk chieen̄ ekerekwukwu.
Ogwu emabe
16 Ogwu ima n̄a, owu ojaan̄ uja!
Me atikọ, owu okọlọ ene ebek!
Mkpilaak kiji ìkup geren̄geren̄ kubọk inyọn̄ mbubet.
Ogwu ima
17 Ntọọk uwu kiji ìre uti olik,
mgbugban kiji ìre uti siperes.