Ogwu ntap-ubọk ebi Ijeren
41
“Enyi ebi ido lek achọ geelek, ìriaan̄ ere me isi n̄a!Kè ebi ife geelek etap aya efuuk!
Kè ema esibi enu, mè etumu ikọ,
kè eji egbaan̄ echichini me ere oyerebet.
2 Ekene otimi ene ge me agan̄ mbum-ura,
ogwu ntim-mkpan̄ okigọọk me akpat ukot?a
Ekene orọ ebi ofifi ido erọn̄ enin̄ ubọk kan̄,
mè irọ ibe ọmọ itim ikpan̄ ebi ubọọn̄?
Oge akọn̄ kan̄ ìsọsọp ema
igwook ijot ijọn̄ kubọk mfuun̄;
oraan̄ kan̄ okpọkpọk ema iyat
kubọk efet owut nchat mbubet isan̄a.
3 Ọmọ ìrerieen̄ ema isan̄a,
ire, mè ikije eyi kan̄, ìkasak unan geege,
me lek oniin̄ ọmọ ìkararak ìje.
4 Ìre ekene osi ikwaan̄ ya, mè irọ inu ya?
Sà ìre ekene okigween̄ ebi ene isibi
me ukot me ukot bene me ibebene?
Îre emi, Okumugwem,
emi nre Adasi mè Òta, emi nre ene ya.”
5 Ebi ido lek achọ mîmun̄, mè ifieek owot,
ebi okputut linyọn̄ mêkiran inyi ukpook.
Ema mîgele igbet, mè inan̄a isibi inu,
6 ogwu ikup, otap ubọk onyi ogwu melek kan̄,
mè otumu onyi ogwu ngwan̄ òbe, “Tet lek nye!”
7 Ogwu usọ ikwaan̄ uwot
môkekirọ ogwu usọ alata araran̄ inye,
ogwu òkisa abaracha ibọn̄ inu irọt
môkekitap ogwu òkibọn̄
okwukwut efuuk me emen,
mè òkotumu òbe ke ubọk
esusọkọbe mkpọmfaka ya îjaan̄,
mè ònosa omimin ogon
mkpọmfaka ya òkaan̄, inyi ikarọn̄.
8 “Ire, owu, Ijeren ìre gwun̄ ikwaan̄ n̄a,
Jekọp ogwu emi ngobobe,
owu ogwu owot iman kè
Ebereyam ogwu unene n̄a,
9 emi m̀mọnọ owu me okputut linyọn̄,
mè igwen owu inan̄a me ntutun̄ ntutun̄ linyọn̄,
mè itumu inyi owu ibe, ‘Owu ìre gwun̄ ikwaan̄ n̄a,’
emi ǹgogobo owu, ǹkajijit owu ìtele.
10 Katet ukpook, ke emi òwa me lek kwun̄;
kasisaak lek kwun̄, mije, emi nre Awaji kwun̄.
Emi mâtap owu efuuk me emen, mè itap ubọk inyi owu;
mâsa ubọk ulom ata irọrọ n̄a igọbọ owu ikaan̄.
11 “Ebi geelek ìkinaan̄ ejit iwuku inin̄ owu lek,
esip môtet ema ire lek kpebekọt ibene isi;
ebi ìkitim enyi akọn̄ me lek,
mêkwaan̄ ita, mè ikana inu ikike.
12 Owu môweek ebi ìkije ikeme owu cha,
òkpomun̄ lek;
ebi ìkitim owu akọn̄ me lek cha,
ema mêkana inu ikike, kpebeyaka ikukup.
13 Mije, emi Okumugwem, Awaji kwun̄,
ǹtetet owu me ubọk agan̄ ulom kwun̄,
mè ikibe owu, ‘Katet ukpook,
ke emi mâtap ubọk inyi owu.
14 Owu Jekọp, katet ukpook!
Enyi ebirieen̄ ebi Ijeren, ikatet ukpook!
Emi me lek n̄a mâtap ubọk inyi enyi.
Emi Okumugwem, Ogwu Mbuban ebi Ijeren,
Ogwu Òfaka enyi Isibi, emi ntumu.
15 Kpọ, mâsa owu irọ ugen̄
sanasana otu ekisa igen̄ akpa,
eyi ayaya òrereke, mè ikaan̄ owuwa ejeek me lek.
Owu môbọn̄ ogoon̄, mè ikpukpuku ema igwook,
mè ibọn̄ orioon̄ ikana mfufe akpa.
16 Owu môgen̄ ema, efet môsasa ema ije,
egwijo môyiyiyala ema ichieen̄ isan̄a.
Ire, owu môkekinwọọn̄ unwọọn̄ me emen Okumugwem,
mè isa Ogwu Mbuban ebi Ijeren ikigugo lek.
17 “ ‘Ebi ugbọọn̄ mè ebi una mêkiweek mudim,
ire, kpunu;
alọm îchiaak ema me ebek inyi urak-ebek mudim.
Ire, emi Okumugwem mâfọọk ema otu;
emi Awaji ebi Ijeren, m̀kpajit ema itele.
18 Mâbum okwaan̄ me inyọn̄ ogoon̄ òchachat,
mè ichili ogbuuruk me etete iteke ijọn̄.
Mârọ emen èwê ikana oyô,
mè ijọn̄ òchachat ikana ibot mun̄.
19 Me emen èwê,
mâwop uti olik mè uti akasia
mè uti mitulu mè uti olifu;
me lek ijọn̄ òchachat,
ke mbatap uti alaga inwan̄ mè uti junipa mè uti siperes,
20 inyi ebi ene emun̄, mè eriọọn̄,
mè ekeek, mè egobo etet,
ibe ke îre Okumugwem osa ubọk kan̄ irọ eyiyi,
ke îre Ogwu Mbuban ebi Ijeren orom inu chi.’ ”
Okumugwem îtọ ubọk me isi awaji ataak
21 Okumugwem onenibe, “Ìkpa ibot ikọ kinyi.”
Ogwu Ubọọn̄ kè Jekọp ìbe,
“Ìna ìniwut ifan̄a me ibot ikọ kinyi nu.
22 Ìsan̄a mkpọmfaka kinyi ìsibi, inyi ema ekpa-nu
inu òborọ mgbọ òkup me isi enyi eji.
Ema etumu-nu inu echi òrọrọ iraka enyi eji,
inyi eji ekaan̄ nkeek ebak ema,
mè eriọọn̄ inu mgburudun̄ kiban̄ obore.
Mè ìyaka ire, ema ekpa-nu inu òkinu me isi enyi eji.
23 Ema etumu inu òborọ mgbọ òkinunu enyi eji,
inyi eji eriọọn̄ ibe ema ìre awaji.
Ema erọ-nu ata inu ge, mè ìre ijo inu ge,
inyi eji emun̄, mè etet ukpook.
24 Me atikọ, enyi awaji cha, enyi ìre inu ikike,
ubọk ikwaan̄ kinyi ìre si inu ikike,
ogwu ògobo enyi inyi lek kan̄, ene ya îlọ ijọn̄.
25 “Emi nra ijibi ene ge ibene me agan̄ inyọn̄, òkinu,
ogwu ònan̄a me agan̄ mbum-ura òkigwen erieen̄ n̄a.
Ọmọ ìkijak ebi mkpulu kubọk ibat,
kubọk ogwu òbot ugọn̄ okijak arika.
26 Ìre ekene otumu inu yi bene me ibebene,
inyi eji mêkọtbe iriọọn̄,
mè ìre itumu me mgbọ òraraka,
inyi eji mêkọtbe itumu ibe ke înen?
Ene geege ìkatumu,
ene geege ìkakpa ìsibi,
ene geege ìkanọ enyi etumube ikọ geege.
27 Emi nre adasi ogwu obe ebi Sayọn, ‘Ìkpọ, ema ire ebi!’
Emi nria ogwu ata etip inu Jeruselem.
28 Emi mkpọ, ǹkamun̄ ene geege,
ogwu nteme geege kpunu me etete ife chi,
kpunu ogwu òfọfọọk emi otu mgbọ ndobe ema ikọ.
29 Kpọ, ema otutuuk ìre ofiaan̄!
Ubọk ikwaan̄ kiban̄ ìre ikike,
mkpọmfaka kiban̄ ìre gaalek efet, mè ire ukpọk ukpọk.