Ogwu ikwaan̄ Okumugwem
42
“Kpọ gwun̄ ikwaan̄ n̄a ire ogwugwu,ọmọ ke mbieen̄ inye,
ogwu emi ngobobe, ogwu ejit n̄a otopbe me lek.
Emi nra itap Ekwukwu n̄a me emen kan̄,
ọmọ môjeen̄ ebi ido geelek unen oyerebet.
2 Ọmọ ìkpotaan̄ ukpo, ìkpobene ida ifo inyọn̄,
ìkpobene ida itumu ikọ me lek oniin̄.
3 Anyiaan̄ òkakaan̄ unan me lek, ọmọ ìkpofan̄a,
otitọn̄ eyi ìkalomo ìjaan̄, ọmọ ìkponiin̄.
Ìbokekeke inye isan̄a unen oyerebet isibi.
4 Ọmọ ìkpowọ lek, efuuk ìkpota ọmọ me owot,
mege môrọbe unen oyerebet ikeke me linyọn̄.
Ijeen̄-inu kan̄ ke ebi ìluk me lek achọ ekikpọ chieen̄.”
5 Îre Awaji, Okumugwem, orom akpabin inyọn̄,
mè iwele inyana,
ọmọ oyat linyọn̄ mè inu geelek
òkitibi isibi me lek iwele isan,
ọmọ onyi ebi linyọn̄ efuuk ema ekifuuk,
mè inyi ebi ìkije me linyọn̄ ugwem ema ekigat.
Awaji, Okumugwem, ogwu òrọrọ inu chi, ìtumu ibe ikeyi:
6 “Emi, Okumugwem ngwen owu me ata irọrọ;
emi mâtet owu me ubọk.
Emi mâsun̄ owu, mè irọ owu òre
inyan̄a-ibot ònyi ebi ido geelek,
mè òre utoon̄ ònyi ebi ido geelek,
7 inyi owu ònochili chieen̄ ebi ǹnàan̄,
mè òtọn̄ọ ebi mkpọn òto,
mè òsan̄a ebi mkpọn emen ijọn̄ òsibi
me emen udun ema ekupbe.
8 “Emi nre Okumugwem, erieen̄ n̄a ire eya!
M̀kpayaka umin n̄a inyi ofifi ene,
m̀kpabayaka itọn̄ ekinyi emi inyi mkpọmfaka.
9 Ìkpọ, inu cha mbe môrọ, îra irọ iraka,
aya inu echi òborọrọ ke nkitumu isibi mgbọ keyi;
sabum inu cha môbonikirọrọ,
nra ilolook enyi.”
Okwa itọn̄ ekọtbe inyi Okumugwem
10 Ìkọt aya okwa ìnyi Okumugwem!
Ebi ìkup me okputut linyọn̄, ìtọn̄ ọmọ,
enyi ebi ìkikọp okwaan̄,
mè enyi inu geelek òkup me okwaan̄,
enyi achọ geelek, mè ebi ìluk me lek kiban̄.
11 Kè èwê mè ama ile òkup me emen kan̄
ebene ida kiban̄ etaan̄ ukpo unwọọn̄;
kè asabọn ama geelek ebi
Keda elukbe enwọọn̄ unwọọn̄.
Kè ebi Sela ekọt okwa enwọọn̄ lek,
kè ema ekup me inyọn̄ ibot ogoon̄ etaan̄ ukpo unwọọn̄.
12 Kè ema enyi Okumugwem umin,
mè enyi ọmọ itọn̄ me lek achọ geelek.
13 Okumugwem mônan̄a isibi kubọk ogwu unye,
unaan̄-ejit ìkibumu ọmọ me
ejit kubọk ogwu usọ akọn̄;
ọmọ môtaan̄ ukpo ntim-mkpan̄, mè itiki si akọn̄,
mè itim ikpan̄ ebi ochicha kan̄.
14 “Nriaan̄ ere ijọn̄ọ mgbọ,
ǹkasan̄a amọn geege, ǹtetet lek ikaan̄.
Ire, mgbọ keyi, mâtaan̄ ukpo
kubọk nwa-owot uman okitet,
efuuk îlet emi, mâcho efuuk.
15 Mânijijaka ogoon̄ mè orioon̄ ìgwook,
mârọ uti geelek òtitibi me lek kiban̄ ichiaak ita.
Mârọ okwaan̄ geelek ikana achọ,
mè irọ òkpuku mun̄ geelek ichiaak ita.
16 Mâsa ebi ǹnàan̄ ije me oniin̄ ema kperarak iriọọn̄,
mâsa ema ije me oniin̄ ema kpewuwuuk lek ije.
Marọ udun ikana utoon̄ inyi ema,
mè irọ ere òkpukpukpunu irọt.
Otutuuk inu chi ke mbarọ,
m̀kpanan̄a itele ema.
17 Ebi ìsa mkpọmfaka ekọkọ itoon̄ ejit,
ebi ìkitumu inyi mkpọmfaka ebobot ibe,
‘Enyi ere awaji kiji,’
ebererieen̄ ema ikpebe,
esip môtetet ema enenen.
Ebi Ijeren mînin̄ ǹnàan̄ mè ìnan
18 “Enyi ebi ìnan, ìnọ ikọ!
Enyi ebi ǹnàan̄, ìkpọ, mè imọọn̄!
19 Ekene ore ǹnàan̄, ilọ me lek gwun̄ usun̄ n̄a?
Ekene ore ìnan kubọk ogwu ikwaan̄ emi nriabe isibi?
Ekene ore ǹnàan̄ ibet lek ogwu ngobobe inyi lek n̄a,
mè ire ǹnàan̄ kubọk gwun̄ ikwaan̄ Okumugwem?
20 Owu omun̄ owuwa inu nrọbe, ire, òkasa ìgwen inu,
utọn̄ kwun̄ îchili, ire, òkakisa ìnọ ikọ geege.”
21 Îtop Okumugwem me lek irọrọ inyi ikan kan̄ imin,
mè ikaan̄ mgbugbo,
inyi ọmọ isa me ikeya ijeen̄ ata irọrọ kan̄.
22 Ire, ife chi ìre ife efumbe, mè itet inu kiban̄ ibọkọ;
etaak ema otutuuk me udọn̄,
mè ilileek ema me uwu mkpọn.
Ema mîkana inu efufum,
kpunu ogwu òbọbọkọ ema isibi;
mîtet inu kiban̄ ibọkọ,
kpunu ogwu òbebe, “Ìyaka ìnyi!”
23 Ekene me etete kinyi obogban̄ utọn̄ me lek keyi?
Sà ìre ekene obogbala utọn̄,
mè inọ inu yi me mgbọ òkup me isi?
24 Ekene oyaka Jekọp inyi ibe etet inu kan̄ ebọkọ,
mè iyaka Ijeren itap me ubọk ebi ìkifum inu?
Ìre ìkare Okumugwem,
ogwu eji erọbe ijo inu ikeme?
Eji kpechieek ijeje me oniin̄ kan̄,
eji kpesusun̄ si ikan kan̄.
25 Eya orọ îgbukube uyok uyok
unaan̄-ejit kan̄ igwook ema lek,
mè inyi si ema ujaralek eyi inu afa òkije me lek akọn̄.
Ikekisak kubọk alọm ukan̄ ikana ema me ijọn̄ okokop,
ire, ema kpekọt igobo itet;
îtaka ema iriọk,
ire, ema kpekaan̄ nkeek inyi.