Umin òkup me isi inyi Sayọn
54
Okumugwem ìtumu ibe ikeyi:“Owu enenwaan̄ ora, kọt okwa,
owu ogwu òkararak ìman gwun̄;
dimi okwa, mè taan̄ ukpo nwọọn̄ unwọọn̄,
owu ogwu uman ìkararak ìtet;
mije, ogwu enenwaan̄ ejitbe itele môkaan̄ bọn iwa
igak ogwu òkup melek olom.”
2 Da ere uwu ọfọ kwun̄ wele,
mè taba ekwut inyọn̄ kan̄ wele san,
katet ubọk ìkaan̄;
tap olik jọn̄ọ me lek,
mè gwuun̄ otutuuk okpọ̀kọ kan̄ nye.
3 Mije, owu môkpọk iwele isan
inyi agan̄ ulom mè agan̄ ujit,
ebi owot iman kwun̄ mêbọkọ ama me ubọk ebi ofifi ife,
mè iluk me ama ebi ife ema ejijakabe igwook.
4 “Kafieek owot; esip ìkpotet owu.
Katet ukpook esip; esip ìkpomun̄ owu isi.
Owu môwuuk esip òtetet owu mgbọ ijija kwun̄,
owu òkpoyaka ikeek esip
okaan̄be mgbọ orebe nwakpa.
5 Mije, Ogwu Òrorom owu ore nlom kwun̄,
Okumugwem Ogwukaan̄ Inyọn̄ mè Ijọn̄ ore erieen̄ kan̄,
Ogwu Mbuban ebi Ijeren ore Ogwu Òfaka owu Isibi;
ekigwen ọmọ Awaji otutuuk linyọn̄.”
6 Awaji kwun̄ ìtumu ibe,
“Okumugwem môgwen owu itap
kubọk nwa ejitbe, ogwu ejit ikarege ijọn̄;
nwa òbat olom me nsabọn ibaan̄,
enenilap isibi.
7 Sọntitiik mgbọ ke njit owu itele,
ire, sa me ikpele njijin, mâsa owu igwu ikom ika.”
8 Okumugwem Ogwu Òfaka owu Isibi ìtumu ibe,
“Mgbọ ejit onaan̄be emi iraka iman̄
ke nda isi isan̄a me lek kwun̄ sọnja mgbọ.
Ire, sa me imumechieen̄ eyi òkikup ire mgbọ geelek,
mâto owu nsan.”
9 “Me lek n̄a, inu yi ìbet lek inu òrọ me ukot kè Nuwa,
mgbọ nnyan̄abe ibot ibe ke mun̄
òmemeen̄ linyọn̄ me ukot kè Nuwa
ìkpoyaka ikpọk imeen̄ linyọn̄ ofifi.
Ikeya si, emi nnyan̄a ibot mgbọ keyi ibe
ke m̀kpayaka inaan̄ ejit inyi owu,
m̀kpayaka ikan̄ inu inyi owu ofifi.”
10 Okumugwem, ogwu òkaan̄ owu njijin me lek ìtumu ibe,
“Ogoon̄ ikesisisik,
mè orioon̄ ikejijibi inan̄a me akpat,
imumechieen̄ mgbọ geelek
nkaan̄be me lek kwun̄ ìkposisik,
inyan̄a-ibot eyi esuuk n̄a, ìkpojibi.”
11 Owu ama ekpukpukube igwook, eyi egwijo obenbe,
kpunu ogwu òkakat owu ejit,
kpọ, mâsa unye otu ewe ewuuk tọkwọyis inama owu,
mè isa ewuuk safaya itọbọ ọdọ kwun̄.
12 Mâsa ewuuk rubi inama uwu-oket kwun̄,
mè isa ewuuk unye otu ewe inama otunchit kwun̄,
mè isa atalek ewuuk unye otu ewe inama mgban kwun̄.
13 Okumugwem môjeen̄ otutuuk bọn ebirieen̄ kwun̄ inu,
esuuk nsabọn kwun̄ mêkaan̄be mômin enenen.
14 Mêsa ata irọrọ igwuun̄ owu ikeke inye;
tukutuku môjọn̄ọ owu ere me lek.
Kpunu inu geege òbokifieek owu owot,
mêsan̄a uga ukpook ito me ujọn̄ọ ere,
ìkpoje igbet owu lek.
15 Ogwu inu owu akọn̄ me lek, ìkare emi nrọ;
ogwu geelek òjibi akọn̄ igọọk owu,
ìbochechep ita owu me ubọk.
16 “Kpọ, îre emi me lek n̄a nrom ogwu usọ okwukwut,
ogwu òkifuuk mbubuk ukan̄ ilomo,
mè osa orom inu ìbosa isi ikwaan̄,
Îre emi me lek n̄a nrom ogwu òjijaka inu ibe ikijijaka inu.
17 Eya orọ, nroon̄ akọn̄ geelek
erombe ibesa itim owu akọn̄ me lek ìkporeke;
otu alọm geelek òtutumu ikọ ikeme owu me oyerebet,
owu òbotitip ọmọ oyerebet.
Eyiyi ore ìrot òkup inyi ebi ikwaan̄ Okumugwem;
emi nre ogwu òkisan̄a ema itip-oyerebet me ibot.
Emi Okumugwem ntumu.”