Ogwen egwenbe ebi ebek orakbe
55
“Enyi otutuuk ebi geelek ebek orakbe, ìna,ìna me otu mun̄.
Enyi ebi kpekaan̄ ikpoko, ìna,
ìna ìnilep akpa, mè ìrie!
Ìnilep akpa me ikike,
mè ìlep miin̄ melek mun̄ ebe me ekakpege ewe.
2 Keke orọ enyi ekifiat ikpoko me lek inu ikarege inorie,
mè ikikwukwulu me lek inu eyi ìkpojot ene owot?
Ìgbala utọn̄ ìgban̄ inu mbatumu, mè ìrie inu ònwọnwọn,
inyi ibot ejit kinyi mônọ utop ata inorie.
3 Ìgban̄ utọn̄, mè ìna me lek n̄a;
ìriọọn̄ ubọk igban̄, inyi ibot ejit kinyi igat ugwem.
Mânyan̄a ibot melek kinyi, eyi môkupbe ire mgbọ geelek,
mè inyi enyi imumechieen̄ mgbọ geelek ògbegbe utoon̄-ejit,
eyi nkaan̄be me lek kè Debit.
4 Kpọ, ǹsa ọmọ irọ inu ata-ikọ inyi ebi esese ife geelek,
mè irọ ọmọ ogwu ibot
mè ogwu òkitọ ikọ inyi ebi esese ife geelek.
5 Owu òkpolọlọ igwegween̄ ebi ido owu okarakge ìriọọn̄,
ido ebi kperarak iriọọn̄ owu
ebelibi ekot ekot inu owu lek,
mije Okumugwem Awaji kwun̄,
Ogwu Mbuban ebi Ijeren,
îrọ mè owu òkaan̄ umin.”
6 Ìweek Okumugwem mgbọ mêweekbe ọmọ imun̄,
ìgwen ọmọ mgbọ îkupbe igbet ere.
7 Ogwu ikpak itele inu ikpak kan̄,
ogwu ijo ene itele ijo ekiket kan̄,
mè igwu ikom igọọk Okumugwem,
ke môkaan̄ ọmọ nsan me lek;
mè igọọk Awaji kiji,
ke môtele ogbogbo ijo inu kan̄.
8 “Mije ekiket n̄a ìkare ekiket kinyi,
oniin̄ kinyi si ìkare oniin̄ n̄a.
Emi Okumugwem ntumu.
9 Ike akpabin inyọn̄ obenebe igak linyọn̄,
ikeya ke oniin̄ n̄a obene igak oniin̄ kinyi,
ikeya si ke ekiket n̄a obene igak ekiket kinyi.
10 Mije, ike ibot melek ibot awo
ekinan̄a me akpabin inyọn̄ irep igwook me ijọn̄,
ire, kpeyaka ikigwu ikom ifo isinyọn̄,
îtata erereke ijọn̄,
mè irọ ibe uti itibi isibi, mè ito mfut,
ufuna ogwu òwop uko ikaan̄ ukwuuk uti ìbosa iwop,
mè ogwu òrie inorie ikaan̄ inorie irie,
11 ikeya si ke ikọ òsibi emi me otu okup,
ìkpogwu ikom ukpọk ukpọk inu emi lek,
îtata ìrọrọ inu òkup emi me ejit iso,
mè irọ inu mbakbe me lek iria ọmọ isibi isan̄a.
12 Enyi mêsa me unwọọn̄ inan̄a isibi,
mêsa enyi ije esuuk esuuk.
Ogoon̄ melek orioon̄
mêkidimi okwa unwọọn̄ me isi kinyi,
otutuuk uti òkup me oron
môkikwak ubọk inyi enyi.
13 Mgbọ ya, uti siperes môtibi me useen̄ ukpak,
uti mitulu môtibi me useen̄ abọm egbe.
Eyiyi mônenirọ Okumugwem itaan̄ etip,
mè ire si inu ata-ikọ ire mgbọ geelek,
eyi kpebekọt ijijaka.”