Unyan̄a môre lek ebi ofifi ife
56
Okumugwem ìtumu ibe ikeyi:“Ìkisibi unen oyerebet,
mè ìkirọ inu òtatat,
mije, unyan̄a n̄a òkinu me mgbet mgbet mgbọ,
ata irọrọ n̄a si môgwat lek isibi utoon̄.
2 Uga ubelejit òwa inyi ogwu geelek môrọbe inu yi,
mè ogwu geelek môtetbe inu yi ikaan̄ inye.
Uga ubelejit òwa inyi ogwu òkisun̄ Usen Mbuban, ìkachichaka,
mè ogwu òsasan̄a ubọk kan̄ me irọrọ ijo inu.”
3 Ogwu ichen òsa lek kan̄
ichim iriaak me lek Okumugwem,
ikatumu ìbe,
“Okumugwem ìkpolọlọ isasan̄a emi
isan̄a me etete ebi kan̄.”
Ogwu esan̄abe òsok ikanina lek ìbe,
“Emi ìre nchiaak uti.”
4 Mije, Okumugwem ìtumu ibe,
“Ebi esan̄abe òsok ìkisun̄ Usen Mbuban n̄a,
ebi ìkigobo inu òneneme emi irọ,
mè itet inyan̄a-ibot n̄a inye,
5 me emen uwu n̄a mè emen mgban n̄a,
emi mânyi ema erieen̄ mè inu mêkisa ikeek ema,
eyi mônwọnbe igak bọn ebirieen̄ mè bọn ebibaan̄;
mânyi ema erieen̄ òbokup ire mgbọ geelek,
eyi kpebegwak isan̄a.
6 Ebi ichen ebi ìsa lek kiban̄
ichim iriaak me lek Okumugwem,
mè ikisi ikwaan̄ inyi,
mè ikima erieen̄ Okumugwem,
mè ikitọbọ ebum inyi,
otutuuk kiban̄ ebi ìkisun̄ Usen Mbuban, kpechichaka,
mè ikitet inyan̄a-ibot n̄a inye,
7 emi mâsa ema inu me lek ogoon̄ mbuban n̄a,
mè inyi ema unwọọn̄ me emen uwu n̄a òrere ere uriaak.
Ngwugwa ewọwọp iriọk kiban̄ mè ofifi ngwugwa kiban̄
mêkibọkọ me inyọn̄ ntook ngwugwa n̄a;
mije, mêkigwen uwu n̄a
uwu uriaak inyi ebi otutuuk ido.”
8 Ogwukaan̄-ene Okumugwem,
ogwu òkpukpulu ebi Ijeren elapbe ichieen̄, ìbe ikeyi:
“Emi mâkpulu si ebi ofifi ife ititiin̄ igbaalek kiban̄,
isa inisọkọ me lek ebi
mwuukbe lek ikpulu ititiin̄.”
Ijo ebi mkpulu
9 Otutuuk kinyi ebi kè anam oron, ìna,
otutuuk kinyi ebi kè anam-unye òkup me oron,
ìna ìnigwak ìche!
10 Ebi mbem me Ijeren ìre ǹnàan̄,
otutuuk kiban̄ mînan ifuk-ibot;
otutuuk kiban̄ ìre ibo mbuuk,
ema kpekikọt igbin;
ema ekililam ikana ikimumun̄ ilaak,
ema ekima uga ilaak,
11 Ema ìre ibo ebek ile,
owot kiban̄ ìkakijot.
Ema ìre ebi òkpukpo arọọn̄ ìnanan ngobo-ntet;
otutuuk kiban̄ mîkana inin̄ oniin̄ eyi akpalek kiban̄,
ogwu ikup, ìkiweek oruru eyi lek kan̄.
12 Ogwu ikup, ìkitumu inyi ebi melek kan̄ ibe,
“Ìna, ìtele ǹsa miin̄ ǹnu,
ìna mè eji enwọ miin̄ ukan̄ ebaan̄ ada me chieen̄.
Iyakwut môkup kubọk cherekeyi,
mè ònwọn si ogak cherekeyi.”