Ebi Juda mîchaka inyan̄a-ibot
11
Okumugwem onenitumu inyi Jerimaya ibe: 2 “Gban̄ ibot ikọ òkup me emen inyan̄a-ibot yi, mè sa si kpa nyi ebi Juda melek otutuuk ebi ìluk me Jeruselem. 3 Tumu nyi ema be: ‘Okumugwem, Awaji ebi Ijeren, ìtumu ibe ikeyi: “Ufieek-otu môkup inyi ogwu geelek ikagban̄ge utọn̄ me lek ibot ikọ òkup me emen inyan̄a-ibot yi, 4 eyi nnyibe ebi nte nte kinyi ida ibe esun̄, mgbọ nsan̄abe ema isibi me Ijipiti, me emen ukan̄ ikala okwukwut.” Mgbọ ya, ntumu inyi ema ibe, “Ìgban̄ utọn̄ me ida n̄a, mè ìrọ inu geelek ntọbe inyi enyi, ke enyi mêre ebi n̄a, emi nrere Awaji kinyi. 5 Sa me ikeyi, mârọ inyan̄a-ibot nnyan̄abe melek ebi nte nte kinyi iso. Ǹnyan̄a ibot ibe ke mânyi ema ata ijọn̄ òkisibi anam mè mfut uti.” Inyọn̄ ijọn̄ ya ke enyi ekiluk chereyi.’ ”Emi mfọfọọk ibe, “Ikup ikeya si, Okumugwem.”
6 Okumugwem onenitumu inyi emi ibe, “Look ikọ chi kana emen ama ebi Juda geelek, mè look si me lek oniin̄ geelek me Jeruselem ibe: ‘Ìgban̄ utọn̄ me lek ibot ikọ òkup me emen inyan̄a-ibot yi, mè ìkirọ. 7 Bene me akarake nsan̄abe ebi nte nte kinyi me Ijipiti isibi, m̀kpọkpọ ikitaba ema ubọk me utọn̄ mege inire chereyi ibe, “Ìgban̄ utọn̄ ìnyi emi.” 8 Ire, ema kpenọ, kperaraan̄ si utọn̄ igban̄. Kpan̄asi ikeya, ogwu ikup, ìkilibi igọọk unye-ibot ya eyi ejit ijo inu kan̄ okitọ inyi ọmọ. Eya orọ nsabe otutuuk ufieek-otu òje me lek inyan̄a-ibot ya inikeme ema, inyan̄a-ibot ya eyi ntọbe ibe ema erọ, ire, ema kperọ ya.’ ”
9 Okumugwem onenibe emi: “Ebi Juda mè ebi ìluk me Jeruselem mekitaka otọt. 10 Ema mîgwu ikom ifo lek ijo inu ebi nte nte kiban̄ erọbe, ebi ìjijit inọnọ ikọ n̄a. Ema mîkana igọọk ofifi awaji ikisi iriaak. Ebi uwu kè Ijeren mè ebi uwu kè Juda mîkpaka inyan̄a-ibot nnyan̄abe melek ebi nte nte kiban̄. 11 Eya orọ, Okumugwem ìtumu ibe ikeyi: ‘Mânisa ùrioon̄ itoon̄ ema, eyi ema kpebekọt ilibi inwọnọ. Ema mêtaan̄ ukpo igwen emi igak, m̀kpagban̄ utọn̄. 12 Ebi ama Juda geelek mè ebi ìluk me Jeruselem mêsi lek awaji cha, echi ema ekiwọp nsensi inyi cha, isi ito ito inyi. Ire, mgbọ ùrioon̄ isinu inyi ema, awaji cha ìkponyan̄a ema kubọk ge. 13 Enyi ebi Juda, otu ifuk awaji enyi ekaan̄be ìre ìkike melek otu ifuk ama kinyi. Ikeya si, otu ifuk ntook enyi egwuun̄be ikisa iwọp nsensi inyi Baali, awaji esip ya, ìre ìkike melek otu ifuk oniin̄ òkup me emen ama Jeruselem.’
14 “Kariaak uriaak me ibot ife chi, kabebeek mbeek geege me ibot kiban̄, kariaak me ibot kiban̄, mije, mgbọ geelek ema isigwen emi me emen uyọrọlek kiban̄, emi m̀kpagban̄ utọn̄.
15 “Ìre ebi n̄a ebi mmabe ekirọ keke me emen uwu n̄a,
ere ema erọbe owuwa ijo filafila inu kiban̄?
Ìre ema ekikeek ibe ke anam ngwugwa kiban̄ cha
môkọt ifeme osusut ijo inu isan̄a ema me ibot ni,
inyi ema ekpọkpọ ekerọ inu ikpak enyi isi,
mè ekenwọọn̄ unwọọn̄?”
16 Okumugwem ìgwen enyi uti olifu ugwem okupbe me lek,
òtoto ujuja mfut ijot lek.
Ire, môsa unye otu egwijo ge gaalek
isook ukan̄ itap me lek uti olifu ya,
agọọk kan̄ môfafaan̄ igwook.
17 Emi Okumugwem Ogwukaan̄ Inyọn̄ mè Ijọn̄, ogwu òwowop enyi, nra itumu ifieek ibe ke ùrioon̄ môtoon̄ enyi, mije, eyi enyi ebi uwu kè Ijeren mè ebi uwu kè Juda ewọpbe nsensi inyi Baali, enyi mîrọ ijo inu, mè isa me ikeya irọ ejit inaan̄ emi.
Mîtaka otọt ibak Jerimaya
18 Okumugwem onenikpọk mbum ijo otitọt ebi ochicha n̄a ekitọt ibak emi ijeen̄ emi. Nrọriọọn̄. Me mgbọ ya, îjeen̄ emi inu ema ekirọ. 19 Ǹkup kubọk gwun̄ arọọn̄ ebesa isi ikpan̄, eyi ikariọọn̄ge inu òbosibi inyi ọmọ. Ǹkariọọn̄ ibe ke ema mîtaka otọt ibak emi ibe,
“Eji enefieek uti yi melek mfut kan̄ efiin̄;
eji enekpan̄ ọmọ esan̄a me etete ebi ìkup me ugwem,
inyi ekayaka ìkeek erieen̄ kan̄ mgbọ geege.”
20 Ire, owu Okumugwem Ogwukaan̄ Inyọn̄ mè Ijọn̄,
owu ogwu òkisibi unen oyerebet,
mè ikiwọlọ ejit ene mè ekiket ene ikpọ,
ǹkiweek imumun̄ owu okirọ ema useen̄,
mije, owu ke nsa ikọ n̄a inu me isi.
21 Ebi Anatọt ekiweek ebek ugwem n̄a, mè ikibe, “Ire owut ifan̄a iben nriran me erieen̄ Okumugwem, owu môkwu me ubọk kiji.” 22 Eya orọ, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Mânisulu ema osusut. Nsabọn irieen̄ kiban̄ mêkwaan̄ me otu oge akọn̄, bọn ebirieen̄ kiban̄ mè bọn ebibaan̄ kiban̄ mêkwaan̄ me akan̄ inorie. 23 Mgbọ acha osusut ebi Anatọt isikem, mâsa ùrioon̄ initoon̄ ema, ene ge ikeyi me etete kiban̄ ìkposik.”