Jerimaya îkpa ufialek kan̄ ijeen̄ Awaji
12
Okumugwem, mgbọ geelek nkisa ikọ inu me isi kwun̄,owu òkire ogwu ata irọrọ.
Ire, tele mè ǹdo owu nu ikọ ofolek unen oyerebet:
Keke orọ inu okije ijaan̄ me lek ebi ikpak?
Sà ìre keke orọ ebi ofiaan̄ ekiluk me esuuk?
2 Owu owop ema, ema etitibi itet ijọn̄;
ema mîtibi imiin̄, mè ito mfut.
Me otu kiban̄, ema ekitumu ikọ ibak owu mgbọ geelek,
ire, me emen ejit kiban̄, owu ojọn̄ọ ere.
3 Ire, Okumugwem, owu oriọọn̄ emi;
owu omun̄ emi, mè iwọlọ ejit n̄a ikpọ òfo me lek kwun̄.
Taba ife chi je kubọk arọọn̄ ebekpakpan̄!
Sun̄ ema esese ban usen ebebak ema!
4 Ìre ijọn̄ yi ìbochat ikeyi isi ire mgbọ owa,
sà ìre mbubet me uko geelek ìbochiaak isi ire mgbọ owa?
Ebi kè anam mè ebi kè unọn mîta isan̄a kpai,
bak me lek inu ikpak ebi ìluk me lek ijọn̄ yi ekirọ.
Ema ekitumu ibe,
“Ìkabomun̄ ubọk mgburudun̄ mgbọ kiji obokup.”
Awaji îbọkọ Jerimaya otu
5 Okumugwem onenibe:
“Ire efuuk itet owu ililibi ekot melek ebi ukot ukot,
òbojeje isi ifan̄a ekot me lek ebi kè inyinya?
Ire owu otọbọ ukot inan̄a irọn̄ me inyọn̄ ijọn̄ kpunube ufialek,
òborọrọ me emen m̀bubaka oron agba okwaan̄ Jodan?
6 Ikerere ebi ngwan̄ kwun̄, ebi uwu nte kwun̄,
ema si mîleke owu itap me ufialek;
ema ekidimi ukpo me ibot kwun̄ kubọk ogbogbo ene.
Ema iketutumu ata ikọ ibak owu,
katoon̄ ema ejit me lek.
7 “Emi Okumugwem nra ijit ebi n̄a itele,
mè itọp ebi ìrere ìrot n̄a ifiin̄;
nkana ebi mmabe ire ibot ejit
itap me ubọk ebi ochicha kiban̄.
8 Ebi n̄a, ìrere ìrot n̄a, mîkana egbe àtat
òkup me oron,
mè inikigbigbin emi;
eya orọ nchabe ema.
9 Ebi n̄a, ìrere ìrot n̄a, mîkana ikup me lek n̄a
kubọk ntọọk ntọọk unọn òtaka unọn,
eyi otutuuk unọn òtaka unọn
ogwookbe ichit lek ikitọk itaka.
Ìsi ìgween̄ otutuuk anam oron geelek,
inyi enegọọk etaka ebi n̄a egwak.
10 Owuwa ebi òkpukpo arọọn̄
mîjijaka uko gerep n̄a isan̄a,
mè ijak ijọn̄ uko n̄a ikpukpuku;
ema mîrọ ujuja ijọn̄ uko n̄a ya
ikana nchat emen èwê ere inu geege ìkakitibi.
11 Mîrọ ijọn̄ ya ikana ere òyayat,
nchat ijọn̄ ya ìkup me ufieejit me isi n̄a;
otutuuk ijọn̄ ya îyat ita kpai,
mije, ene geege ìkakaan̄ ekiket ofolek.
12 Ebi ìbenijijaka lek ijọn̄ ya mîra irere
inyọn̄ otutuuk ǹlak ibot ogoon̄
geelek òkup me emen èwê,
mije, oge akọn̄ Okumugwem môrie ene
ibene me okputut ijọn̄ agan̄ ge isi ire agan̄ keyilọ;
kpunu ogwu ebilene geege òbokup me esuuk.
13 Akpa wit ke ema ewop, ire, ukpak ke ema erọkọ;
ema mîkwukwulu isi ikwaan̄, ire, kpemun̄ oruru geege.
Inu ema erọkọbe me uko îtet ema esip,
mije, Okumugwem înaan̄ ejit uyok uyok me lek kiban̄.”
Etip òkup inyi ebi ochicha ebi Ijeren
14 Okumugwem ìtumu ibe ikeyi: “Ire me lek ikpak ikpak lek ebi mbuuruk n̄a cha, ebi ìbọbọkọ ìrot nnyibe ebi n̄a, ebi Ijeren, emi mâjibi ema isibi me ido kiban̄, mè ijibi ebi uwu kè Juda isan̄a me etete kiban̄. 15 Ire, nsijibi ema isibi isan̄a, mâkpọk ikaan̄ ema njijin me lek, mè iyaka ikpọk isa ema ge ge ika inigwook, kpa ogwu melek ìrot kan̄, kpa ogwu melek ijọn̄ kan̄. 16 Ire ema iriọọn̄ ubọk ikween̄ irọrọ ebi n̄a, mè ikisa erieen̄ n̄a inyan̄a ibot ibe, ‘Kè lek ugwem Okumugwem’, kubọk ema ejeen̄be ebi n̄a ibe ekesa Baali enyan̄a ibot, mêsun̄ ema me irek melek ebi n̄a. 17 Ire, ido geelek ikagban̄ge utọn̄, emi m̀bajijibi ido keya isan̄a isi ge, mè ijijaka ema ichep. Emi Okumugwem ntumu.”