Ekwut lilin̄ kè Jerimaya
13
Okumugwem onenitumu inyi emi ibe: “Si lep ekwut lilin̄ tobo me ebon kwun̄, mè, kachieek ibe mun̄ ire lek.” 2 Ikeya ke nlep ekwut ebon kubọk Okumugwem otumube, mè itobo me ebon.3 Okumugwem onenitumu ikọ inyi emi òso mgbọ iba ibe: 4 “Sa ekwut ya olepbe itobo me ebon je si agba okwaan̄ Yuferetis,a mè sa si let me agbagba chieen̄ ewuuk.” 5 Nnenisa ekwut ya isi ilet me agba okwaan̄ Yuferetis ike Okumugwem obe emi ǹrọ.
6 Mgbọ owuwa usen orakabe me lek, Okumugwem onenibe emi, “Nan̄a keke si agba okwaan̄ Yuferetis si mọnọ ekwut ya mbe owu òsa òsi òlet me ere ya.” 7 Nnenisi agba okwaan̄ Yuferetis ya, mè irọkọ ere nletbe ekwut ya, mè isan̄a ekwut ya isibi. Ire, ekwut ya îfiat, ìkayaka ìnwọn isasa irọ inu geege.
8 Okumugwem onenitumu inyi emi ibe: 9 “Okumugwem ìtumu ibe ikeyi: ‘Ikeya si ke mbafiat ugumulek ebi Juda mè ikpele ugumulek ebi ama Jeruselem. 10 Ijo ife chi ìkirọ inu ikpak ikpak, mè ijit igbagban̄ utọn̄ me lek ikọ n̄a, ife ìkirọ unye-ibot eyi ejit kiban̄ okitọ inyi ema, mè ikisi lek ofifi awaji, ikisi isi ikwaan̄ inyi, mè ikitọbọ ebum inyi, ema mêkup kubọk ekwut yi okupbe. Ema kpebeyaka inwọn isasa irọ inu geege. 11 Mije, ike ekitobo ekwut ikam me ebon ene, ikeya ke ntobo otutuuk ebi uwu kè Ijeren mè ebi uwu kè Juda ikam me lek n̄a. Ǹrọ ikeya, inyi ema ere ebi n̄a, mè erieen̄ n̄a itaan̄ etip, mè ǹkaan̄ itọn̄ mè umin. Ire, ema kpegban̄. Emi Okumugwem ntumu.’ ”
Ogbokot ikpa anam
12 “Eya orọ, tumu nyi ema ibe: ‘Okumugwem, Awaji ebi Ijeren ìtumu ibe ikeyi: Etap miin̄ ejot ogbokot ikpa anam geelek.’ Ire ema itumu inyi owu ibe, ‘Ìre eji kperiọọn̄ ibe ke mêtap miin̄ ijot otutuuk ogbokot ikpa anam geelek ni?’ 13 Owu môtumu inyi ema ibe: ‘Okumugwem ìtumu ibe ikeyi: Emi mâtap usa-miin̄ ijot emen otutuuk ebi ìluk me inyọn̄ ijọn̄ yi. Môre lek ebi ubọọn̄ ebi ìkup me inyọn̄ ogboon̄ ubọọn̄ kè Debit, mè ire lek ebi ngwugwa mè ebi nriran mè otutuuk ebi ìluk me Jeruselem. 14 Mâsa ema ge igba ikwak me lek ge, ikerere ute mè gwun̄. Emi Okumugwem ntumu. M̀bajijijaka ema isan̄a kpai, m̀kpakaan̄ ata ejit mè ejit nsan mè ejit njijin geege me lek kiban̄.’ ”
Jerimaya îtaba ebi Ijeren ubọk me utọn̄ mije ugumulek
15 Ebi Ijeren, ìgban̄ utọn̄, mè ìnọ;
ikayaka ìbene lek,
Okumugwem îtumu isan̄a.
16 Ìnyi Okumugwem Awaji kinyi umin,
sabum ọmọ osa udun ònu,
mè sabum ukot kinyi okwala
me inyọn̄ ogoon̄ cha òdudun.
Enyi ekikpọ chieen̄ ikakaan̄ utoon̄,
ire, ọmọ môrọ utoon̄ ya ikana ekpuk udun,
mè inwene si itap me lek ufieejit òmimin enenen.
17 Ire enyi ijit inọnọ,
bak me lek ugumulek kinyi,
emi mâto ito me nlelet;
ujat ujat ito mônin̄ emi chieen̄,
mun̄ ito môkekigbọọk,
mije, mîkpulu urum arọọn̄ Okumugwem
me usun̄ akọn̄ isa ifo ofifi ido.
18 Tumu nyi ogwu ubọọn̄ mè ogwu uga ibe:
“Ìnan̄a ìkeke me inyọn̄ ogboon̄ ubọọn̄
ìsi ìkup me ere òsisiki,
mije, okpibot ubọọn̄ cha òkinyi enyi umin,
înan̄a enyi me ibot irọn̄.”
19 Mêgoon̄ otunchit ama emen èwê agan̄ osiki cha ichit,
kpunu ene geege òbokup ichili ema.
Mêkpulu otutuuk ebi Juda me usun̄ akọn̄ isa ifo ofifi ido,
ebekpukpulu ema otutuuk ene inọọn̄,
kpunu ogwu òbosik.
20 Ìbene chieen̄ ìkpọ
ebi ìkinan̄a me agan̄ inyọn̄ inu.
Mọmọ urum arọọn̄ ya etapbe owu me ubọk,
arọọn̄ echi owu okisa igugo lek cha.
21 Ire Okumugwem inisa ebi unene kinyi cha,
ebi enyi ejeen̄be inu cha, irọ ebi ìkikpulu enyi,
keke ke enyi ebetumu?
Ìre eya ìkpofiak enyi
kubọk uman ofiak nwa-owot?
22 Owu môkọt ido lek kwun̄ ibe,
“Keke orọ otutuuk inu chi okirọ emi?”
Inu chi ìkirọ owu mije owuwa ijo inu kwun̄.
Eya orọ egwakbe ekwut isan̄a owu me ebon,
mè ijijaka owu igwook.
23 Ìre ogwu Etiopia môkọt inwene akpa ofifit kan̄?
Sà ìre egbe ntọọk ntọọk môkọt
inwene ufit òtọtọọk me lek kan̄?
Ikeya si, owu òkpokọt irọ ata inu,
bak me lek owu orọ ijo inu iraka lek.
24 “Mâyiyala enyi kubọk mfufe akpa,
eyi efet emen èwê okiwut ichon ikana.
25 Eyiyi ore uche kwun̄,
uche eyi ndọmọbe isun̄ inyi owu,
mije, owu owuuk emi,
mè isi itoon̄ ejit me lek awaji ataak.
Emi Okumugwem ntumu.
26 Mâchiaan̄ ekwut ebon kwun̄ ikana ichit owu isi,
inyi ebi ene emun̄ njak kwun̄,
mè esip itet owu.
27 Ugan-nwa kinyi cha,
mè barabat uman inyinya enyi ekibubat cha,
mè ijo ugwem òje oyet cha enyi ekirọ;
mbuban inu cha enyi ekirọ
me inyọn̄ oriọọn̄ mè emen oron,
emi m̀mumun̄ isan̄a kpai.
Jei Jeruselem, môfieek inyi owu!
Mgbọ owa ke owu obokup me emen okpa ire?”