Ijo una ibot mè akan̄ îkeme ebi Juda
14
Okumugwem onenitumu ikọ inyi Jerimaya ofolek una ibot ibe ikeyi:2 “Juda ìkup me ufieejit,
ebi ama kiban̄ geelek mêkiyiyeek ita;
ema ekifieek ejit mije ijọn̄ kiban̄,
ida ukpo òkitaan̄ me Jeruselem.
3 Ebi ilile kiban̄ mîria nsabọn mun̄;
nsabọn mîsi otu udọn̄ mun̄,
ire, kpunu mun̄ geege.
Ema ebebeen̄ ugọn̄ kiban̄ ukpọk emen ika;
ochak mè esip îtet ema lek,
ema esasa ubọk ichit isi.a
4 Ijọn̄ îchiaak, mè ikiraan̄ ibak,
mije, ibot geege ìkarọn̄ọ ìgwook;
îfieek ebi uko me lek,
ema esasa ubọk ichit isi.b
5 Ogaan̄ îman gwun̄ me oron,
mè ijit aya gwun̄ kan̄ itele,
mije, kpunu mbubet.
6 Inyinya akpan echi oron ekeke
me inyọn̄ ogoon̄ òlalak ibot,
ikigween̄ efet igban̄ olu, kubọk ibo oron afa,
chieen̄ kiban̄ ìkayaka ìmọọn̄ inu,
mije, kpunu mbubet.”
7 Ebi ene ekekibe, “Jei Okumugwem,
ubọk geelek ijo kiji okekebe ikeme eji,
soso, mije erieen̄ kwun̄, rọ inu ge ma.
Eji mîjit owu itele enenen,
eji mîrọ owu ijo inu.
8 Jei, owu Ikpọchieen̄ ebi Ijeren,
ogwu òkinyan̄a ebi Ijeren me mgbọ ufialek,
keke orọ owu okupbe kubọk ogwu ichen ònu ama ene,
kubọk ogwu ije ògbagba igwele ukan̄ eririeen̄ ge gaalek?
9 Keke orọ owu okupbe kubọk ogwu inu orọbe me nriki,
kubọk ogwu unye ogwu ìkakọt ìnyan̄a ene?
Jei Okumugwem, owu òwa me etete kiji,
erieen̄ kwun̄ ke eji ekichieek;
kajit eji ìtele ma!”
10 Okumugwem ìtumu ikọ ofolek ife chi ibe ikeyi:
“Ema mîma ugwem nyanya enenen,
kpekitet ukot ikaan̄ me ere ge.
Eya orọ, Okumugwem ìkayaka ìbọkọ ema ìtap ofifi;
mgbọ keyi, môkeek inu ikpak cha ema erọbe,
mè isulu ema osusut bak me lek ijo inu kiban̄.”
Okumugwem ìkachieek ibe Jerimaya iriaak ọmọ me ibot ebi Ijeren
11 Okumugwem otutumu inyi emi ibe: “Kariaak uriaak mè ìbeek nnwọn me ibot ife chi. 12 Ema ikejijin otu, emi m̀kpanọ mbeek kiban̄. Ema ikegwagwa ngwugwa ewọwọp iriọk mè ngwugwa akpa, emi m̀kpabọkọ. Kpan̄asi ikeya, m̀basasa oge akọn̄ mè akan̄ mè ijo orukan̄ ikpan̄ ema isan̄a.”
13 Emi nnenibe, “Jei Ogwukaan̄-ene Okumugwem, kpọ ma! Ebi nriran ekitumu inyi ema ibe ke owu òbe, ‘Enyi kpebemun̄ akọn̄, akan̄ ìkponinin̄ si. Mije, emi mânyi enyi esuuk môkupbe ijọn̄ọ mgbọ me ere keyi.’ ”
14 Okumugwem otutumu inyi emi ibe, “Ebi nriran cha ekiben nriran ataak me erieen̄ n̄a. Ǹkaria ema, ǹkanyi ema ida, ǹkatutumu inu geege ìnyi ema. Ilaak ọkpọchieen̄ mè itutumu inu òborọ me mgbọ ònu me isi cha ema ekitumu inyi enyi ìre ataak ataak. Ofiaan̄ ofiaan̄ inu òkup me emen ejit kiban̄ ke ema ekisan̄a itumu inyi enyi. 15 Eya orọ, Okumugwem ìtumu ibe ikeyi: ‘Ebi nriran cha ìkisa erieen̄ n̄a iben nriran, me emi ǹkararia ema, mè ikitumu ibe, “Kpunu akọn̄ mè ìre akan̄ òbochak ubọk me lek ijọn̄ keyi,” ebi nriran chi ebekwaan̄ me otu oge akọn̄ melek akan̄. 16 Mêtọọn̄ ebi ema ekiben nriran inyi cha igwook me lek oniin̄ Jeruselem mije akan̄ melek akọn̄. Kpunu ene geege ogwu òbofuun̄ ema, mè ebi nwa kiban̄, mè bọn ebirieen̄ kiban̄, mè bọn ebibaan̄ kiban̄. Mâyaka inu ikpak ema erọbe igwook ema me lek.’
17 “Tumu ikọ keyi nyi ema:
“ ‘Mun̄ ito ìkigbọgbọọk emi me chieen̄,
eririeen̄ mè ikarek, kpunu ifefieek,
mije, obaak gwun̄ enenwaan̄ n̄a îben ikpele unan,
uga ufialek îtoon̄ ọmọ, mè itap ọmọ orukan̄ igak lek.
18 Ire nje inin̄ emen oron,
ǹkimun̄ ebi oge akọn̄ okpaan̄be elilambe ijot;
ire nyaka ije inin̄ emen ama,
ǹkimun̄ ebi akan̄ okpan̄be elilambe ijot ere.
Ebi nriran mè ebi ngwugwa,
mîfon ido ema ekariọọn̄ge.’ ”
Uriaak isasa ibeek igwagwa
19 Ìre òjijit Juda itele isi ge ni?
Sà ìre Sayọn ìjọjọ owu ejit ni?
Keke orọ mè òtap eji unan,
eyi kpebekọt igwa ita?
Eji ekpọ chieen̄ ikakaan̄ esuuk,
ire, ata inu geege kpunu;
eji ekikpọ chieen̄ ibe ke mgbọ igwagwa mônu,
ire, ìyaka ire uga ufieek-owot!
20 Jei Okumugwem, eji mîriọọn̄ inu ikpak eji erọbe,
mè ijo inu ebi nte nte kiji erọbe;
me atikọ, eji mîrọ owu ijo inu.
21 Mije erieen̄ kwun̄, kajit eji ìtele;
kasa esip ìtet ogboon̄ ubọọn̄ umin kwun̄.
Keek inyan̄a-ibot onyan̄abe melek kiji,
mè kachaka.
22 Ìre îkaan̄ awaji geege me etete
awaji ikike ebi ofifi ido cha
echi òkikọt iria ibot inu?
Ìre akpabin inyọn̄ me lek kan̄ ìkekiseen̄ ibot igwook ni?
Ìre ìkare owu Okumugwem Awaji kiji okiria ibot inu?
Eya orọ, owu ke eji ekikpọ chieen̄,
mije, îre owu okirọ otutuuk inu chi.