Ukwook môkeme ebi Juda
15
Okumugwem onenitumu inyi emi ibe: “Ikerere ibe Mosis mè Samien ekekeke me isi n̄a ikiriaak emi, ejit n̄a ìkpototop me lek ife chi. Rieen̄ ema san̄a emi me isi! Ema eje enan̄a! 2 Ire ema ido owu ibe, ‘Eji ebesibi isi ere owa ni?’ Tumu nyi ema ibe, ‘Okumugwem ìtumu ibe ikeyi:“ ‘Ebi mkpa okupbe inyi, mêgọọk mkpa;
ebi oge akọn̄ okupbe inyi, mêgọọk oge akọn̄;
ebi akan̄ okupbe inyi, mêgọọk akan̄;
ebi usun̄ akọn̄ okupbe inyi, mêgọọk usun̄ akọn̄.’
3 “Okumugwem obebe: ‘Mâria ukpa inu ini ibe inifiat ema. Mâria oge akọn̄ inyi inikpan̄ ema, mè iria ibo inyi inidut ema ije, mè iria unọn òwulu me inyọn̄ melek anam oron geelek òkup me inyọn̄ ijọn̄ yi, inyi enegwak ema, mè ejijaka ema esan̄a. 4 Mije inu Manasi ogwu ubọọn̄ Juda, gwun̄ kè Ejikaya, orọbe me Jeruselem, mârọ ema ekana inu otutuuk linyọn̄ mêtetbe ukpook me lek enenen.’
5 “Jei Jeruselem, ekene oboto owu nsan?
Ekene obofieek ejit inyi owu?
Ekene oboje igba ido owu ubọk lek kwun̄ okupbe?”
6 Okumugwem ìbe, “Owu ojit emi.
Owu òkpọkpọ ikikpebe lek inyi udun̄.
Eya orọ, mânyana ubọk n̄a itoon̄ owu me lek, mè ijijaka owu;
m̀kpayaka ito owu njijin.
7 Mâsa ugen̄ sanasana otu ichibi enyi ifiaak
me otunchit ama geelek òkup me inyọn̄ ijọn̄ yi.
Mârọ ebi n̄a enan bọn, mè ijijaka ema,
mije, ema kpetele ijo oniin̄ cha ema ekigọọk.
8 Mârọ ebi nwakpa kiban̄ ewa enenen
egak achiaan̄ agba awaji;
me ejit ikarek, mâria ogwu mfiat inu
me lek ebi nga nsabọn irieen̄ kiban̄;
uga ufiak mè ikpele ukpook
môrọrọn̄ ikeme ema me uwuuk-lek.
9 Uga òman bọn jaaba môgak iweek,
efuuk môtata me owot.
Ura kan̄ môchep me eden̄ ikarek;
esip môtet ọmọ, ochak môchak ọmọ.
Mâda ebi kiban̄ ìsisik itaak me otu oge akọn̄,
me isi ebi ochicha kiban̄.
Emi Okumugwem ntumu.”
Jerimaya înina lek inyi Awaji
10 Jei nga n̄a, imaman omanbe emi,
ìre kpasi ugwem ke onyi emi ikeyi,
eyi nkanabe ogwu ibaak mè ogwu ifan̄a inyi otutuuk linyọn̄!
Ǹkafọfọọk inu me ubọk ene, ǹkafọfọọk si inu ìnyi ene geege,
ire, otutuuk ene ekifefieek otu inyi emi.
11 Okumugwem onenibe:
“Me atikọ, mâtọn̄ọ owu ito, inyi ata inu ire owu lek;
me atikọ, mârọ ebi ochicha kwun̄ enu mbeek me lek kwun̄,
me mgbọ ùrioon̄ mè mgbọ ufialek.a
12 “Ìre ene môkọt ifan̄a okwukwut melek ekwe
ònan̄a me agan̄ inyọn̄?
13 Mâsa inu ubọọn̄ kinyi mè inu unye otu ewe kinyi inyi ibe efum,
mè ekakpe ewe,
mije otutuuk ijo inu enyi erọbe,
me otutuuk agan̄ geelek me ido kinyi.
14 Mâsa enyi irọ usun̄ inyi ebi ochicha kinyi
me ido enyi ekariọọn̄ge,
mije, uyok uyok unaan̄-ejit n̄a ìbosak kubọk ukan̄,
mè itaka enyi iriọk.”
15 Emi nnenibe, “Jei Okumugwem, owu oriọọn̄ ma;
keek emi, mè kpọ emi chieen̄ me lek;
kpe ebi ìkisisaak emi useen̄ inu ema erọbe emi.
Owu mikime inu ijọn̄ọ mgbọ,
kachieek ibe emi ǹchep;
kawuuk unyechieen̄ mbọkọbe mije kwun̄.
16 Mgbọ otumube ikọ kwun̄ inyi emi,
m̀beben imen itap me owot;
ikọ cha onenire unwọọn̄ mè ubelejit eyi ejit n̄a,
mije, emi ǹkichieek erieen̄ kwun̄,
jei Okumugwem Awaji Ogwukaan̄ Inyọn̄ mè Ijọn̄.
17 Ǹkagọọk urum ebi ochak ìgbaan̄ ìkweek irek,
ǹkagọgọọk si ema ìnwọọn̄ unwọọn̄.
Ǹsisiki ikweek irek emi gaalek ọkpọkpọ,
mije, ubọk kwun̄ òwa me lek n̄a,
melek si, owu otap unaan̄-ejit kwun̄ ijot emi emen.
18 Keke orọ ufiak n̄a ìkakaan̄ itata?
Sà ìre keke orọ unan n̄a ore eyi kpekigwa,
ìkpọkpọ ijit itata?
Me atikọ, ìre owu môfiaan̄ emi ito ni,
kubọk okolo mun̄ okichat ita me emen,
òrere okolo kpekisa itoon̄ ejit?”
19 Eya orọ, Okumugwem ìtumu ibe ikeyi:
“Ire owu ogwu ikom inu,
mâkpọk ito owu me irek kwun̄,
inyi owu òkosi ikwaan̄ ònyi emi;
ire otumu ikọ ògbegbe, ìkare echi njijọ cha,
owu môre ogwu môkitumu ikọ n̄a.
Ife chi ebegwu ikom inu me lek kwun̄,
owu òkpogwu ikom isi lek kiban̄.
20 Mâsa owu irọ mgban ònyenye me lek ife chi,
mgban esabe ekwe inama, mè
itọkọ ikam me lek, inyi inye;
ema mêtim owu akọn̄ me lek,
ire, kpebetim ikpan̄ owu.
Mije, emi òwa melek kwun̄;
mânyan̄a owu, mè itaba owu isibi.
Emi Okumugwem ntumu.
21 Mânyan̄a owu me ubọk ebi ikpak,
mè ifaka owu isibi me ubọk
ebi afa ebi kpekikaan̄ ejit nsan.”