Ufialek môkeme ebi Juda
16
Okumugwem onenitumu inyi emi ibe: 2 “Kado nwa, kaboboon̄ si bọn ebirieen̄ mè ìre bọn ebibaan̄ me ere yi.” 3 Mije, òfo me lek bọn ebirieen̄ mè bọn ebibaan̄ ebi emaan̄be me inyọn̄ ijọn̄ yi, mè ebi nga kiban̄ ìmamaan̄ ema, mè ebi nte kiban̄ ìboboon̄ ema, Okumugwem ìtumu ibe ikeyi: 4 Ema mêkwaan̄ mkpa me ubọk orukan̄. Kpebefieek ejit inyi ema, kpebefufuun̄ si ema. Ema ebebia me ijọn̄ kubọk ifin anam. Ebekwaan̄ me otu oge akọn̄ mè ubọk akan̄; nkwukwu kiban̄ mônenikana inorie inyi unọn òwulu me inyọn̄ mè anam òkup me oron.5 Mije, Okumugwem ìtumu ibe ikeyi: “Kanin̄ uwu geege ekirọ mkpa ene, kagọọk ìsi ìto ito. Kasi ìtoto si ema njijin, mije, nra itaba esuuk n̄a mè imumechieen̄ n̄a mè nsan n̄a isan̄a me lek ife chi. Emi Okumugwem ntumu. 6 Ebi ilile mè ebi ijija mêkwaan̄ me lek ijọn̄ yi. Kpebefuun̄ ema, kpebefefieek si ejit inyi ema. Kpebeseke lek inyi ema, kpebekwọkọ si ijeek inyi ema. 7 Ene geege ikanyi ebi ìkifieek ejit ogwu òkwukwu inorie, inyi erie esa ekat ejit. Ekanyi si ekpen̄ miin̄ geege ibe enwọ esiki ejit, mè ìre nte ene okwu mè ìyaka ire nga ene okwu.
8 “Ofifi kan̄, kasi uwu ekirọ ijọk, mè ìnin̄ ìgọọk ìkweek irek ìrie inorie, mè ìnwọ miin̄. 9 Mije, Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Kpọ, me chieen̄ kinyi mè ukot eyi kinyi, mârọ inyi okput ijọk mè ubelejit, mè ida ogwu òdo nwa mè eyi ogwu òbat olom, ichep me ere keyi.
10 “Osikpa otutuuk inu chi inyi ife chi, mè ema ido owu ibe, ‘Keke orọ Okumugwem otumube ibe ke ikpele ùrioon̄ cha môkeme eji? Keke ke eji erọ ilọ? Kpasi ijo inu ke eji erọ Okumugwem Awaji kiji?’ 11 Owu mônenifọọk ema ibe: ‘Îre bak me lek ebi nte nte kinyi etelebe emi, mè ikana igọọk ofifi awaji isi ikisi ikwaan̄ inyi, mè ikitọbọ ebum inyi, mè ijit emi, mè ijit isusun̄ ikan n̄a. Emi Okumugwem ntumu. 12 Ire, enyi mîrọ inu ikpak igak ebi nte nte kinyi. Ìkpọ-nu inu enyi ekirọ, ogwu ikup olibi ogọọk unye-ibot eyi ejit ijo inu kan̄ okitọ inyi ọmọ, mè òtele igbagban̄ utọn̄ inyi emi. 13 Eya orọ, mâtọọn̄ enyi isibi me lek ijọn̄ yi, isi igwook me lek ijọn̄ eyi enyi mè ebi nte nte kinyi ekariọọn̄ge. Me ere keya, enyi mêsi ikiriaak ofifi awaji cha ikarek mè eririeen̄, mije, m̀kpakaan̄ nsan me lek kinyi kubọk ge.’
Ikpọchieen̄ me emen ufialek
14 “Ubọk geelek si, usen òkinu me isi, mgbọ ebi ene kpebeyaka ikpọk ikitumu ibe, ‘Kè lek ugwem Okumugwem ogwu òsa ebi Ijeren me Ijipiti isibi ika.’ Emi Okumugwem ntumu. 15 Ire, ema mêkibe, ‘Kè lek ugwem Okumugwem, ogwu òsa ebi Ijeren isibi ika inan̄a me ijọn̄ ebi agan̄ inyọn̄ mè otutuuk ido geelek ere îlilababe ema igwook.’ Mije, mâsa ema igwu ikom ika inu me lek ijọn̄ ya nnyibe ebi nte nte kiban̄.
16 “Mgbọ keyi, mâria ikwaan̄ igwen owuwa ebi ìtet irin̄, ibe ekọp ekana eweek ema etet.” Emi Okumugwem ntumu. “Eya isiraka, mâneniria ikwaan̄ igwen owuwa ebi ota, ibe ejijen̄e ekana otutuuk inyọn̄ ogoon̄ geelek mè inyọn̄ orioon̄ geelek, mè emen ǹkororok geelek, esi eweek ema etet. 17 Mije, agan̄ geelek ema enin̄be, chieen̄ n̄a ìgwọgwọk ikikpọ ema. Ema kpelet me chieen̄ n̄a. Ijo inu kiban̄ si ìkalet emi me chieen̄. 18 Mâkpe ema useen̄ mgbọ iba me lek inu ikpak kiban̄ mè ijo inu kiban̄, mije, ema mîsa mbuban mkpọmfaka ebobot kiban̄ cha, òkup kubọk nkwukwu ene kpunube ugwem me emen, ififila inyọn̄ ijọn̄ n̄a, mè isa mkpọmfaka kiban̄ cha, òrere mbuban inu, itaak ijot inyọn̄ ijọn̄ ìrot n̄a.”
Jerimaya îriaak uriaak utoon̄-ejit
19 Jei Okumugwem, owu ore unye n̄a mè uwu mgban akọn̄ n̄a,
ere nkitap ibot me mgbọ uyọrọlek,
ebi ofifi ido mênan̄a me okputut linyọn̄
inu me lek kwun̄ inikitumu ibe,
“Ebi nte kiji kpekaan̄ ìrot geege igak awaji ataak cha,
mkpọmfaka ikike echi ìkanin̄ ema oruru geege.
20 Ìre ene môkọt irọ awaji inyi lek kan̄ ni?
Iin̄, ire, echicha ìkare awaji kubọk ge!”
21 “Eya orọ, mânirọ ema eriọọn̄,
mâsa mgbọ keyi irọ ema eriọọn̄
unye n̄a mè inu ubọk n̄a môkọtbe irọ.
Mgbọ ya, ema mêneniriọọn̄ ibe
ke erieen̄ n̄a ìre Okumugwem.