3 Okumugwem onenido emi ibe, “Jerimaya, keke ke omun̄?”

Mfọfọọk ibe, “M̀mun̄ figi, echi atata ònwọnwọn lek enenen, mè echi ijijo òfafiat enenen, kpebekọt irie.”

4 Okumugwem onenitumu inyi emi ibe: 5 “Okumugwem, Awaji ebi Ijeren, ìtumu ibe ikeyi: ‘Ebi Juda ebi etetbe me usun̄ akọn̄ cha, ebi emi nriabe isan̄a me ere keyi isi ido Babilọn, ema enwọn kubọk atata mfut figi chi. 6 Mânama ema ibene igwuun̄, m̀kpagbugbọ ema igwook; mâwop ema ikeke, m̀kpajibi ema ito. 7 Mânyi ema ejit ema mêsabe iriọọn̄ emi, ibe ke emi nre Okumugwem. Ema mêre ebi n̄a, emi mârere Awaji kiban̄, mije, ema mêka inu me lek n̄a me otutuuk ejit kiban̄.

8 “ ‘Ire, kubọk njijọ figi echi òfafiat enenen cha echi kpebekọt irie cha okupbe, ikeya si ke emi mbarọ Jedikaya ogwu ubọọn̄ Juda inu, ọmọ mè ebi ibot mkpulu kan̄ cha mè ebi Jeruselem ebi ìsisik me lek ijọn̄ keyi, mè ebi ìluk me ijọn̄ Ijipiti. Emi Okumugwem ntumu. 9 Mârọ inyi ema ekana njijọ inu mè inu echacha me lek otutuuk ido geelek me linyọn̄, mè ere si inu esip mè inu ekisa ito urọk, mè inu ochak mè inu mêkifefieek otu inyi me ere geelek mârieen̄be ema isi igwook. 10 Mâria oge akọn̄ mè akan̄ melek ijo orukan̄ igwook ema me lek mege mêjijakabe ema isan̄a me inyọn̄ ijọn̄ ya eyi nnyibe ema mè ebi nte nte kiban̄.’ ”