Jerimaya 25

Usun̄ akọn̄ akọp acha jaaba

Me òso acha ini me lek mkpulu kè Jioyakim gwun̄ kè Josaya ogwu ubọọn̄ Juda, òrere si adasi acha me lek mkpulu kè Nebukadineja ogwu ubọọn̄ Babilọn, Okumugwem onenitumu ikọ inyi Jerimaya ofolek otutuuk ebi ido Juda. 2 Jerimaya ogwu nriran oneniben ikọ ya itumu inyi otutuuk ebi Juda mè otutuuk ebi ìluk me Jeruselem ibe: 3 Bene me òso akọp mè acha ita me lek mkpulu kè Josaya gwun̄ kè Amọn ogwu ubọọn̄ Juda mege inire cherekeyi, akọp acha iba mè ita ire eyi, ikọ Okumugwem okinu inyi emi, mkpọkpọ ikitumu inyi enyi, ire, enyi kpekigban̄.

4 Okumugwem okpọkpọ ikiria otutuuk ebi ikwaan̄ kan̄ ebi nriran inu me lek kinyi, ire, enyi kpenọ, kperaraan̄ si utọn̄ igban̄. 5 Ebi nriran cha ekitumu inyi enyi ibe, “Ene geelek igwu ikom me ijo oniin̄ kan̄ mè ijo eru kan̄, inyi enyi eluk me lek ijọn̄ eyi Okumugwem onyibe enyi mè ebi nte nte kinyi ire mgbọ geelek, mgbọ geelek. 6 Ikagọọk ofifi awaji cha, ikasi ìrọ ikwaan̄ ìnyi ema mè ìtọbọ ebum ìnyi ema, inyi enyi ekasa inu enyi esabe ubọk kinyi irom cha ìtap emi unaan̄-ejit, mè emi si nkarọ enyi ijo inu.”

7 “Ire, enyi kpegban̄ ikọ n̄a, enyi esasa inu ubọk kinyi orombe cha itap emi unaan̄-ejit, mè isa ijo inu ijet lek kinyi. Emi Okumugwem ntumu.”

8 Eya orọ, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Mije enyi kpegban̄ ikọ n̄a, 9 mâniria ikwaan̄ igwen otutuuk otoko ebi agan̄ inyọn̄, mè ogwu ikwaan̄ n̄a, Nebukadineja, ogwu ubọọn̄ Babilọn inu. Mâsa ema inijijaka lek ijọn̄ yi, mè isa ema itim akọn̄ me lek ebi ìluk me lek ijọn̄ yi, mè isa ema si itim akọn̄ me lek ido chi òluluk ikana ere yi okokop. M̀bajijijaka ema isan̄a kpai, mè irọ ibe ema ekana inu urimi mè inu ochak, ijọn̄ kiban̄ môkakana ǹrioon̄ ire mgbọ geelek. Emi Okumugwem ntumu. 10 Mâchit okput unwọọn̄ mè ubelejit, mè okput aya olom mè aya nwa, mè okput ewuuk ikọk-akpa, mè ichit si utoon̄ mkpukan̄, inyi ikayaka ìkup me inyọn̄ ijọn̄ kinyi. 11 Otutuuk lek ijọn̄ yi ìboyayat ita, mè ikup ukpọk ukpọk, otutuuk ebi ido chi geelek mêkakana usun̄ inyi ogwu ubọọn̄ Babilọn akọp acha jaaba.

12 “Ire, akọp acha jaaba ya isiso, emi mânenisulu ogwu ubọọn̄ Babilọn mè ido kan̄ mè otutuuk lek ijọn̄ ebi Babilọn osusut, mije ijo inu kiban̄, mè ijijaka ijọn̄ ido Babilọn isan̄a ire mgbọ geelek. Emi Okumugwem ntumu. 13 Otutuuk inu ntumube ikeme ido ya, otutuuk inu egebe me ikpa keyi echi Jerimaya obenbe me nriran ikeme otutuuk ido cha geelek, m̀barọrọ iso kwok kwok me lek ido ya. 14 Mije, ema si mênin̄ usun̄ inyi owuwa ido mè ikpele ebi ubọọn̄; mârọ ema useen̄ ikpọ me lek irọrọ kiban̄ mè ubọk ikwaan̄ kiban̄.”

Ekpen̄ unaan̄-ejit Awaji

15 Okumugwem, Awaji ebi Ijeren ìtumu inyi emi ibe ikeyi: “Bọkọ ekpen̄ yi me ubọk n̄a, eyi miin̄ uyok uyok unaan̄-ejit n̄a ojotbe emen, sa si nyi ebi otutuuk ido nriabe owu isi lek, inyi ema otutuuk enwọ eso. 16 Ema isinwọ, mêkigbugbe, mè ikirama iraak, mije oge akọn̄ echi mâriabe itap me etete kiban̄.”

17 Ikeya ke nnibọkọ ekpen̄ ya me ubọk Okumugwem, mè isa inyi otutuuk ido Okumugwem oriabe emi isi lek, ema enwọnwọ iso. 18 Nnyi Jeruselem mè ama ebi ido Juda cha geelek, mè ebi ubọọn̄ kiban̄ mè ebi ibot mkpulu kiban̄, ema enwọnwọ, mè ikana ǹrioon̄, mè inu urimi, mè inu ochak, mè inu ekifieek otu inyi, kubọk ema erebe chereyi. 19 Nnyi ogwu Fero ogwu ubọọn̄ Ijipiti, mè ebi ikwaan̄ kan̄ melek ebi ibot mkpulu kan̄ mè otutuuk ebi kan̄, 20 mè inyi si otutuuk ebi ichen ìkup me ido ya; otutuuk ebi ubọọn̄ ido Usu; mè otutuuk ebi ubọọn̄ ido Filisia mè ama Asikelọn mè Gaja, mè Ekurọn, mè ebi ìsisik me Asidọdu. 21 Nnyi si ebi Edọm, mè ebi Mowabu mè ebi Amọn; 22 mè otutuuk ebi ubọọn̄ ama Taya mè ebi ubọọn̄ ama Sidọn; mè ebi ubọọn̄ ido agba okwaan̄ me usaba okwaan̄. 23 Nnyi si ebi lek ijọn̄ Dedan mè Teyima mè Buju mè otutuuk ebi ìkup me ujọn̄ọ ujọn̄ọ ere; 24 mè otutuuk ebi ubọọn̄ Arebia mè otutuuk ebi ubọọn̄ ebi ichen ìluk me emen èwê. 25 Nnyi si otutuuk ebi ubọọn̄ Jimiri, mè otutuuk ebi ubọọn̄ Elam, mè otutuuk ebi ubọọn̄ Midia; 26 mè inyi si otutuuk ebi ubọọn̄ agan̄ inyọn̄, ebi ìkukup igbet mè ebi ìkukup ijọn̄ọ ere, ge inwọ isan̄a, ogwulọ ònwọ. Otutuuk ido geelek me linyọn̄ mînwọ iso. Ogwu ubọọn̄ ido Sisak^a onwọ me òta, mgbọ otutuuk ene enwọbe isan̄a.

27 “Tumu nyi ema ibe: ‘Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Ìnwọ miin̄ ekpen̄ unaan̄-ejit n̄a, mè ìnwọ ìsa, mè ìgbọ, mè ìnan̄a ìrọn̄, ikayaka ìnan̄a ìkeke, bak me lek oge akọn̄ mâriabe itap me etete kinyi.’ 28 Ire, ire ema ijit ibọbọkọ ekpen̄ ya me ubọk kwun̄ inwọ, tumu nyi ema ibe, ‘Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Enyi ekaan̄ inwọnwọ miin̄ ekpen̄ unaan̄-ejit yi! 29 Ìkpọ, ùrioon̄ n̄a îra ibebene me lek ama òkichieek erieen̄ n̄a. Eya orọ, enyi ikakeek ibe ke osusut ìkpore enyi lek. Me atikọ, osusut môre enyi lek, mije, nra igwegwen oge akọn̄ itap me lek otutuuk ebi ìluk me linyọn̄. Emi Okumugwem Ogwukaan̄ Inyọn̄ mè Ijọn̄ ntumu.” ’

30 “Owu môben nriran itumu otutuuk ikọ kechi ikeme ema, mè itumu inyi ema ibe:

“ ‘Okumugwem môkup me inyọn̄ ikigbin;

môkup me ere mbuban îkiluk isook ida,

mè ikigbin ebi linyọn̄ unye unye.

Ọmọ môtaan̄ ukpo itumu ikọ

ikeme otutuuk ebi ìluk me linyọn̄,

kubọk ukpo ebi ìkijak gerep.

31 Okput ukpo kan̄ môtaan̄ ire

ntutun̄ ere geelek me linyọn̄,

mije, Okumugwem îkaan̄ ikọ melek ebi ido geelek;

môsibi oyerebet inyi otutuuk ebilene,

mè isa oge akọn̄ ikpan̄ ebi ikpak.

Emi Okumugwem ntumu.’ ”

32 Okumugwem Ogwukaan̄ Inyọn̄ mè Ijọn̄ ìtumu ibe ikeyi:

“Ìkpọ! Ùrioon̄ òkibumu inin̄ otutuuk ere,

me ido me ido;

ikpele egwijo òkijibi inu,

inan̄a me ntutun̄ ere geelek me linyọn̄.”

33 Me mgbọ keya, ebi Okumugwem môkpan̄be ebebabaan̄ ichit ere geelek, ibene me okputut linyọn̄ agan̄ ge isi ire okputut agan̄ keyilọ. Kpebeto ito kiban̄, kpebekpulu ema ititiin̄, kpebefufuun̄ si ema, ire, ema ebebat ibia ikeya me ijọn̄ kubọk ifin anam.

34 Enyi ebi òkpukpo arọọn̄, ìtaan̄ ukpo ìto ito,

enyi ebi ibot urum arọọn̄, ìfufuku me ntọn̄;

mije, usen ebekpan̄ enyi mè iyiyala enyi îra ire,

enyi mêrurọn̄ọ ikpọk isan

kubọk unye otu ewe ugọn̄ arika.

35 Ebi òkpukpo arọọn̄ kpebemun̄ ere ebelibi inin̄,

ebi ibot urum arọọn̄ kpebekaan̄ ere ebetap ibot inwọnọ.

36 Ìgban̄ ida ukpo ebi òkpukpo arọọn̄ ekitaan̄,

mè ito ebi ibot urum arọọn̄ ekidimi,

mije, Okumugwem îjijaka ijọn̄ urie anam kiban̄ igwook.

37 Mîjijaka ijọn̄ urie kiban̄ cha òkup me esuuk isan̄a kpai,

bak me lek uyok uyok unaan̄-ejit Okumugwem.

38 Egbe àtat îsibi me emen okpot kan̄,

ijọn̄ kiban̄ olalaak ukpọk ukpọk,

mije oge akọn̄ ogwu òtutuku ene,

mè uyok uyok unaan̄-ejit Okumugwem.