Ebi Ijeren mêka inu ido kiban̄
31
Okumugwem onenibe, “Mgbọ ya isire, mâre Awaji otutuuk ototun̄ ukan̄ ebi Ijeren, ema mêrere ebi n̄a.”2 Okumugwem ìtumu ibe ikeyi:
“Ebi ìnwọnwọnọ me otu oge akọn̄,
mêmun̄ nnwọn me emen èwê;
emi mânu ininyi ebi Ijeren isiki-efuuk.”
3 Okumugwem îkana isibi me lek kiji me mgbọ òraraka, mè ikibe:
“Imumechieen̄ nkaan̄be me lek
kinyi ìre eyi ikakaan̄ge itata;
ǹsa ejit imumechieen̄ mgbọ
geelek itaba enyi iriaak me lek n̄a.
4 Owu Ijeren, ogwu òbet lek
obaak enenwaan̄ ikariọọn̄ge enerieen̄,
mâkpọk owu inama,
owu mônenire ogwu ekpọkbe inama.
Owu môkpọk ikpulu ekpete kwun̄ isibi,
isa igọọk ebi ìkinwọọn̄ unwọọn̄ isi ikijop okwa.
5 Owu môkpọk iwop uko gerep
me inyọn̄ ogoon̄ Sameria;
ebi ìwop uko ebewop uko gerep cha,
mè irie mfut kiban̄ ibubeek.
6 Mije, usen ge òkinu, mgbọ ebi ìkibem ere
mêtaan̄be ukpo me inyọn̄ ogoon̄ Iferem, ibe:
‘Ìna mè eji enene esi Sayọn,
esi lek Okumugwem Awaji kiji.’ ”
7 Okumugwem ìtumu ibe ikeyi:
“Ìkọt okwa me ubelejit ìnyi Jekọp;
ìtaan̄ ukpo unwọọn̄ ìnyi ido òmimin ichit.
Ìtaan̄ ukpo unwọọn̄ mè itọn̄ ìbe,
‘Jei Okumugwem, nyan̄a ebi kwun̄,
nyan̄a ebi kwun̄ ebi Ijeren ebi ìsisik.’
8 Ìkpọ, mânisa ema inan̄a me ijọn̄ agan̄ inyọn̄ ika,
mè ikpulu ema me ntutun̄
ere geelek me linyọn̄ inigwook.
Ebi ǹnàan̄ mè ebi akọọk mêkup me lek,
mè ebi nwa-owot mè ebibaan̄ ebi uman okifiak;
ikpele urum ene mêka.
9 Ema mêsa ito me chieen̄ ikika;
ema mêkiriaak uriaak mgbọ mâkisa ema ije.
Mâsa ema ije me lek ibot mun̄,
mè lek oniin̄ òrọrọt, inyi ema ekatọbọ ukot,
mije, emi nre nte kè Ijeren,
Iferem orere adasi gwun̄ enerieen̄ n̄a.
10 “Enyi ebi ido geelek, ìgban̄ ikọ Okumugwem;
ìlook me lek achọ geelek òjọjọn̄ọ ere,
ìtumu ìbe: ‘Ogwu òyiyiyala
ebi Ijeren môgbaan̄ ema ititiin̄,
mè ikpukpo ema kubọk
ogwu òkpukpo arọọn̄
okikpukpo urum arọọn̄ kan̄.’
11 Mije, Okumugwem îkpe ewe ibot kè Jekọp,
mè ifaka ọmọ isibi me ubọk
ogwu ònyenye lek igak ọmọ.
12 Ema mênu me inyọn̄ ogoon̄ Sayọn inikọt okwa;
ema mêbele ejit me lek ogbogbo
ata inu Okumugwem mônyibe ema,
ebi kè akpa, mè aya miin̄, mè aya aran̄,
melek bọn arọọn̄ mè bọn eriembuuk.
Ema mêkup kubọk uko egwookbe mun̄ iso me lek,
kpebeyaka ikup me ufieejit ofifi.
13 Obaak ebibaan̄ mêjop okwa ubelejit,
nsabọn irieen̄ mè ebi ugane mêgọọk inwọọn̄ unwọọn̄.
Mânwene ufieejit kiban̄ ikana ubelejit;
mâsiki ema ejit, mè inyi ema unwọọn̄ me useen̄ ufieejit.
14 Mânyi ebi ngwugwa inu iwa, inyi erie ejot,
ata inu n̄a môjojot ebi n̄a owot.
Emi Okumugwem ntumu.”
15 Okumugwem ìtumu ibe ikeyi:
“Mînọ ida ge okitaan̄ ukpo me Rama,
mè ikifieek ejit, mè ikito ito enenen.
Rechen òkito ito mije bọn kan̄ ìkwakwaan̄ ita.
Ìkachieek ibe ekat ọmọ ejit,
mije, nsabọn kan̄ kpeyaka ikup me ugwem.”
16 Okumugwem onenitumu ibe ikeyi:
“Gele ida, kayaka ìto ito,
tuku mun̄ ito san̄a me chieen̄,
mije, mêkpe owu mkpukpe ikwaan̄ kwun̄.
Bọn kwun̄ mênan̄a me ido ogwu ochicha kiban̄ ika.
Emi Okumugwem ntumu.
17 Ikpọchieen̄ ọmọ òwa inyi owu mgbọ òkup me isi.
Bọn kwun̄ mêka inu me lek ijọn̄ kiban̄.
Emi Okumugwem ntumu.
18 Me atikọ, nnọ Iferem okinina lek ibe:
‘Owu onyi emi osusut, osusut otetet emi lek,
kubọk gwun̄ eriembuuk eyi ìkasi-nu ikwaan̄ ìraka lek.
Kpọk bọkọ emi tap, ke mâgwu ikom ika igọọk owu,
mije, owu ore Okumugwem Awaji n̄a.
19 Me atikọ, njit owu itele,
mè iyaka igwu ikom inu;
mgbọ nnigobo itet,
nyayaka ubọk ikat me lek.
Esip otetet emi, ochak ochachak emi,
mije, esip karake mgbọ
nsabọn irieen̄ n̄a ke nkibeme.’
20 Ìre Iferem ìkafat ìre gwun̄ n̄a enerieen̄ ni?
Ìre ìkare ọmọ ore gwun̄ n̄a
enerieen̄ ya ogwu mmabe ni?
Ubọk geelek nkitumu ikọ ikeme ọmọ owuwa mgbọ,
ejit n̄a ìkanan̄a me lek kan̄.
Eya orọ, òkilọk emi imumun̄ ọmọ;
mâkaan̄ ọmọ nsan me lek.
Emi Okumugwem ntumu.
21 Ìbeen̄ uwot ekisa iriọọn̄ oniin̄ ìgwuun̄,
ìgwugwuun̄ egbe me oniin̄ ìsa iriọọn̄ agan̄,
ìtet chieen̄ me lek uga oniin̄,
oniin̄ ya enyi ejebe me lek.
Owu Ijeren òbet lek obaak
enenwaan̄ ikariọọn̄ge enerieen̄,
gwu kom ka,
gwu kom ka na ama kwun̄.
22 Ìre owu òbonyinya ikana isi ire mgbọ owa,
owu gwun̄ enenwaan̄ ogwu isi ìkakikeke me ere ge?
Mije, Okumugwem îra irom ayaya inu me linyọn̄,
enenwaan̄ môkana okwukwek inyi enerieen̄.”
Awaji môsa ebi kan̄ inan̄a me usun̄ akọn̄ ika
23 Okumugwem Ogwukaan̄ Inyọn̄ mè Ijọn̄, Awaji ebi Ijeren ìtumu ibe ikeyi: “Mgbọ nsisa ebi ìkup me usun̄ akọn̄ igwu ikom ika, ebi lek ijọn̄ Juda mè ebi ama ebi Juda geelek mêyaka ikpọk ikitumu ibe: ‘Kè Okumugwem igbana owu, owu ere nluk eyi ata irọrọ, mè ogoon̄ mbuban.’ 24 Ebi ene mêgbaan̄ iluk me Juda mè otutuuk ama kiban̄ geelek, ebi uko mè ebi ìkisa urum arọọn̄ kiban̄ ije ikana ere. 25 Mâtap ebi lek owọbe ayaya efuuk me emen, mè irọ owot ijot ebi ìgagak iweek.” 26 Mgbọ yaage, mbobolo chieen̄, mè ikpọ ikana ere, ilaak n̄a ototop emi me lek.
27 Okumugwem onenibe, “Usen òkinu, mgbọ mârọbe inyi ebilene melek anam etibi esibi ewa enenen me uwu kè Ijeren mè uwu kè Juda kubọk ewowop. 28 Ike mkpọbe ema chieen̄ me lek, inyi ejibi ema esan̄a, mè egwak egwook, mè egbugbọ, mè ejijaka, mè esa ùrioon̄ etoon̄ ema, ikeya si ke mbakpọ ema chieen̄ me lek, inyi enama ema, mè ewop ema. Emi Okumugwem ntumu.” 29 Me usen cha, ebi ene kpebeyaka ikitumu ibe,
“Ebi nte nte kiban̄ elaka agburu ulaja,
ke ajiji otet ebi bọn me ebon ejeek.”
30 Kpan̄asi ikeya, ene geelek ìbokwu mkpa ijo inu kan̄. Ogwu òlaka agburu ulaja, ogwugwa ke ajiji obotet me ebon ejeek.
Okumugwem môrọ ayaya inyan̄a-ibot melek ebi Ijeren mè ebi Juda
31 Okumugwem onenitumu ibe, “Mgbọ òkinu,
mgbọ mânyan̄abe ibot eyi ayaya
melek ebi uwu kè Ijeren
mè ebi uwu kè Juda.
32 Inyan̄a-ibot keyi ìkpokup kubọk inyan̄a-ibot
eyi nnyan̄abe melek ebi nte nte kiban̄,
me mgbọ ntetbe ebi nte nte kiban̄ me ubọk,
mè isa ema ije isibi me Ijipiti;
ema efafiat inyan̄a-ibot n̄a keya,
ubọk geelek emi nkupbe kubọk olom inyi ema.
Emi Okumugwem ntumu.
33 “Inyan̄a-ibot mânyan̄abe melek ebi uwu kè Ijeren mgbọ usen cha isiraka ìre ikeyi:
“Mâtap ikan n̄a me ekiket kiban̄
mè ige itap me ejit kiban̄.
Emi mâre Awaji kiban̄,
ema mêrere ebi n̄a.
Emi Okumugwem ntumu.
34 Ene geege ìkpoyaka ijeen̄ ogwu melek kan̄ ibe iriọọn̄ emi,
kpunu si ogwu òboyaka ijeen̄ ogwu ngwan̄ ibe,
‘Riọọn̄ Okumugwem,’
mije, ema otutuuk ene mêriọọn̄ emi,
bene me lek ogwu òsisip ichit,
si re lek ogwu òmimin ichit.
Mije, mâtele nrọ-nlọ kiban̄ inyi ema,
m̀kpayaka ikeek si ijo inu kiban̄ ofifi.”
Ogwukaan̄-ene ìkpotele ebi Ijeren
35 Okumugwem ogwu òtoto ura
ibe ikitoon̄ me ikarek,
mè itọ onyan̄ mè ntoronyan̄
ibe eketoon̄ me eririeen̄,
ogwu òkifuku mun̄ okwaan̄ ibene,
inyi ekoon̄ kan̄ ikigbugbut,
Okumugwem Ogwukaan̄ Inyọn̄ mè Ijọn̄ ore erieen̄ kan̄;
Okumugwem ìtumu ibe ikeyi:
36 “Îtata inu kechi ntọbe ìkayaka ìkup me isi n̄a ubọk ntobe,
mgbọ ya ke ebi owot iman kè Ijeren
kpebeyaka ire ido me isi n̄a.
Emi Okumugwem ntumu.”
37 Okumugwem ìtumu ibe ikeyi:
“Îtata isikọt itọ akpabin inyọn̄,
mè ikọt iweek ọdọ irak linyọn̄ iriọọn̄,
ke emi mbajit otutuuk ebi owot iman kè Ijeren
mije otutuuk inu ema erọbe.
Emi Okumugwem ntumu.
38 “Usen òkinu, mgbọ mêkpọkbe ama yi inama inyi emi, ibene me Uwu-oket Ananeli isi ire Otunchit Ibot Usọk. 39 Mêbene me ere keya itaba olik itọ-inu-itat isi itoon̄ me lek orioon̄ Garebu, mè iben ikana ifo Gowa. 40 Otutuuk iteke ijọn̄ ere ekifiin̄ nkwukwu ene mè ntọn̄ ngwugwa, mè otutuuk ijọn̄ uko ikwala ikwala òkukup mege isi ire iteke Kidọrọn me agan̄ mbum-ura, isi ire otu usọk Otunchit Inyinya, otutuuk ere cha ìbokup me mbuban inyi Okumugwem. Kpebeyaka ikpọk ijibi ama ya isan̄a me akpat, kpebeyaka ikpọk igbugbọ si ama ya igwook ofifi, mege ire mgbọ geelek.”