6 Jerimaya obebe, “Okumugwem ìtumu inyi emi ibe: 7 Kpọ Anameli, gwun̄ kè Salum ngwan̄ nte kwun̄, mônu me lek kwun̄ inibe, ‘Na lep ijọn̄ uko n̄a òkup me Anatọt, mije, îre owu okaan̄ unen ilelep ijọn̄ uko ya, mè ifaka ijọn̄ ya isibi.’

8 “Kubọk Okumugwem otumube si, Anameli, gwun̄ ngwan̄ nte n̄a ya, onunu me lek n̄a me oyet egep ebi mbem ya, mè inibe emi, ‘Na lep ijọn̄ uko n̄a òkup me Anatọt me agan̄ ijọn̄ ebi otoko kè Benjamin, mije, unen ikakaan̄ ijọn̄ uko ya me ìrot, mè unen ifafaka isibi ìtat owu me isi. Bọkọ lep nyi lek kwun̄.’

“Nriọọn̄ ibe ke îre ikọ Okumugwem ya ire eya; 9 eya orọ, mbọbọkọ ijọn̄ uko ya òkup me Anatọt ilep me ubọk kè Anameli, gwun̄ ngwan̄ nte n̄a, mè ifuk akọp mè ikpoko alata okuket jaaba isa ikpe ewe. 10 Nnenige inu ya itap me ikpa ulep, mè itap ubọk me ikpa, mè ikat, mè igon iman̄ òriọọn̄ me lek, mè ikaan̄ ebi ata-ikọ, mè inisa otitọ itọ ikpoko ya inyi. 11 Nnenimọnọ ikpa ulep ijọn̄ ya, eyi ekatbe, mè igon iman̄ òriọọn̄ me lek ya, eyi egebe otutuuk ikan mè orọmijọn̄ ilelep ijọn̄ ya me emen, melek eyi kpekat, 12 mè inisa iba cha inyi Baruk gwun̄ kè Neriya gwun̄ kè Mayaseya me isi kè Anameli gwun̄ ngwan̄ nte n̄a, mè isi ebi ata-ikọ ìtatap ubọk me ikpa ulep ya, mè isi otutuuk ebi Ju ìkwekweek irek me oyet egep ebi mbem ya.

13 “Nneninyi Baruk nteme, me isi otutuuk kiban̄ cha, ibe: 14 ‘Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Bọkọ ikpa ulep chi, eyi ekatbe mè igon iman̄ òriọọn̄ me lek, mè eyi kpekat; tap ema me emen otin̄ ibat, inyi mêkup ijọn̄ọ mgbọ. 15 Mije, Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Mêyaka ikpọk ikileen̄ uwu mè ijọn̄ uko mè uko gerep me lek ijọn̄ keyi.’ ”

16 “Mgbọ nsabe ikpa ulep ya inyi Baruk gwun̄ kè Neriya isan̄a, nneniriaak uriaak igwen Okumugwem itumu ibe:

17 “Jei Ogwukaan̄-ene Okumugwem, owu osa me unye ubọk kwun̄ melek ikpele unye kwun̄ irom inyọn̄ mè ijọn̄. Kpunu inu geege òkiyọt igak owu irọrọ. 18 Owu okikaan̄ imumechieen̄ me lek obop obop ebi ene, mè ikisa mkpukpe ijo inu ebi nte nte ikikpe inyi bọn bọn kiban̄ ebi ìgọgọọk ema me udun̄. Jei Awaji ogwu òmimin mè ikaan̄ unye, Okumugwem Ogwukaan̄ Inyọn̄ mè Ijọn̄ ore erieen̄ kwun̄! 19 Otitọt kwun̄ mimin, ikwaan̄ kwun̄ îkaan̄ mgbugbo. Chieen̄ kwun̄ ìbobook ikimọọn̄ otutuuk inu bọn ebilene ekirọ; owu òkikpe ene geelek mkpukpe ikpọ me lek eru kan̄ mè ubọk ikwaan̄ kan̄. 20 Owu orọ owuwa inu ukechieen̄ mè uyeke uyeke inu me Ijipiti, mè ikirọ si ire chereyi me Ijeren, mè etete ebilene geelek; mè isa me ikeya ikaan̄ erieen̄ òkitaan̄ etip ire chereyi. 21 Owu osa me owuwa inu ukechieen̄ mè uyeke uyeke inu isan̄a ebi kwun̄, ebi Ijeren, isibi me Ijipiti sa me unye ubọk kwun̄ melek ikpele unye kwun̄ mè ikpele ukpook. 22 Owu osa ijọn̄ keyi inyi ema, ata ijọn̄ òkisibi anam mè mfut uti, eyi owu onyan̄abe ibot inyi ebi nte nte kiban̄ ibe ke owu mônyi ema. 23 Ema enunu inibọkọ ijọn̄ ya isak. Ire, ema kpegban̄ ida kwun̄; kpesun̄ ikan kwun̄. Otutuuk inu otọbe inyi ema ibe erọ, ema kperọ inu geege me lek. Eya orọ, owu osasa ùrioon̄ kechi geelek inikeme ema.

24 “Kpọ ma, mêkinama obubot mbin akọn̄ isasa inibọkọ ama yi. Sa me oge akọn̄ mè akan̄ mè ijo orukan̄, mêyaka ama yi itap me ubọk ebi Babilọn ebi ìkitim akọn̄ me lek ama yi. Inu owu otumube ya îrọ iso, owu okekimun̄. 25 Îre owu Ogwukaan̄-ene Okumugwem otumu inyi emi ibe, ‘Sa ikpoko alata okuket lep ijọn̄ uko ya, mè kaan̄ ebi ata-ikọ.’ Ire, mîkana ama yi itap me ubọk ebi Babilọn.”

26 Mgbọ ya, Okumugwem onenitumu inyi Jerimaya ibe: 27 “Kpọ, emi nre Okumugwem, Awaji otutuuk ebilene. Ìre îkaan̄ inu geege eyi emi m̀kpakọt irọ ni? 28 Eya orọ, Okumugwem ìtumu ibe ikeyi: ‘Kpọ, mâniyaka ama yi itap me ubọk ebi Babilọn, mè ubọk kè Nebukadineja ogwu ubọọn̄ Babilọn, ọmọ môtitim akọn̄ ibọkọ ama yi. 29 Ebi Babilọn ebi ìkitim akọn̄ me lek ama yi, mênin̄ ama yi, mè ichim ukan̄ itap me lek ama yi, mè iwọp iriọk; mêwọp si uwu cha echi ekikup me inyọn̄ otoon̄-uwu cha iwọp nsensi inyi Baali, mè ikigwa ngwugwa miin̄ egwogwook inyi ofifi awaji cha, isa ikirọ inyi ejit inaan̄ emi.

30 “ ‘Akarake ema erebe nsabọn irieen̄, ijo inu ijo inu ke ebi Ijeren mè ebi Juda ekirọ me isi n̄a, kperọ inu geege igak echicha. Me atikọ, kpunu inu ebi Ijeren ekirọ igak isasa ijo ubọk irọ-inu kiban̄ itap emi unaan̄-ejit. Emi Okumugwem ntumu. 31 Mije, bene me usen enamabe ama yi na re mgbọ keyi, ama yi ìkitap emi unaan̄-ejit, mè ikirọ mè ǹnaan̄ ejit uyok uyok; eya orọ, m̀basasan̄a ọmọ isan̄a me chieen̄ n̄a. 32 Ebi Ijeren mè ebi Juda mîrọ ejit inaan̄ emi bak me lek otutuuk ijo inu ema ekirọ, ema melek ebi ubọọn̄ kiban̄ mè ebi ibot mkpulu kiban̄, mè ebi ngwugwa kiban̄ mè ebi nriran kiban̄, mè ebi Juda melek ebi ìluk me Jeruselem. 33 Ema ejijit emi itele, kpeyaka isi ikweek emi. Ubọk geelek mkpọkpọ ikijeen̄ ema inu, ema kpekigban̄, kpekibọkọ si nteme. 34 Ema esa òchichaka inu kiban̄ iniyik me emen uwu òkichieek erieen̄ n̄a, mè ififila uwu ya. 35 Ema mînama isi-ijọn̄ inyi Baali me lek iteke Ben Inọm, isa ikiwọp bọn ebirieen̄ kiban̄ mè bọn ebibaan̄ kiban̄ me ukan̄ inyi Molek, inu eyi ǹkanyinyi ema ida ibe erọ, ìkaninin̄ si emi me ejit ibe ema erọ mbuban inu òkup ikeya esa eda Juda etap me ijo inu.

36 “ ‘Enyi ekitumu ibe, “Sa me oge akọn̄ mè akan̄ mè ijo orukan̄, mêyaka ama yi itap me ubọk ogwu ubọọn̄ Babilọn.” Ire, ofolek ama yi, mgbọ yi, Okumugwem, Awaji ebi Ijeren, ìtumu ibe ikeyi: 37 Emi m̀kpalọlọ isasa ema ika inan̄a me otutuuk ido cha geelek ere nrieen̄be ema isi igwook, sa me unaan̄-ejit n̄a, mè ejit n̄a òyoyok, mè uyok uyok unaan̄-ejit na. Mâsa ema ika inu me ere keyi, mè irọ ema eluk me utelelek. 38 Ema mêre ebi n̄a, emi mârere Awaji kiban̄. 39 Mânyi ema ejit ge mè irọrọ ge, inyi ema mêkitet emi ukpook me lek mgbọ geelek, inyi inu môkije ijaan̄ ema me lek, mè ije si ijaan̄ me lek nsabọn kiban̄ ebi mênube me udun̄ kiban̄. 40 Mânyan̄a ibot melek kiban̄, eyi môkupbe ire mgbọ geelek. Emi m̀kpatele ikekirọ nnwọn inyi ema; mârọ ibe ema eketet emi ukpook me lek, inyi ema ekayaka ìjuuk emi ìtele mgbọ geege. 41 Mâbele ejit ikirọ nnwọn inyi ema, m̀kpalọlọ isasa otutuuk ejit n̄a mè otutuuk ibot ejit n̄a ikpulu ema inigwook me lek ijọn̄ yi.

42 “ ‘Okumugwem ìtumu ibe ikeyi: Ike nsabe otutuuk ikpele ùrioon̄ kechi initoon̄ ife chi, ikeya si ke mbasa otutuuk ata inu cha nchieekbe ema use ijet ema. 43 Ebi ene mêyaka ikpọk ikileen̄ ijọn̄ uko me lek ijọn̄ keyi eyi enyi ekitumu ibe: “Îre ere òyayat, kpunu ebilene, kpunu anam, mije, mîyaka itap me ubọk ebi Babilọn.” 44 Mêyaka ikpọk isa alata okuket ikileen̄ ijọn̄ uko, mè itap ubọk me ikpa ulep, mè ikat, mè igon iman̄ òriọọn̄ me lek, mè ikaan̄ ebi ata-ikọ igbaalek. Îre me lek ijọn̄ ebi otoko kè Benjamin, mè bọn ama òkup ikana Jeruselem, mè ama ebi otoko kè Juda, mè ama inyọn̄ ogoon̄, mè ama inyọn̄ orioon̄ isi ogoon̄ agan̄ ichep-ura, mè ama emen èwê agan̄ osiki ke ebekileen̄ ijọn̄ uko chi, mije, mâsa ebi kiban̄ ìkup me usun̄ akọn̄ igwu ikom ika. Emi Okumugwem ntumu.’ ”