Etip ofolek ebi Filisia
47
Sabum ogwu Fero onitim akọn̄ me lek Gaja, Okumugwem îtumu ikọ inyi Jerimaya ogwu nriran ofolek ebi Filisia ibe,2 Okumugwem ìtumu ibe ikeyi:
“Ìkpọ, mun̄ òkibaak iwuku inan̄a me agan̄ inyọn̄ inu;
môkana unye ukot mun̄ môbaakbe imeen̄ ere.
Mômeen̄ lek ijọn̄, mè imeen̄ inu geelek òkup me inyọn̄ ijọn̄;
mômeen̄ ama, mè imeen̄ ebi ìluk me emen ama cha.
Ebi ene mêkitaan̄ ukpo;
otutuuk ebi ìluk me lek ijọn̄ ya mêto ito
3 mgbọ ema mênọbe ida ukot
inyinya akọn̄ okisisik ijọn̄ ikinu,
mè ida okput owuwa uji akọn̄ okigba ikwak ikinu,
mè ida okput ekpirikpo uji akọn̄ okigbugbut inu.
Ebi nte nsabọn kpebeyaka chieen̄ inyi udun̄
itap ubọk inyi bọn kiban̄;
bak me lek, ubọk kiban̄ ìbowọwọ idek.
4 Mije, usen ya îre,
usen ebejijaka otutuuk ebi Filisia,
mè ijijaka otutuuk ebi ìsisik
ebi mekọtbe itap ubọk inyi Taya mè Sidọn.
Okumugwem mônijijaka ebi Filisia
ebi ìsisik me agba okwaan̄ me achọ Kafitọ.a
5 Ebi ama Gaja mêkup me ufieejit;
otu ebi ama Asikelọn ìbochichit,
kpebekọt isan̄a amọn.
Enyi ebi ìsisik me lek òla ijọn̄,
ìre mgbọ owa ke enyi ebekikeen̄ lek kinyi ire?”
6 Enyi mêkito ito ibe, “ ‘Jei, oge akọn̄ Okumugwem,
ìre mgbọ owa ke owu obowọ efuuk ni?
Gwu kom nin̄ emen ogan kwun̄;
tap efuuk nu, mè kup dii.’
7 Ire, ìbojeje itap efuuk,
me mgbọ Okumugwem onyibe ọmọ ida?
Okumugwem ìnyi ọmọ ida ibe isi akọn̄
me lek ebi Asikelọn melek ebi agba okwaan̄.”