Etip ofolek Mowabu
48
Ofolek Mowabu, Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi:“Môfieek inyi ama Nebo, mije, mêjijika ọmọ igwook,
mêrọ ama Kiriatayim inu esip, mè ibọkọ;
mêrọ uwu mgban akọn̄ ya inu esip, mè igbugbọ igwook.
2 Kpebeyaka ikpọk itọn̄ Mowabu ofifi;
ebi ene ebekup me Esibon ikito okpin inyi ọmọ ibe:
‘Ìna, eji enechep ido ya dìp dìp.’
Owu si, ama Madimen, otu kwun̄ môchit;
oge akọn̄ môlilaba owu.
3 Ìgban̄ ida ukpo òkitaan̄ me Oronayim:
ukpo ito ikpele mfufiat, mè jakajaka!
4 Mêkpukpuku Mowabu igwook;
asasa nsabọn kiban̄ mêkekitaan̄ ukpo.
5 Me oniin̄ ema ekije inene isi Luyit,
ema ebekitoto ito ikije;
Me oniin̄ ema ekikwala isibi ifo Oronayim,
mêkinọ ema ekitaan̄ ukpo
ujaralek me lek mfufiat kiban̄.
6 Ìlibi! Ìweek agan̄ ebek ugwem kinyi;
ìkup kubọk uti kpunube inwan̄ me lek me emen èwê.
7 Mije owu otoon̄be ejit me lek unye mgban kwun̄
mè inu ubọọn̄ kwun̄,
mêtet owu si ubọk ubọk itap me usun̄ akọn̄.
Kemos, awaji kinyi, môgọọk isi inin̄ me usun̄ akọn̄;
ebi ngwugwa kan̄ mè ebi ibot
ikwaan̄ kan̄ mêgọọk igbaan̄ ije.
8 Ogwu òjijaka ama mônu me ama geelek iso,
ama geege ìkponwọnọ.
Mêjijaka iteke igwook,
mè ijijaka òla ijọn̄ si,
ike Okumugwem otumube.
9 Ìnyi Mowabu uwop,
mije, ọmọ ìkaan̄ iwuwulu inan̄a;
ama kan̄ cha ìboyayat ita kpai,
kpunu ene geege òboluk me emen kiban̄.
10 “Môfieek inyi ogwu òkirọ ikwaan̄ Okumugwem ifiọk ifiọk!
Môfieek inyi ogwu òtetet oge akọn̄ kan̄ ikaan̄,
ibe ikanwọ eje.
11 “Mowabu ìkup me utelelek akarake ibebene kan̄,
kubọk miin̄ eyikbe itele, afuk ògegen ibia,
kpegwook-nu inan̄a me ugọn̄ ge ìtap me ofifi ugọn̄;
ọmọ ìkaninin̄-nu me usun̄ akọn̄.
Eya orọ, utop kan̄ ìkup kubọk îkupbe,
olu kan̄ si ìkanwene.
12 Ire, usen òkinu,
mgbọ mâriabe ebi ìkigwook miin̄ inu me lek kan̄,
mênenigwook ọmọ isan̄a,
mè isun̄ ugọn̄ kan̄ ukpọk emen,
mè itọọn̄ iko kan̄ cha ikpọk isan.
Emi Okumugwem ntumu.
13 Mgbọ ya, Kemos mônenisa esip itet ebi Mowabu,
kubọk esip otetbe ebi uwu kè Ijeren,
mgbọ ema esabe Beten itoon̄ ejit.
14 “Enyi ejeje ikitumu ibe, ‘Eji ìre ebi unye,
ebi ekinọ etip kiban̄ me akọn̄’?
15 Ogwu òbojijaka Mowabu mè ama kan̄ cha îra inire,
nsabọn irieen̄ kan̄ ebi ìsisibi isi cha,
mêkpulu isa isi ikpan̄.
Emi ntumu, emi ogwu Ubọọn̄,
ogwu erieen̄ kan̄ orebe
Okumugwem Ogwukaan̄ Inyọn̄ mè Ijọn̄.
16 Ùrioon̄ òbotoon̄ Mowabu ìkup mgbet mgbet,
ukwook òbotet ọmọ òkinu ugwat ugwat.
17 “Ìfieek ejit ìnyi ọmọ, enyi ebi ìluluk ikana ọmọ,
enyi otutuuk ebi ìnọnọ etip kan̄;
ìtumu ìbe, ‘Okuba ubọọn̄ òkaan̄ unye ya, ìjeje ifan̄a,
mkpat ubọọn̄ ya òkaan̄ umin, ìjeje ifan̄a mọnọ!’
18 “Enyi ebi ìluk me ama Dibọn,
ìnan̄a me irek umin kinyi ìkwala ìsibi,
mè ìnisiki ìkweek irek me ukpọk ijọn̄,
mije, ogwu òbojijaka Mowabu mônu enyi akọn̄ me lek,
mè ijijaka ama mgban akọn̄ kinyi cha igwook.
19 Jei, owu ogwu òluk me Aroweri,
keke me agba lek oniin̄, mè kibem.
Do ogwu enerieen̄ òkililibi
mè ogwu enenwaan̄ òkinwọnwọnọ,
ibe ìre keke orọ ye.
20 Mîgwak Mowabu igwook, esip îtet.
Ìto ito, mè ìtaan̄ ukpo!
Ìlook me agba okwaan̄ Anọn
ibe ke mîjijaka Mowabu igwook.
21 Oyerebet îre lek òla inyọn̄ ogoon̄,
îre lek ama Olon mè Jasa mè Mefayat,
22 mè ire lek ama Dibọn, mè Nebo mè Bet Dibalatayim,
23 mè ire lek ama Kiriatayim, mè Bet Gamulu,
mè Bet Meyọn,
24 mè ire lek ama Keriyot melek Bojira,
mè ire lek otutuuk ama Mowabu,
echi ujọn̄ọ ere mè echi mgbet ere.
25 Mîjibi Mowabu iko unye kan̄ isan̄a ọmọ me ibot;
mîfan̄a si ubọk kan̄.
Emi Okumugwem ntumu.
26 “Ìnyi Mowabu miin̄ inwọ isa,
mije, ìkitọ lek me lek Okumugwem.
Mowabu môfufuku me emen igbọ kan̄,
ọmọ si môkana inu ochak.
27 Ìre Ijeren ìkare inu ochak ìnyi owu ni?
Ìre etetet ọmọ melek ebi inọ ni,
eyi owu okitumu ikọ ibak ọmọ,
owu ora ikisisik ibot ichak ọmọ ochak?
28 Enyi ebi ìluk me Mowabu,
ìtele emen ama kinyi ìsi ìluk me emen ewuuk.
Ìkup kubọk ekerekwukwu ònama uwu kan̄
me otu ǹkororok.
29 “Eji mînọ inu ofolek ugumulek ebi Mowabu,
ugumulek òraraka iman̄, mè imimin lek,
mè alọm, mè inyan-lek,
mè ubenelek òkup ọmọ me ejit.
30 Nriọọn̄ unyechieen̄ kan̄, ire, ìkakaan̄ oruru,
gogolek kan̄ ìkakaan̄ ibot me lek.
Emi Okumugwem ntumu.
31 Eya orọ, mâto ito me ibot ebi Mowabu,
me ibot otutuuk ebi Mowabu ke mbabọn̄ ukpo;
mâfieek ejit me ibot ebi Kiri Areset.
32 Jei, owu Sibima, ama olik gerep,
nto owu igak ito etobe me ibot ama Jajeri.
Agọọk olik gerep kwun̄ îsan isi igwook me lek okwaan̄;
îsan isi igwook me lek okwaan̄ Jajeri.
Ogwu òjijaka inu
îjijaka mfut mgbọ ura kwun̄,
mè ijijaka gerep kwun̄ si igbaalek.
33 Unwọọn̄ mè ubelejit îsibi inọọn̄
me ijọn̄ uko mè inyọn̄ ijọn̄ ido Mowabu.
Nchit miin̄ ibe ikayaka ìsibi me ere ichimi miin̄;
kpunu ogwu òboyaka ikitaan̄
ukpo unwọọn̄ ikichimi miin̄.
Ukpo môkitaan̄,
ire, ìkpoyaka ire ukpo unwọọn̄.
34 “Ida ukpo kiban̄ môbene
me Esibon isi ire Eliale mè Jayas,
mè ibene me Sowari isi igwook
me akarake Oronayim mè Egulat Selisiya.
Mije, ikerere mun̄ okolo Nimirim,
ìchachiaak ita kpai.
35 Mâtap okputut me Mowabu
inyi ebi geelek ìkigwa
ngwugwa me isi-ijọn̄ kiban̄,
mè ikiwọp nsensi inyi awaji kiban̄ cha.
Emi Okumugwem ntumu.
36 Eya orọ, ǹkifieek ejit me emen n̄a inyi Mowabu
kubọk ida òja òkitaan̄ ufieejit ufieejit,
mè ikifieek si inyi ebi ama
Kiri Areset kubọk ida òja ufieejit,
mije, inu ubọọn̄ kiban̄ cha ema ekukọbe isun̄,
îchieen̄ ita kpai.
37 Mije, otutuuk ene geelek mîkwọkọ ibot irọt;
otutuuk ene mîkwọkọ ifet isan̄a me otu;
otutuuk ene mîkeen̄ ubọk kiban̄ ibak;
otutuuk ene mîkwun ekwut ufieejit me ebon.
38 Me inyọn̄ otoon̄-uwu geelek me Mowabu,
mè isi oyet geelek,
ufieejit ufieejit okup;
mije, m̀babak Mowabu igwook,
kubọk ojọngwu kpeyaka iweek.
Emi Okumugwem ntumu.
39 Jei, Mowabu îkpọk isan! Ìto ito!
Jei, Mowabu îsa esip me isi igwu ikom!
Mowabu îkana inu ochak,
mè inu urimi inyi otutuuk ebi ìluluk ikana ọmọ okokop.”
40 Okumugwem ìtumu ibe ikeyi:
“Ìkpọ! Ene ge òkiwulu inu kubọk igo,
môwele uwop kan̄ ichit Mowabu.
41 Mêbọkọ ama Keriyot,
mè ibọkọ si ama mgban akọn̄ cha.
Me usen ya, ebi usọ akọn̄ ido Mowabu cha
mêfieek owot kubọk enenwaan̄ uman okitet.
42 Mêjijaka Mowabu, ìkpoyaka ire ido,
mije, ìkitọ lek me lek Okumugwem.
43 Enyi ebi Mowabu,
inu òkukup inyi enyi ìre uga ukpook, mè udọn̄, mè ufe.
Emi Okumugwem ntumu.
44 Ogwu inwọnọ me ubọk uga ukpook,
môrọn̄ inin̄ me emen udọn̄,
ogwu inene isibi me emen udọn̄,
ufe môtetet ogwa;
mije, mâsa acha osusut ebi Mowabu
inikeme ebi Mowabu.
Emi Okumugwem ntumu.
45 “Ebi ìlibi ekot mkpat akọn̄ ekeke
uwọ-lek uwọ-lek me Esibon,
ere ema elibibe isi ibesi ilet lek;
mije, ukan̄ îbumu isibi me Esibon,
alọm ukan̄ òkisak me ama
ogwu ubọọn̄ Siyon okpulube me ukot ikaan̄;
îtaka ire inyọn̄ ogoon̄ ere ebi Mowabu elukbe,
mè itaka ebi usọ akọn̄ ebi gogolek cha.
46 Enyi ebi Mowabu, môfieek inyi enyi!
Ebi ìkitọbọ ebum inyi Kemos mêchieen̄ ita;
mîkpulu bọn ebirieen̄ kinyi me akọn̄ isa ifon,
mè ikpulu bọn ebibaan̄ kinyi itap me usun̄ akọn̄.
47 “Ire, mâsa ebi Mowabu ekpulube me usun̄ akọn̄ ika,
mè ikpọk inyi ema irek kiban̄ me mgbọ òkup me isi.
Emi Okumugwem ntumu.”
Ere keyi ke oyerebet ebi Mowabu oyaka.