Etip ofolek Babilọn
50
Ikọ Okumugwem otumube ofolek Babilọn mè ijọn̄ ebi Babilọn, inan̄a me otu kè Jerimaya ogwu nriran ìre ikeyi:2 “Ìtumu ìnyi ebi ido geelek, ìlook ìkana otutuuk ere,
ìbene egop ìsa ìkitumu ìkana ere geelek;
ìtumu otutuuk ikọ ìsibi, ikatet geege ìkaan̄,
ìkilook ibe, ‘Mêbọkọ Babilọn;
esip môtet Belu, awaji kiban̄.
Uga ukpook môtet awaji kiban̄, Merodak,a
esip môtet mkpọmfaka kan̄,
uga ukpook môtet inu ekọkọ kan̄ cha.’
3 Ido ge ònan̄a me agan̄ inyọn̄
mônu initim ọmọ akọn̄ me lek,
mè ijijaka ijọn̄ kan̄ igwook.
Kpunu ogwu òboyaka iluk me lek ijọn̄ ya;
ebilene mè anam mêlilim ita kpai me lek ijọn̄ ya.
4 “Me usen cha, mè ibot mgbọ ya si,
ebi Ijeren mè ebi Juda mêgbaan̄ itọbọ,
mè ikito ito ikije isi ikiweek Okumugwem Awaji kiban̄.
Emi Okumugwem ntumu.
5 Ema mêdido inu ofolek ama Sayọn,
mè iyaka isi kiban̄ ikikpọ oniin̄ òkisi ama ya.
Ema mênu inisa lek kiban̄
ichim iriaak me lek Okumugwem
sa me inyan̄a-ibot eyi òbokup ire mgbọ geelek,
eyi kpebewuuk.b
6 “Ebi n̄a ìre urum arọọn̄ òchechep;
ebi ìkikpukpo ema mîsa ema ije ilọ oniin̄,
mè irieen̄ ema igwu ikom me inyọn̄ ogoon̄.
Ema ekekititeek ikana inan̄a
me inyọn̄ ogoon̄ isi inyọn̄ orioon̄;
mè iwuuk ere ema ekitọbọ efuuk.
7 Otutuuk ebi ìjeje itoon̄ ema me lek ekitataka ema;
ebi ochicha kiban̄ ekekibe, ‘Ikọ geege ìkafieek eji,
îre bak me lek ijo inu ema erọbe Okumugwem,
ogwu òrere ere nluk eyi ata irọrọ,
Okumugwem, ogwu òrere
utoon̄-ejit ebi nte nte kiban̄.’
8 “Ìlim ìsibi me Babilọn,
ìsibi ìnan̄a me lek ijọn̄ ebi Babilọn.
Ìkije me isi
kubọk ebi kè orie ebot ekije me isi urum ebot mè arọọn̄.
9 Ìkpọ, emi mânitimi ogbogbo ikpele ido me agan̄ inyọn̄,
inyi enan̄a ekeke, mè egbaan̄ etọbọ,
mè enu akọn̄ me Babilọn.
Ema mêdọmọ lek kiban̄ ikana ọmọ,
mè itet ọmọ me ere ya.
Oraan̄ kiban̄ ìbobet lek oraan̄ ogwu usọ akọn̄,
ìkaboje, mè ika ukpọk ukpọk.
10 Ikeya ke ebefum Babilọn inọọn̄ me akọn̄;
otutuuk ebi ìbefum ọmọ
mêkpulu inu ubọk ema eweekbe.
Emi Okumugwem ntumu.
11 “Enyi ebi ìjijijaka ìrot n̄a,
enyi ba mêkinwọọn̄ unwọọn̄, enyi ba mêkibele ejit;
enyi ba mêkiriraan̄ ikana kubọk
uman eriembuuk òkigen̄ akpa,
mè ikibeke ida kubọk orie inyinya.
12 Mije keya, ikpele esip môtet nga kinyi,
ochak môchak ogwu òmaman enyi.
Ọmọ môkana ido òsisip ichit,
mè ikana èwê, mè nchat ijọn̄, mè ijọn̄ ìkakitibi inu.
13 Bak me lek unaan̄-ejit Okumugwem,
otutuuk ama ya ìboyayat isan̄a kpai,
kpunu ogwu òboluk me emen.
Otutuuk ebi mêjebe iriaak ama Babilọn mêriki, mè ifiọọk,
bak me lek otutuuk unan òsasak me lek ama ya.
14 “Otutuuk kinyi ebi ìkisook ogbaan̄,
ìmọnọ irek kinyi ìkana Babilọn me ijọn̄.
Ìsook ọmọ! Oraan̄ geege ikasik,
mije, îre Okumugwem ke ọmọ orọ ijo inu ikeme.
15 Ìtiki akọn̄ ìkana ọmọ me ijọn̄!
Îgwook ubọk me ijọn̄, uwu-oket kan̄ îrurọn̄ọ,
mgban kan̄ îgwak igwook.
Mije, eyi ìre useen̄ inu eyi Okumugwem oborọ ọmọ;
ìrọ ọmọ useen̄;
ìrọ ọmọ inu kubọk îrọbe ebi ofifi ife.
16 Ìsan̄a ebi ìkiwop uko ìsan̄a me Babilọn,
ìsan̄a si ebi ìkisọp akpa mgbọ irọrọkọ uko ìsan̄a.
Bak me lek oge akọn̄ ogwu ochicha,
ebi ichen geelek ìluk me
Babilọn elibi efon egọọk ebi kiban̄,
ene geelek ilibi ifo ijọn̄ ama kiban̄.
17 “Ebi Ijeren ìre urum arọọn̄ òyiyiyila,
ebi kè egbe àtat erieen̄ ema ikpọk isan.
Adasi ogwu òtaka ema
ìre ogwu ubọọn̄ ebi Asiria;
ogwu mgburudun̄ ònikpukpuku ema ukwuuk
ìre Nebukadineja ogwu ubọọn̄ Babilọn.”
18 Eya orọ, Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi:
“Ìkpọ, mânisulu ogwu ubọọn̄
Babilọn melek ijọn̄ kan̄ osusut,
kubọk nsulube ogwu ubọọn̄ Asiria.
19 Ire, mâsa Ijeren igwu ikom inu me lek ijọn̄ urie kan̄,
mônenikitaka mbubet me
lek ogoon̄ Kamen mè ijọn̄ agan̄ Basan;
môtaka mbubet, mè itaka ijot
me inyọn̄ ogoon̄ ebi otoko kè Iferem mè ijọn̄ agan̄ Giliadi.
20 Me usen cha, mè ike mgbọ ya,
mêweek inu ebi Ijeren erọbe ilọ,
ire, kpebemun̄ geege;
mêweek si ijo inu ebi Juda erọbe,
ire, kpebeweek imun̄,
mije, ebi geelek mâtelebe ibe ekwaan̄ esik,
mâtele ijo kiban̄ inyi ema.
Emi Okumugwem ntumu.
21 “Ìben akọn̄ ìsi lek ijọn̄ Meratayim,
ìjibi akọn̄ ìsi lek ebi ìluk me Pekodu.
Ìkpan̄ ema, mè ìjijaka ema ìsan̄a kubọk inu oniin̄ akọn̄.
Ìrọ otutuuk inu cha geelek nnyibe ida ibe enyi erọ.
Emi Okumugwem ntumu.
22 Okput akọn̄ òkitaan̄ me lek ijọn̄,
mfufiat îmin enenen!
23 Jei, abaracha otutuuk linyọn̄ îfan̄a!
Jei, îkpukpuku ita kpai!
Jei, Babilọn îjijaka ita kpai,
me etete ido geelek!
24 Jei Babilọn, ǹkọkọọk ufe ikikpọ owu,
owu orọrọn̄ inin̄ emen sabum owu oniriọọn̄;
mîweek owu imun̄, mè itet owu,
mije, îre Okumugwem ke owu okitim etim me lek.
25 Okumugwem îgwuku uwu nroon̄ akọn̄ kan̄ ibook,
mè isan̄a nroon̄ akọn̄ echi
uyok uyok unaan̄-ejit kan̄ isibi,
mije, Ogwukaan̄-ene Okumugwem
Ogwukaan̄ Inyọn̄ mè Ijọn̄
îkaan̄ ikwaan̄ ìbosi me ijọn̄ ebi Babilọn.
26 Ìjibi akọn̄ ìnan̄a me ujọn̄ọ ere ìnu ọmọ lek,
ìchili uwu isun̄-akpa kan̄ cha;
ìkpulu inu enyi efumbe ìtoon̄ ìbene kubọk èdọ akpa.
Ìjijaka ama ya ìsan̄a kpai,
ikasik ene geege me ama ya.
27 Ìkpan̄ otutuuk eriembuuk kiban̄;
ìsa ema ìje ìsi ere ikpan̄-anam!
Môfieek inyi ebi Babilọn!
Mije, usen kiban̄ îre,
mgbọ isusulu ema osusut îre.
28 Ìgban̄, ebi mkpat akọn̄ mè ebi ìnwọnwọnọ
mêkinan̄a me Babilọn ika,
me ama Sayọn ke ema ekitumu
ubọk Okumugwem Awaji kiji
osan̄abe useen̄ inu erọbe me lek Uwu Mbuban kan̄.
29 “Ìtitiin̄ ebi ìkisook oraan̄ ìsa ìsi akọn̄ me Babilọn;
ìgween̄ otutuuk ebi ìkisook ogbaan̄.
Ìkpa mbin akọn̄ ìkana Babilọn me ijọn̄,
ikachieek ene geege inwọnọ.
Ìkpe ema mkpukpe ìgọọk irọrọ kiban̄;
ìrọ ema inu kubọk ema erọbe ebi ofifi ife.
Mije, îre Okumugwem Ogwu Mbuban ebi Ijeren
ke ema etọ ubọk me isi.
30 Eya orọ, nsabọn irieen̄ kan̄ mêrurọn̄ọ me lek oniin̄;
otu môchit otutuuk ebi akọn̄ kan̄ me usen ya.
Emi Okumugwem Ogwukaan̄ Inyọn̄ mè Ijọn̄ ntumu.
31 Owu ogwu ugumu,
kpọ, emi melek kwun̄ kpetat,
mije, usen kwun̄ îra ire,
mgbọ mbasulu owu osusut îre.
Emi Ogwukaan̄-ene, Okumugwem
Ogwukaan̄ Inyọn̄ mè Ijọn̄ ntumu.
32 Ogwu ugumu môtọbọ ukot inan̄a irọn̄,
kpunu ogwu òbobene ọmọ igwuun̄;
Emi mâtap ukan̄ me lek ama kan̄ cha,
ukan̄ môtataka otutuuk asabọn ama
òkakana ọmọ me ijọn̄ iriọk.”
33 Okumugwem Ogwukaan̄ Inyọn̄ mè Ijọn̄ ìtumu ibe ikeyi:
“Mêkitutuku ebi Ijeren,
mè ikitutuku si ebi Juda igbaalek.
Otutuuk ebi ìkpukpulu ema me usun̄ akọn̄,
etetet ema ikam,
mè ijit itetele ema ibe efon.
34 Ogwu Òfafaka ema Isibi înye oguga;
Okumugwem Ogwukaan̄ Inyọn̄ mè Ijọn̄ ore erieen̄ kan̄.
Ìbokekeke inye itumu ikọ ibot kiban̄,
inyi mônyi ema isiki-efuuk me ijọn̄ kiban̄,
mè isan̄a isiki-efuuk isan̄a me lek ebi ìluk me Babilọn.
35 “Oge akọn̄ ge òkinyana ikpọ ebi Babilọn,
mè ikikpọ ebi ìluk me Babilọn,
mè ikikpọ si ebi ibot mkpulu kiban̄
mè ebi ìriọọn̄ inu kiban̄!
Emi Okumugwem ntumu.
36 Oge akọn̄ ge òkinyana ikpọ ebi nriran ataak kiban̄!
Ema mêkana burubut.
Oge akọn̄ ge òkikpọ ebi akọn̄ kiban̄!
Ukpook mônin̄ idek ema lek.
37 Oge akọn̄ ge òkinyana ikpọ
inyinya kiban̄ mè uji akọn̄ kiban̄,
mè otutuuk ebi ichen ìkup etete kiban̄.
Ema mêwọ kubọk ebibaan̄.
Oge akọn̄ ge òkinyana ikpọ ere
ema ekisun̄ inu ubọọn̄ kiban̄!
Mêfum ere cha irak.
38 Oge akọn̄ ge òkinyana ikpọ otutuuk mun̄ kiban̄!
Mun̄ cha mêchiaak ita kpai.
Mije, ama ya ìre ijọn̄ ogbogbo mkpọmfaka,
ema mè mkpọmfaka kiban̄
mêrama iraak mije ukpook.
39 “Eya orọ, anam emen èwê
mè ibo oron ngwugwat lek
mêluk me ere ya,
wukuwuku si môluk me emen kan̄.
Mege ire mgbọ geelek,
ebilene kpebeyaka ikpọk iluk
me emen ama ya,
nan̄a me ukot re me ukot,
kpebeyaka iluk me emen kan̄.
40 Ike Awaji ogwakbe ama Sodọm mè ama Gomora,
mè igwak si asabọn ama kiban̄ cha isan̄a,
ikeya si ke ìborọ, ene geege ìkpoluk me ere ya,
kpunu gwun̄ ogwu ebilene òboluk me emen.
41 “Ìkpọ! Ebi ife ge mêkinan̄a me agan̄ inyọn̄ inu;
ebi ikpele ido mè owuwa ebi ubọọn̄ mêkibem lek
ijijibi akọn̄ inan̄a me ntutun̄ ere geelek me linyọn̄ inu.
42 Ema ekaan̄ ogbaan̄ mè otunwa me ubọk;
ema ìre ebi ikpak, kpekito ene nsan.
Ema ekikput kubọk okwaan̄,
ekilibi me inyọn̄ inyinya,
mè ikije me onineen̄ me onineen̄ kubọk ebi isi akọn̄;
ema ekinu inenitim owu akọn̄ me lek, jei ama Babilọn.
43 Ogwu ubọọn̄ ebi Babilọn înọ etip kiban̄,
ubọk kan̄ owọwọ, mè iriọkọ igwook.
Ufialek okekeme ọmọ uyọt uyọt,
ufiak kan̄ onyenye kubọk uman otet enenwaan̄.
44 Ike egbe àtat okinan̄a isibi me
ekpuk oron me agba okwaan̄ Jodan,
igọọk anam me lek ijọn̄ urie anam ere mbubet ìkakinan,
ikeya si, emi mârieen̄ Babilọn
isan̄a me lek ijọn̄ kan̄ mgbọ yaage.
Ekene ke egobo,
ogwu mâyakabe ikwaan̄ yi itap me ubọk?
Ekene obet lek n̄a?
Sà ìre ekene obokọt itọ emi ubọk me isi?
Ìre kpasi ogwu òkpukpo arọọn̄ obokọt ikeke ida emi?
45 Eya orọ, ìgban̄ inu Okumugwem otọtbe ibak Babilọn,
ìgban̄ inu îdọmọbe ofolek
ebi ìluk me lek ijọn̄ ebi Babilọn:
Me atikọ, mêdut arọọn̄ echi asasa me lek urum arọọn̄ isa ije;
me atikọ, mêjijaka ijọn̄ urie
anam kiban̄ isan̄a mije kiban̄.
46 Ida okput akọn̄ mgbọ mêtetbe Babilọn môsisik linyọn̄;
ida ukpo kiban̄ môtaan̄ isi
igwook me etete ebi ofifi ido.”