51
Okumugwem ìtumu ibe ikeyi:“Ìkpọ, mânirọ inyi efet òkifiat inu inifiat Babilọn,
mè ifiat ebi ìluk me Lep Kamai.a
2 Mâria ebi ichen isi Babilọn,
ibe esi egen̄ ema kubọk ekigen̄ akpa,
mè ejijaka ijọn̄ kiban̄;
mêtim ebi Babilọn akọn̄ me lek me agan̄ geelek
me usen ùrioon̄ kiban̄ ya.
3 Ikanyinyi ogwu ogbaan̄ irek ibe inwaan̄ oraan̄ kan̄,
ikachechieek ibe itap nroon̄ akọn̄ kan̄.
Ikatele nsabọn irieen̄ kiban̄ enwọnọ,
ìjijijaka otutuuk urum akọn̄
kiban̄ ìsan̄a kubọk inu oniin̄ akọn̄.
4 Ebi ekpan̄be mêrurọn̄ọ me ijọn̄ Babilọn,
ebi echimbe itibi mêrurọn̄ọ me lek oniin̄ ama kiban̄.
5 Awaji ebi Ijeren, Okumugwem Ogwukaan̄ Inyọn̄ mè Ijọn̄,
ìkajit Ijeren mè Juda ìtele,
ubọk geelek ijo inu ojotbe lek ijọn̄ kiban̄
me isi kan̄, ọmọ Ogwu Mbuban ebi Ijeren.
6 “Ìlibi ìsibi me emen ama Babilọn!
Ogwu ikup, ilibi ekot iweek ebek ugwem kan̄!
Ikatele ibe ekpan̄ enyi mije ijo inu kiban̄.
Mije, mgbọ Okumugwem oborọ ema useen̄ inu îre,
môkpe ema inu ògbegbe ema.
7 Babilọn ìre ekpen̄ alata araran̄ me ubọk Okumugwem,
eyi ònenirọ otutuuk linyọn̄ enwọ miin̄ esa.
Ebi ido geelek mînwọ miin̄ kan̄;
eya orọ ema enin̄be iraak.
8 Me ekakpọge chieen̄, Babilọn môrọn̄, mè ikpukpuku.
Ìto ito ibot kan̄!
Ìsa aran̄ igwa unan ìna, inyi esa egwa unan kan̄;
usini mgbọ, mêkọt igwa ọmọ itet.
9 “Ebi ichen ìluk me ama ya ekibe, ‘Eji kè ègwa Babilọn,
ire, kpebekọt igwa ọmọ;
kè eji ejit ọmọ etele, mè ogwu ikup, ifo ido kiban̄,
mije, oyerebet kan̄ îre akpabin inyọn̄,
mè ibene ire lek oduku inyọn̄.’
10 “ ‘Okumugwem îjeen̄ ibe eji kpelọ inu geege;
ìna, inyi eji esi Sayọn,
esi ekpa inu Okumugwem Awaji kiji orọbe.’
11 “Ìwat oraan̄ kinyi ìreke;
ìbeen̄ agbọ kinyi ìkaan̄!
Okumugwem îra isisik ejit ebi ubọọn̄ Midia,
mije, nkeek kan̄ ìre ijijijaka Babilọn.
Okumugwem môsan̄a useen̄,
useen̄ inu erọbe me lek Uwu Mbuban kan̄.
12 Ìbene egop akọn̄ ìda mgban ama Babilọn!
Ìtap ene ìsọkọ me lek ebi ìkibem ere,
ìto ebi mbem me irek me irek,
ìnen̄e ebi akọn̄ enun̄unun̄ ìsun̄!
Okumugwem îdọmọ inu îbe ọmọ môrọ Babilọn isan̄a,
mè irọ si.
13 Owu ogwu òluk me agba owuwa mun̄,
mè ikaan̄ owuwa inu ubọọn̄ isun̄,
okputut kwun̄ îra ire,
sọntiik mgbidim mgbọ, mêfieek owu ifiin̄.
14 Okumugwem Ogwukaan̄ Inyọn̄ mè Ijọn̄
îsa lek kan̄ inyan̄a ibot ibe:
‘M̀batatap ene ijot emen kwun̄,
mè ewa kubọk akaka ituuk,
ema mêtim ikpan̄ owu,
mè itaan̄ ukpo ntim-mkpan̄.’ ”
Okwa isasa itọn̄ Okumugwem
15 “Awaji osa unye kan̄ irom lek ijọn̄,
mè isa iriọọn̄-inu kan̄ itet linyọn̄ ikeke inye,
mè isa ngobo-ntet kan̄ itaba akpabin inyọn̄ inyana.
16 Ọmọ isisook ida, mun̄ îra idimi me akpabin inyọn̄,
ọmọ okirọ oduku inyọn̄ inan̄a me okputut linyọn̄ ibene.
Ọmọ okiria omumen-inyọn̄ melek ibot inu,
mè ikisan̄a efet me uwu isun̄-inu kan̄ isibi.
17 “Me chieen̄ kan̄, otutuuk ebilene ìre tuntun,
kpekaan̄ ifuk-ibot;
ogwu usọ alata geelek îkirie
esip mije mkpọmfaka îrombe,
mije, inu ebobot kan̄ ya ìre ofiaan̄,
kpunu efuuk ugwem geege me emen kiban̄.
18 Ema ìre inu ikike, mè ire si inu ochak;
mgbọ osusut kiban̄ isire, ema ebechechieen̄ ita.
19 Awaji ogwu òre Ìrot kè Jekọp ìkabet lek inu chi;
mije, ọmọ ore Ogwu Òrorom otutuuk inu geelek,
igbaalek Ijeren, òrere otoko eyi îsabe irọ ìrot kan̄.
Okumugwem Ogwukaan̄ Inyọn̄ mè Ijọn̄ ore erieen̄ kan̄.
M̀gbele akọn̄ Okumugwem
20 “Ido Babilọn, owu ìre m̀gbele akọn̄ inyi emi,
owu ore nroon̄ akọn̄ nkisa isi akọn̄.
Ǹkisa owu ikpukpuku ido geelek,
mè ikisa owu ijijaka ijọn̄ ubọọn̄ geelek;
21 ǹkisa owu ikpukpuku inyinya mè ogwu òkikọkọp,
ǹkisa owu ikpukpuku uji akọn̄ mè ogwu òkikọkọp,
22 ǹkisa owu ikpukpuku enerieen̄ mè enenwaan̄,
ǹkisa owu ikpukpuku ugane mè ogbaragbat ene,
ǹkisa owu ikpukpuku ogwu
nsabọn irieen̄ mè ogwu nsabọn ibaan̄,
23 ǹkisa owu ikpukpuku ogwu
òkpukpo arọọn̄ mè arọọn̄ kan̄,
ǹkisa owu ikpukpuku ogwu uko
mè eriembuuk îkisa ibak ijọn̄,
ǹkisa owu ikpukpuku ebi mkpulu mè ebi ibot.
24 “Me chieen̄ kinyi, mâkpe ama Babilọn mè otutuuk ebi ìluk me inyọn̄ ijọn̄ ebi Babilọnb mkpukpe otutuuk ijo inu cha ema erọbe me ama Sayọn. Emi Okumugwem ntumu.
25 “Kpọ, emi melek kwun̄ kpetat, owu ogoon̄ òjijaka inu,
owu ogwu òjijijaka otutuuk linyọn̄.
Mânyana ubọk n̄a ikeme owu,
mè ikpukpọt owu me inyọn̄ ewuuk cha ito me ijọn̄,
mè irọ owu òkana ogoon̄ ewọpbe iriọk.
Emi Okumugwem ntumu.
26 Kpebemọnọ ewuuk geege me emen kwun̄ isa irọ atà ibot uwu,
kpebesasa si ewuuk geege me emen kwun̄ itọbọ ọdọ,
mije, owu môre ere òyayat ita ire mgbọ geelek.
Emi Okumugwem ntumu.
27 “Ìbene egop akọn̄ me lek ijọn̄ yi!
Ìwut otita akọn̄ me etete ido geelek!
Ìneen̄ ebi ido geelek ìsun̄, inyi enesi ọmọ akọn̄ me lek;
ìgween̄ ijọn̄ ubọọn̄ Ararat mè Mini melek Asikenaji,
ìgween̄ ema ìgbaan̄ ìtọbọ, inyi enesi akọn̄ me lek kan̄.
Ìsan̄a ogwu isi akọn̄ ìto ìsa ìgọọk ọmọ;
ìria inyinya akọn̄ òwawa
kubọk urum akaka ituuk ìsi lek kiban̄.
28 Ìneen̄ ebi owuwa ido ìsun̄, inyi esi ọmọ akọn̄ me lek,
ebi ubọọn̄ ebi Midia,
mè ebi ibot mkpulu kiban̄ mè otutuuk ebi ilile kiban̄,
mè ebi otutuuk ido geelek ema ekikpulu.
29 Ijọn̄ môsisik, mè ininin̄i lek,
mije, inu geelek Okumugwem
odọmọbe ibak Babilọn ìkekeke,
eyi òrere irọrọ ibe ijọn̄ Babilọn ikana ukpọk ukpọk,
mè ene geege ikaluk me emen kan̄.
30 Ebi usọ akọn̄ Babilọn mîtele ititim akọn̄,
ema mînin̄ emen uwu mgban akọn̄ kiban̄.
Unye kiban̄ îyiyeek ita;
ema eyaka iniwọ ikup kubọk ebibaan̄.
Mîtap ukan̄ iwọp ere nluk Babilọn cha;
mîfaan̄ olọkọrọ ekisa igon otunchit kan̄ cha.
31 Ogwu ekot ge môlibi isi isoon̄ ofifi ogwu ekot,
ogwu etip ge môsi isoon̄ ofifi ogwu etip,
me oniin̄ ema ekisi ilook ogwu ubọọn̄ Babilọn ibe
ke mîbọkọ ama kan̄ otutuuk isan̄a;
32 ke mîbọkọ ere ekije isaba mgbọ mun̄ okirak cha isan̄a,
mè itap ukan̄ iwọp anyiaan̄ emen nria cha isan̄a,
ke ikpele ukpook înin̄ igak emen ebi akọn̄.”
33 Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi:
“Babilọn ìbet lek akpa òkup me ere ekigen̄ akpa,
me mgbọ ekijak akpa igen̄;
sọntiik osik,
môrere mgbọ eberọkọ Babilọn,
kubọk ekirọkọ inu me uko.”
34 “Nebukadineja ogwu ubọọn̄ Babilọn îgwak eji itaka,
mè ikpukpuku eji igwook;
îrọ eji ekana ojọngwu ukpọk emen.
Îkpulu eji otutuuk imeen̄ isan̄a kubọk ijijinu,
mè ikpulu ata inorie kiji irie ijot owot,
mè ikwut eji ifiin̄.”
35 Ebi ìluk me Sayọn mêbe:
“Kè afa cha erọbe eji, mè irọ anam akpalek kiji
itoon̄ Babilọn me ibot.”
Jeruselem môbebe:
“Kè eje n̄a itoon̄ ebi ìluk me ijọn̄ Babilọn me ibot.”
36 Eya orọ, Okumugwem ìtumu ibe ikeyi:
“Kpọ, mânitumu ikọ ibot kwun̄,
mè irọ useen̄ inu erọbe owu;
mârọ inyi okwaan̄ Babilọn ichiaak ita,
mè ogbuuruk mun̄ kan̄ irak.
37 Babilọn môkana èdọ mkpukput,
ere ibo oron afa obokiluk,
môkana inu urimi mè inu ochak,
ere ene geege ikalukge.
38 Ema mêkigbin kubọk egbe àtat,
mè ikigọt kubọk bọn egbe àtat.
39 Ulọk ebek kiban̄ isinye igana,
mâto ijọk inyi ema,
mè irọ ema enwọ esa,
inyi ema ebele ejit,
mè erọn̄ ilaak ere mgbọ geelek,
mè ekayaka ìkọt ìnan̄a ìkeke.
Emi Okumugwem ntumu.
40 Mâkeme ema isiki,
kubọk ebi kè arọọn̄ ebesa isi ikpan̄,
kubọk orie arọọn̄ mè orie ebot.
41 “Jei, mîbọkọ Sisak!c
Jei, mîbọkọ ogwu otutuuk linyọn̄ ekitọn̄!
Jei, Babilọn îkana urimi
me etete otutuuk ido geelek!
42 Okwaan̄ môbaak imeen̄ Babilọn,
ekoon̄ kan̄ òkigbugbugbut môkana ọmọ ichit bùk.
43 Ama kan̄ cha môkana ukpọk ukpọk,
mè ikana ere òchachat mè ijọn̄ èwê;
môkana ijọn̄ ere ene geege ìkpoluk,
gwun̄ ebilene ge ikeyi ìkpoje me lek iraka.
44 Mâsut Belud osusut me Babilọn,
mè irọ ibe igọkọ inu îmeen̄be cha isibi.
Ebi ofifi ido kpebeyaka ikigbuku inu me lek kan̄.
Mgban ama Babilọn si
môgbugbọ igwook me ijọn̄.
45 Ebi n̄a, ìnan̄a me emen kan̄ ìsibi!
Ogwu ikup, ilibi iweek ebek ugwem kan̄!
Ìlibi ìnwọnọ uyok uyok unaan̄-ejit Okumugwem.
46 Ikafieek owot, ikatet si ukpook,
me lek ukpatu òkitaan̄ ikana me lek ijọn̄ yi;
ukpatu ge inu acha keyi, ofifi ònu ofifi acha,
ukpatu inu afa òkirọ me lek ijọn̄,
mè echi ogwu mkpulu ge
òkitim akọn̄ me lek ofifi ogwu mkpulu.
47 Eya orọ, ìkpọ, usen òkinu,
mgbọ mâsulube mkpọmfaka ebi Babilọn osusut;
otutuuk lek ijọn̄ yi môrie esip,
ebi kan̄ ekpan̄be mêrurọn̄ọ ililam me emen kan̄.
48 Mgbọ ya, inyọn̄ mè ijọn̄,
mè otutuuk inu òkup me emen kiban̄,
mêkọt okwa inwọọn̄ unwọọn̄,
mije, ebi mfufiat mênan̄a me agan̄ inyọn̄ inu,
initim ọmọ akọn̄ me lek.
Emi Okumugwem ntumu.
49 Babilọn ìkaan̄ irọrọn̄, mije ebi Ijeren ema ekpan̄be,
kubọk ebi ekpan̄be me otutuuk linyọn̄,
ekwaan̄be irurọn̄ọ mije Babilọn.
50 Enyi ebi ìnwọnwọnọ me otu oge akọn̄,
ìnan̄a, ikakiket ukot!
Me ujọn̄ọ ere enyi ekupbe,
ìkeek Okumugwem,
mè ìkeek si Jeruselem.”
51 “Enyi ekitumu ibe, ‘Ochak îchak eji,
mije unyechieen̄ eji ebọkọbe;
esip îchit eji isi,
mije, ebi ichen mînin̄ ere mbuban cha
me Uwu Mbuban Okumugwem.’
52 “Eya orọ, ìkpọ, usen òkinu,
mgbọ mâsulube mkpọmfaka kan̄ cha osusut,
ebi unan osakbe mêkekito mfi
me otutuuk lek ijọn̄ kan̄.
Emi Okumugwem ntumu.
53 Babilọn ikebebene ire akpabin inyọn̄,
mè inama ubene ubene uwu mgban̄ akọn̄ kan̄ ya inye,
emi m̀bararia ebi mfufiat isi lek kan̄.
Emi Okumugwem ntumu.
54 “Ida ukpo òkitaan̄ me Babilọn,
okput ikpele mfufiat òkitaan̄ me lek ijọn̄ ebi Babilọn.
55 Okumugwem môjijaka Babilọn,
mè irọ uga okput ya ita.
Okput ekoon̄ kiban̄ ìkiriak kubọk echi ikpele mun̄,
ida okput kiban̄ môkinunuun̄,
56 mije, ogwu mfufiat òkinu me lek Babilọn;
mêteen̄ ebi akọn̄ kan̄ ubọk ubọk,
mè ifaan̄ ogbaan̄ kiban̄.
Mije, Okumugwem ìre Awaji òkisan̄a useen̄,
ìkpolọ ikpekpe ema useen̄ òjot òjot.
57 Mârọ ebi ibot kiban̄ mè ebi
ìriọọn̄ ìnu kiban̄ enwọ esa,
melek ebi mkpulu kiban̄, mè ebi isi ile kiban̄,
mè ebi usọ akọn̄ kiban̄.
Ema mêrọn̄ ilaak ire mgbọ geelek, kpebekọt inan̄a ikeke.
Emi ntumu, emi Ogwu Ubọọn̄,
ogwu erieen̄ kan̄ orebe Okumugwem
Ogwukaan̄ Inyọn̄ mè Ijọn̄.”
58 Okumugwem Ogwukaan̄ Inyọn̄ mè Ijọn̄ ìtumu ibe ikeyi:
“Mgban ulobo akpọk ama Babilọn ya môkpukpuku igwook,
mêchim ukan̄ itap me lek ubene ubene otunchit kan̄ cha;
ikwaan̄ cha ebi ene emun̄be
ukwook me lek môchep me ikike,
kwulukwulu ebi ido geelek
ekwukwulube ita efuuk me emen,
ukan̄ môtaka isan̄a kpai.”
Jerimaya îria etip isi Babilọn
59 Me òso acha ini me lek mkpulu kè Jedikaya ogwu ubọọn̄ Juda, Seraya gwun̄ kè Neriya, gwun̄ kè Mayaseya, òrere ogwu ibot akọn̄ òkikpọ chieen̄ me uwu ogwu ubọọn̄, onenigọọk ogwu ubọọn̄ Jedikaya isi Babilọn. Jerimaya ogwu nriran oneninyi Seraya etip keyi: 60 Jerimaya ìgege otutuuk ùrioon̄ òbonu inyi Babilọn me lek ikpa ekakat, otutuuk ikọ chi ìre inu egebe ofolek Babilọn. 61 Ìtumu inyi Seraya ibe, “Osire Babilọn, mun̄ ibe ke owu ofuk otutuuk ikọ chi isibi inyi enọ. 62 Osifuk isan̄a, tumu ibe, ‘Jei Okumugwem, owu otumu ibe ke owu môjijaka ere yi, inyi inu geege ikaluk, mè ìre ebilene mè ìre anam, ke ere yi môkana ukpọk ukpọk ire mgbọ geelek.’ 63 Osifuk ikpa yi isan̄a, kat, mè sa ewuuk tobo me lek, mè ben tọp tap me emen okwaan̄ Yuferetis, 64 mè tumu ibe, ‘Ikeyi ke Babilọn obogen ibia, ìkpoyaka iwolo ofifi, bak me lek ùrioon̄ mbasa initoon̄ ọmọ. Efuuk môtetet ema.’ ”
Ere keyi ke ikọ kè Jerimaya oyaka.