Okumugwem îsulu Jeruselem osusut
2
Jei, Ogwukaan̄-ene îsa oduku unaan̄-ejit kan̄ikana ichit ama Sayọn bùk!
Me usen ejit kan̄ onaan̄be,
îben òrirọ eyi Ijeren me akpabin inyọn̄
itọbọ ito me ijọn̄,
ìkakekeek ere ibene ukot kan̄, òrere Uwu Mbuban kan̄.
2 Ogwukaan̄-ene îjijaka otutuuk ere ebi kè Jekọp elukbe,
ìkakaan̄ ema nsan geege me lek.
Îsa me unaan̄-ejit igbugbọ mgban akọn̄ ebi ido Juda
igwook me ijọn̄;
îda mkpulu kiban̄ mè ebi ibot mkpulu kiban̄ igwook,
mè ichaka ema mbuban me lek.
3 Îsa me uga unaan̄-ejit kan̄
ijijaka otutuuk unye ebi Ijeren ekaan̄be isan̄a.
Îsan̄a ubọk ulom kan̄ ya îkisa inyan̄a ema isan̄a
me mgbọ ogwu ochicha kiban̄ onube.
Ìkisak igbaan̄ ere me etete ebi kè Jekọp
kubọk alọm ukan̄ okitaka inu geelek òkakana ọmọ iriọk.
4 Înwun ogbaan̄ kan̄ kubọk ogwu ochicha;
ubọk ulom kan̄ ìbebem lek isan̄a
ikup kubọk ogwu oriara.
Ebi geelek ìjajaan̄ me chieen̄ ene,
îkpan̄ otutuuk isan̄a;
îda uyok uyok unaan̄-ejit kan̄ igwook kubọk ukan̄
me ere ebi ama Sayọn ekiluk.
5 Ogwukaan̄-ene ìnikup kubọk ogwu ochicha;
îjijaka Ijeren isan̄a kpai,
îjijaka uwu ebi ubọọn̄ kan̄ igwook;
îgbugbọ mgban akọn̄ kan̄ ito,
mè itap ito mè ufieejit ijot etete ebi Juda.
6 Îgwak Uwu Mbuban kan̄ igwook kubọk ìre uko,
mè ijijaka ere ebi ene ekinititiin̄ itọbọ ebum inyi ọmọ.
Okumugwem îrọ ebi Sayọn
ewuuk ijọk ibot acha înyibe,
mè ewuuk si Usen Mbuban;
îsa me uga unaan̄-ejit ijit ogwu ubọọn̄,
melek ogwu ngwugwa.
7 Ogwukaan̄-ene îjit ntook ngwugwa kan̄,
mè ijit Uwu Mbuban kan̄ itele.
Îkana mgban òkana uwu ebi ubọọn̄ ama Jeruselem
itap me ubọk ogwu ochicha.
Mîdimi ukpo me Uwu Mbuban Okumugwem
kubọk ekirọ me usen ijọk ibot acha.
8 Okumugwem îben me ejit igbugbugbọ
mgban ama Sayọn igwook.
Îsa olik itọ isan̄a iriọọn̄ ike ìborọ,
ìkayat ubọk me lek.
Îrọ mgban ile mè mgban ija ibọkọ uyọt,
mîgbaan̄ isi mè udun̄ ikpukpuku igwook.
9 Otunchit Jeruselem îgwọt inin̄ ijọn̄,
ọmọ îfaan̄ olọkọrọ otunchit cha ijijaka.
Ogwu ubọọn̄ mè ebi ibot me
usun̄ akọn̄ me ofifi owuwa ido,
ikan ìkayaka ìkup ofifi.
Ebi nriran kan̄ kpeyaka imun̄ ilaak ọkpọchieen̄ geege
ònan̄a me ubọk Okumugwem.
10 Ebi ugane ama Sayọn esiki ikweek me ukpọk ijọn̄,
kpesan̄a amọn;
ema mîgwọ ntọn̄ igwook me ibot kiban̄,
mè itaak ofọnti ufieejit.
Obaak ebibaan̄ ebi Jeruselem mîkana isi ichit me ijọn̄,
mije esip.
11 Nto ito ichat mun̄ me chieen̄,
ǹkat îyọọk emi me owot,
olulut n̄a îbum igwook ire ijọn̄,
mije, mîjijaka ebi n̄a igwook.
Asa nsabọn mè nsek bọn mêkigak ene iweek
me lek oniin̄ me emen ama.
12 Mgbọ ema ekirurọn̄ọ me oyet ile ama
kubọk ebi akọn̄ unan onin̄be lek igbet mkpa,
mè ikikwaan̄ ibia me ubọk nga kiban̄,
ema ekidido ebi nga kiban̄ ibe,
“Mọmọ inorie?
Mọmọ miin̄?”
13 Jei, gwun̄ enenwaan̄ Jeruselem,
keke ke mâsa irọ ata-ikọ inyi owu,
keke ke mâsa owu itọ me lek ni?
Jei, ujuja ama Sayọn,
keke ke mbamọnọ ìkike me lek kwun̄,
inyi ǹkọt ǹkat owu ejit?
Unan kwun̄ îdọk kubọk okwaan̄;
ekene obokọt igwa owu itet?
14 Nriran ebi nriran kwun̄ ekiben inyi owu cha,
ìre ofiaan̄ ofiaan̄, mè ataak ataak;
ema kpesan̄a ijo inu kwun̄ isibi ijeen̄ owu,
eyi mesabe ida usun̄ akọn̄ onin̄be isan̄a.
Ilaak ọkpọchieen̄ cha ema ekimun̄ inyi owu,
ìre ofiaan̄ ofiaan̄, mè nlilọ nlilọ.
15 Ebi ìkije iraka me oniin̄ imun̄ owu,
ekisulu ubọk inyi owu;
ema ekichak owu me imọm,
mè ikisisik ibot inyi owu ama Jeruselem,
mè ikido ibe, “Ìre ama ekibe ìre
ama òjaan̄ uja ichit ya ire eyi?
Ìre ama ekibe ìre unwọọn̄
otutuuk ebi linyọn̄ ya ire eyi?”
16 Otutuuk ebi ochicha kwun̄ echichili otu
ibook owu me lek;
ema ekiriak lek,
mè ikiban̄a otu.
Ema ekibe, “Eji mîjijaka ọmọ isan̄a.
Usen ya eji ekikup ikpọ ire eyi;
usen ya îra ire,
eji mîsa chieen̄ kiji imun̄.”
17 Okumugwem îrọ inu ya îdọmọbe isun̄;
îrọ ikọ kan̄ iso,
ikọ ya eyi înyibe otu karake akat.
Îjijaka owu isan̄a,
ìkato nsan.
Îrọ ogwu ochicha inwọọn̄ unwọọn̄ me ibot kwun̄,
mè itap ogwu oriara kwun̄ unye me lek.
18 Ebi ene mîsa otutuuk ejit kiban̄
itaan̄ ukpo igwen Ogwukaan̄-ene.
Jei, mgban ama Sayọn,
tele mun̄ ito kwun̄ ikigbọọk kire okwaan̄,
egwe geelek mè eririeen̄ geelek;
kasiki efuuk,
kanyinyi si chieen̄ kwun̄ irek.
19 Nan̄a keke, taan̄ ukpo me eririeen̄,
me mgbọ geelek ebi mbem ekinwene ene.
Gbuku inu òkup owu me ejit gwook kubọk mun̄
me isi Ogwukaan̄-ene;
bene ubọk kwun̄ beek ọmọ mbeek
me ibot ugwem bọn kwun̄,
ebi ìkigak iweek inyi uraafiọọn̄
me otutuuk ibot oniin̄ geelek.
20 “Jei Okumugwem, kpọ, mè kaan̄ ekiket ofolek!
Ìre ekene ene ke owu orak irọ ikeyi?
Ìre ebibaan̄ mêtaka bọn kiban̄ ni,
nsabọn ema ekpukpobe isibi?
Ìre mêkpan̄ ogwu ngwugwa mè ogwu nriran
me ere mbuban Ogwukaan̄-ene ni?
21 Nsabọn mè ugane mîgbaan̄ ililam ibia
me ijọn̄ me lek oniin̄;
nsabọn irieen̄ n̄a mè nsabọn ibaan̄ n̄a,
oge akọn̄ înin̄ ema ebek;
owu osọp ema igwook me usen unaan̄-ejit kwun̄;
owu okpan̄ ema, òkato njijin.
22 Owu ogwen ebi ìluk ikana emi
ititiin̄ kubọk ògwen ene usen ijọk
ibe enetap emi ukpook me lek.
Me usen unaan̄-ejit Okumugwem,
kpunu ogwu ònwọnwọnọ, kpunu ogwu òsisik;
ebi mmanbe, mè ikpukpo isibi,
ogwu ochicha n̄a îkpaan̄ isan̄a kpai.”