Osusut mè ngwu-nkom mè ikpọchieen̄
3
Emi nre ene ya òmumun̄ ujaralekme ubọk m̀gbele eyi uga unaan̄-ejit kan̄.
2 Ìlalap emi isibi ito,
mè irọ ǹkenje me emen udun, kpan̄asi utoon̄.
3 Me atikọ, îyaka ubọk kan̄ ida emi,
mè ikisut emi owuwa owuwa mgbọ, kpa usen kpa usen.
4 Îrọ mè akpalek n̄a mè ufuk n̄a ikan isan̄a,
mè ifaan̄ ukwuuk n̄a.
5 Îsa ujaralek mè ukwook
ikpa mbin ikana emi okokop.
6 Îrọ emi ǹluk me emen udun
kubọk ebi ìkwakwaan̄ karake akat.
7 Îgwuk edek ikana emi, m̀kpakọt isibi;
îsa mkpọn òlolobo igon emi ikam.
8 Ikerere ǹtataan̄ ukpo, mè ito ito iweek ntap-ubọk;
ìkararaan̄ utọn̄ ìgban̄.
9 Îsa ewuuk ebabak iwak oniin̄ n̄a ichit,
mè irọ oniin̄ n̄a ikukọnọ.
10 Ọmọ îkana ibo nriọk ituun̄ ikup ikikpọ emi itetet,
mè ikana egbe àtat ilet ibochim emi.
11 Îtaba emi isan̄a me lek oniin̄, mè igwak emi iche,
mè isun̄ emi ukpọk ukpọk.
12 Înwun ogbaan̄ kan̄,
mè itet otu oraan̄ kan̄ itat emi me lek.
13 Oraan̄ òsibi me akpa oraan̄ kan̄,
înin̄ inwaan̄ emi me lek ekpin.
14 Nkana inu ochak inyi otutuuk ebi n̄a,
ema ekikọt emi me okwa ochak usen geelek.
15 Înyi emi inu òjajat ǹnwọ ǹjot,
mè inyi emi olulut ǹnwọ ǹdek.
16 Îsa gwun̄ ewuuk ifaan̄ emi ejeek,
mè irọ inyi ǹken ntọn̄.
17 Îrọ inyi nkakaan̄ esuuk,
mè irọ inyi m̀wuuk inu ata irek orebe.
18 Eya ke nnibe, “Òrirọ n̄a îta inọọn̄,
inu mkpọbe chieen̄ me ubọk Okumugwem îlọ emi.”
19 Ikekeek ujaralek n̄a mè nyanya nkinyinya,
ìre ujat mè olulut inyi emi.
20 Me atikọ, nsikikeek inu chi,
îra ikisisaak emi ibot ejit.
21 Ire, inu nkikeek,
mè ikisa me ikeya ikaan̄ ikpọchieen̄ ìre ikeyi:
22 Imumechieen̄ Okumugwem ìkakita,a
mije, ejit nsan kan̄ ìkakaan̄ itata.
23 Ewelegwe geelek, ìkire ayaya;
owu ogbe utoon̄-ejit enenen.
24 Ikeya ke ntumu ibe, “Okumugwem ore ìrot n̄a,
eya orọ, nkaan̄ ikpọchieen̄ me lek kan̄.”
25 Okumugwem înwọn melek ebi ìtoon̄ ọmọ ejit me lek,
mè inwọn si melek ebi ìkiweek ọmọ.
26 Înwọn ibe ene isusuuk lek ikup ikikpọ
unyan̄a eyi Okumugwem.
27 Înwọn ibe ene ikween̄ ubọk ekibeme akpan kan̄
bene me mgbọ ọmọ orebe sọntiik gwun̄.
28 Ene ya iriaan̄ otu isiki ikweek ọmọ gaalek,
mije, îre Awaji obene akpan ya itoon̄ ọmọ.
29 Ene ya isiki lek kan̄ ire ijọn̄,
usini mgbọ, ikpọchieen̄ môkọt ikup inyi ọmọ.
30 Ene ya iyaka agba otu kan̄ inyi ogwu òsulu ọmọ,
mè ibọkọ esip ijot owot.
31 Mije, Ogwukaan̄-ene ìkakijit ogwu ebilene ìtele
ìre mgbọ geelek.
32 Ikerere ìtatap ene ufieejit me lek, ìkikakaan̄ njijin;
imumechieen̄ kan̄ òkibia ene me lek îmin enenen.
33 Ìkakigegen ibak ìsa ujaralek ìjet ene,
ìkakigegen si ibak ìtap ebilene ufieejit me emen.
34 Ijajak otutuuk ebi mkpọn me lek ijọn̄
me irak ukot,
35 mè ijijit ene unen kan̄
me isi Ogwu Òbebene Ichit,
36 mè itetele isisibi unen oyerebet inyi ene,
otutuuk chi ìre inu Ogwukaan̄-ene ìkaweweek imumun̄.
37 Ekene obokọt itumu ikọ, mè ikọ ya orọ,
ire Ogwukaan̄-ene ìkanyi ida?
38 Ìre ìkare me otu Ogwu Òbebene Ichit
ke ata mè ijo okinan̄a isibi?
39 Ìre ogwu ebilene òkup me ugwem môkisọkọ otu,
mgbọ ekisut ọmọ osusut mije ijo inu kan̄?
40 Eji etap chieen̄ ekpọ oniin̄ kiji, mè ewọlọ ekpọ,
mè egwu ekom enu me lek Okumugwem.
41 Eji ebene ejit kiji mè ubọk kiji
eriaak uriaak enyi Awaji me akpabin inyọn̄ ebe,
42 “Eji mîrọ ijo inu mè ikpaka ibot,
owu òkatele ìnyi eji.
43 Owu otap unaan̄-ejit ikana ichit lek, mè irieen̄ eji isan̄a;
owu okpan̄ eji, òkato nsan.
44 Owu osa oduku inyọn̄ igwuk ikwek lek kwun̄,
inyi uriaak geege ikatibi ìre owu lek.
45 Owu orọ eji ekana otiton mè nsak
me etete ebi ife geelek.
46 Otutuuk ebi ochicha kiji mîchili otu kiban̄
ibook eji me lek.
47 Ukpook îtet eji lek, eji mînin̄ me ufe;
eji ekup me emen ubọk jakajaka mè mfufiat.”
48 Mun̄ ito ìkigbuk emi me chieen̄ kubọk okwaan̄,
mije, mîjijaka ebi n̄a isan̄a kpai.
49 Ito ìkpota emi me chieen̄,
ìbokpọkpọ ikigbuk,
50 mege Okumugwem môkupbe me akpabin inyọn̄
isiki chieen̄ ikpọ, mè imun̄.
51 Inu nsabe chieen̄ n̄a imun̄ ofolek ebibaan̄ ama n̄a,
îtap emi ufieejit igak ejit.
52 Ebi ochicha n̄a ekigọọk emi
kubọk ogwu ota ogọọk unọn,
me kpunube inu geege nrọbe ema.
53 Ema mîtọp emi itap me emen udọn̄,
mè iteen̄ ewuuk isa ikitọbọ emi.
54 Mun̄ îmeen̄ emi ire ibot,
mbebe ke nra ichep.
55 Nkukup me emen udọn̄ irak ijọn̄ ya
igwen erieen̄ kwun̄, jei Okumugwem.
56 Owu onọnọ ida n̄a mgbọ nkibe owu, “Kachit utọn̄ kwun̄,
nọ ida ukpo nkitaan̄ iweek unyan̄a.”
57 Owu ojeje igbet me usen ngwenbe owu,
mè itumu inyi emi ibe, “Katet ukpook.”
58 Ogwukaan̄-ene, owu otumu ikọ ibot n̄a;
owu onyan̄a ebek ugwem n̄a isibi.
59 Okumugwem, owu omun̄ mfeen̄ efeen̄be emi.
Bọkọ oyerebet n̄a sibi!
60 Owu omun̄ otutuuk ijo ejit ema ekaan̄be,
mè otutuuk ijo otitọt ema ekitọt ibak emi.
61 Jei Okumugwem, owu onọ ikọ unyechieen̄ kiban̄,
mè otutuuk ijo otitọt ema ekitọt ibak emi.
62 Owu onọ inu ebi ìkirọ ikeme emi ekinunuun̄ me otu
ibak emi ibene me ewelegwe ifit egwe.
63 Kpọ, mè ìre ekwekweek irek, mè ìre ekekeke me ukot,
emi ke ema ekikọt me okwa ochak.
64 Jei Okumugwem, kpe ema mkpukpe ògbe ema
me lek inu ubọk kiban̄ orọbe.
65 Tap ema ètele;
kè ogbo kwun̄ ibia ema me lek!
66 Sa unaan̄-ejit gọọk ema, mè jijaka ema san̄a
me irak akpa isinyọn̄ Okumugwem.