Awaji îgwen ebi ata-ikọ ikeme ebi Ijeren
3
Jei ebi Ijeren, ìgban̄ ikọ keyi emi Okumugwem ntumube ikeme enyi, otutuuk ebi ototun̄ ukan̄ emi nsan̄abe isibi me ido Ijipiti:2 “Îre enyi gaalek ke nriọọn̄
me lek otutuuk ototun̄ ukan̄ ebi linyọn̄;
eya orọ, mâsulu enyi osusut
mije ijo inu kinyi.”
3 Ìre ene iba mêkọt ikigbaan̄ ije,
mè ire ema kpere otu ge?
4 Ìre egbe àtat môgbin me oron
ire ìkamun̄ anam ìbochim?
Sà ìre gwun̄ egbe àtat môgọt me emen okpot kan̄
ire ìkakaan̄ anam îchimbe?
5 Ìre unọn môrọn̄ ufe me ijọn̄
me ere kpetip ufe geege?
Sà ìre ufe môseme me ijọn̄
ire kpunu inu geege ìbotet?
6 Otita akọn̄ isitaan̄ me emen ama
ìre ebi ene kpekiran?
Ùrioon̄ isitoon̄ ama,
ìre ìkare Okumugwem okisa inu?
7 Me atikọ, Ogwukaan̄-ene Okumugwem
ìkakirọ inu geege
eyi ìkpodasi ichili nkeek kan̄
inyi ebi ikwaan̄ kan̄ ebi nriran.
8 Egbe àtat îra igọt,
ìre ekene kpotet ukpook?
Ogwukaan̄-ene Okumugwem îra isan̄a amọn,
ìre ekene kpoben nriran?
Sameria môchep
9 Ìlook me uwu mgban akọn̄ cha òkup me Asidọdu,
mè echi òkup me ido Ijipiti ibe:
“Ìtitiin̄ lek kinyi me inyọn̄ ogoon̄ Sameria;
ìkpọ ogbogbo wọlọwọlọ òkup me emen ama ya,
mè mfeen̄ ekifeen̄ ene me emen kan̄.”
10 Okumugwem ìbe ikeyi:
“Ema kperiọọn̄ ubọk ekirọ inu ònenen,
inu ema efumbe mè inu ema ebọkọbe ene me unye
ojot emen uwu mgban akọn̄ kiban̄ cha.”
11 Eya orọ, Ogwukaan̄-ene Okumugwem ìtumu ibe ikeyi:
“Ogwu ochicha môkpa mbin akọn̄ ikana ido kinyi,
mè igbugbọ mgban akọn̄ kinyi igwook,
mè ifum inu kinyi cha
enyi elileekbe me uwu mgban akọn̄ kinyi cha.”
12 Okumugwem ìtumu ibe ikeyi:
“Ike ogwu òkpukpo arọọn̄ okikọt inyinyan̄a
ukwuuk ukot anam iba mè ìre okpọkọ utọn̄ anam gaalek,
ibọkọ me otu egbe àtat,
ojelek unyan̄a òkup ikeya
obore lek ebi Ijeren ìkup me Sameria.
Ema ebesa ukot mkpilaak
mè utọn̄ inu ibene ibot gaalek ilibi inwọnọ.”
13 Ogwukaan̄-ene Okumugwem Awaji Ogwukaan̄ Inyọn̄ mè Ijọn̄ ìtumu ibe ikeyi:
“Ìnọ ikọ keyi,
mè ìsa ìkeke ata-ikọ ìkeme ebi uwu kè Jekọp.
14 Usen mbasulu ebi Ijeren osusut ijo inu kiban̄,
m̀bagwagwak ntook ngwugwa
yọk òkup me Beten igwook;
m̀bafafaan̄ iko lek ntook kiban̄ cha,
mè ikpulu itọọn̄ igwook me ijọn̄.
15 Mâgwak uwu mgbọ utọọk kiban̄
melek uwu mgbọ uyok kiban̄ isan̄a;
uwu kiban̄ cha esabe oduuk eniin̄ ibala,
m̀bagbugbọ otutuuk igwook,
mè ijijaka owuwa owuwa uwu isan̄a.
Emi Okumugwem ntumu.”