Ebibaan̄ Sameria me osusut
4
Ìnọ ikọ keyiyi, enyi ebibaan̄ ìluk me inyọn̄ ogoon̄ Sameria,ebi ìmiin̄ ufuk kubọk eriembuuk Basan,
enyi ebi ìkifeen̄ ebi ugbọọn̄,
mè ikitutuku ebi una;
enyi ebi ìkibe ebi nlom kinyi,
“Ìsa miin̄ ìna, inyi eji enwọ!”
2 Ogwukaan̄-ene Okumugwem
îsa ubọk ọmọ okupbe me mbuban inyan̄a ibot ibe:
“Ìkpọ, mgbọ òkinu inyi enyi,
mgbọ mêdutbe enyi me otu ukọọk ije;
ebesa ukọọk itaba enyi kubọk irin̄ isa ifon,
mege ire òta ene me etete kinyi.
3 Ebesa enyi igwọt me chieen̄ mgban òbubum
itibi isibi me emen ama;
ogwu ikup, ìboje itibi chieen̄ mgban òkup me isi kan̄,
mêtọtọọn̄ enyi ifon agan̄ Arimọn.
Emi Okumugwem ntumu.”
Ebi Ijeren kpema igwugwu ikom
4 Ogwukaan̄-ene Okumugwem îtumu si ibe ikeyi:
“Ìje ìsi Beten ìsi ìrọ ijo inu;
ìsi si Giligan ìsi ìrọ ijo inu ìtoon̄ urot.
Ìsa ngwugwa kinyi ìnu ewelegwe geelek,
ìnyi irek ge me akọp irek kinyi egwe ita ita geelek.
5 Ìwọp fituru etapbe olat ìsa ìgwa ngwugwa onirọ,
mè ìsa inyinyi ata ejit kinyi cha ìgugo lek,
ìsa ìtaan̄ ukpo,
mije, eya ore inu enyi ebi Ijeren ekima.”
6 Okumugwem îtumu si ibe ikeyi:
“Emi nto enyi ukpọk owot si
me otutuuk ama ile kinyi geelek,
mè isun̄ enyi uraafiọọn̄ me
otutuuk gwun̄ ama kinyi geelek,
ire, enyi kpegwu ikom inu emi lek.”
7 Okumugwem îtumu si ibe ikeyi:
“Mgbọ onyan̄ ita gaalek osikbe enyi mêrọkọbe uko,
emi ntet si ibot ikaan̄ me lek kinyi.
Nsirọ ibot irep igwook me ama ge,
nra itet ikaan̄ me ofifi ama.
Isirep igwook me uko ge,
eyi keyilọ ikarege lek ya, îra ichiaak ita.
8 Eya orọ, ebi ama iba mè ìre ama ita ekije gbegbegbe
isi ama ge ibesi inwọ mudim,
ire, kpemun̄ inwọ ijot owot.
Ire, enyi kpegwu ikom si inu me lek n̄a.”
9 Okumugwem îtumu si ibe ikeyi:
“Nria orukan̄ uti mè mbubeek
itap me emen uko kinyi melek uko gerep kinyi.
Akaka ituuk îtaka uti figi kinyi mè uti olifu kinyi isan̄a,
ire, enyi kpegwu ikom inu me lek n̄a.”
10 Okumugwem îtumu si ibe ikeyi:
“Emi nria ijo orukan̄ itap enyi me lek
kubọk ntapbe me lek ebi Ijipiti,
mè isa oge akọn̄ ikpan̄ nsabọn irieen̄ kinyi,
mè irọ ibe efum inyinya kinyi me akọn̄.
Nrọ ibe olu nkwukwu ene ijọ inin̄ enyi inwọm
me orieen̄ akọn̄ kinyi,
ire, enyi kpegwu ikom inu me lek n̄a.”
11 Okumugwem îtumu si ibe ikeyi:
“Njijaka usini kinyi,
kubọk emi Awaji njijakabe Sodọm mè Gomora;
enyi ekukup kubọk uti ukan̄ okilomo me lek,
eyi ejọkbe isibi me emen ukan̄.
Ire, enyi kpegwu ikom inu me lek n̄a.
12 “Eya orọ, enyi ebi Ijeren, enyi mêmun̄ inu mbarọ enyi!
Mije inu yi mbarọ enyi,
enyi ebi Ijeren,
ìbem lek enyi mêchichinibe melek Awaji kinyi!”
13 Ìkpọ, ogwu òrorom ebi kè ogoon̄,
mè irom efet,
mè ikichili inu îkaan̄be me ejit kan̄ ijeen̄ ebilene,a
ogwu òkirọ utoon̄ egwe ikana udun,
mè ikijak ukot me inyọn̄ ere ubene ubene me linyọn̄,
Okumugwem Awaji Ogwukaan̄
Inyọn̄ mè Ijọn̄ ore erieen̄ kan̄.