Jona îriaak uriaak
“Ǹkup me emen ujaralek igwen Okumugwem,
ifọfọọk emi otu.
Ǹkup me okputut udọn̄ ama
ekwukwu itaan̄ ukpo iweek ntap-ubọk,
owu onọnọ emi ida.
3 Owu otọp emi ito me emen irem okwaan̄,
me emen ejit ejit owuwa okwaan̄,
idunu oyayak emi igen;
otutuuk asabọn ekoon̄ kwun̄ mè uga ekoon̄ kwun̄
ekikekeme emi ikaan̄ igbugbọ iraka.
4 Mbebe, jei, mîrieen̄ emi isan̄a,
mîrieen̄ emi isan̄a isi ge me isi kwun̄;
ire, mâyaka ikpọk ibene chieen̄
ikpọ Uwu Mbuban kwun̄ ya òkup mbuban.
5 Ejit mun̄ îlet emi efuuk,
ire lek îbomọnọ ugwem n̄a;
irem okwaan̄ îkana emi me agan̄ geelek,
àbakwut okakat ikana emi me ibot.
6 Ǹgegen mege isi ire irak irak ijọn̄,
ere ebi kè ogoon̄ ebenebe itibi isibi,
linyọn̄ ogogon otunchit kan̄
ikwek emi ire mgbọ geelek.
Ire, owu Okumugwem Awaji n̄a,
otataba ugwem n̄a isibi me emen udọn̄ mkpa.
7 Mgbọ mkpa orebe emi chieen̄,
nnenikeek owu, Okumugwem,
mè initaan̄ ukpo igwen owu,
owu okukup me Uwu Mbuban kwun̄ òkup mbuban inọ.
8 Ebi ìkimin mkpọmfaka ikike,
nnwọn Awaji eyi ema mebọkọbe, îlọ ema ubọk.
9 Ire emi, m̀basa ida okwa itọn̄
igwa ngwugwa inyi owu.
Inyan̄a-ibot geelek nnyan̄abe, mârọ iso.
Unyan̄a ìkinan̄a me ubọk Okumugwem gaalek.”
10 Okumugwem oneninyi anam-irin̄ ya ida, igọgọkọ Jona ito me otu ijọn̄.