Jona îsi Ninife
3
Okumugwem okpọkpọk itumu ikọ inyi Jona òso mgbọ iba ibe ikeyi: 2 “Nan̄a keke je si Ninife, ama ile ya, si look etip ya eyi nnyibe owu.”3 Jona onanan̄a ikeke, mè ije isi Ninife igọọk me ida Okumugwem. Ninife ìre ama ile òsisibi isi, ekisa egwe ita ije itibi. 4 Jona onenibene ije ije inin̄ emen ama Ninife, mè ije ije egwe ge, mè ikitaan̄ ukpo itumu ibe, “Ninife ìbochechep! Akọp usen ini gaalek osik!” 5 Ebi Ninife echechieek me lek etip Awaji ya, mè inin̄ ijin-otu, mè itaak ofọnti ufieejit, bene me lek ebi ilile re lek ebi asasa.
6 Etip ya onenire utọn̄ ogwu ubọọn̄ Ninife, inanan̄a ikeke me inyọn̄ ogboon̄ ubọọn̄ kan̄, mè iwọọk ofọnti ubọọn̄ isan̄a me lek, mè imọnọ ofọnti ufieejit itap ichit lek, mè isiki ikweek irek me emen ntọn̄. 7 Ogwu ubọọn̄ ya onenitap ikan ibe, “Me ama Ninife, me ida ogwu ubọọn̄ melek ebi ibot ikwaan̄ kan̄: Bene me lek ebilene re lek ebi kè anam, eriembuuk mè arọọn̄ mè ebot, ene geege ikachak inu geege me otu, ikarie inorie, ikanwọnwọ si mudim. 8 Otutuuk ebilene mè otutuuk anam geelek etap ofọnti ufieejit, mè egbaan̄ etaan̄ ukpo egwen Awaji. Ene geelek itele ijo ugwem kan̄, mè itele si inu afa îkirọ. 9 Ekene oriọọn̄! Awaji môkọt itele uga unaan̄-ejit kan̄, mè ikaan̄ nsan me lek kiji, inyi eji ekakwaan̄ ìta.”
10 Mgbọ Awaji omun̄be inu ebi ama ya erọbe, mè imun̄ ibe ke ema mîgwu ikom itele ijo ugwem kiban̄, inwenwene ejit, mè inito ema nsan. Ìkayaka ìjijaka ama ya ike îtumube ibe ke ọmọ môrọ.