Jona înaan̄ ejit mije ejit nsan Okumugwem
4
Jona ìkakọt ìbọkọ inu ya Awaji orọbe ìtap, inanaan̄ ejit enenen. 2 Irariaak uriaak itumu inyi Okumugwem ibe, “Jei, Okumugwem, ìre ìkafat ìre inu ntumube karake mgbọ nkupbe me ama kiji ya ire eyi owu orọbe? Ọmọ orọ ngwatbe lek ilibi ibasi Tasis. Mije, emi nriọọn̄ ibe ke owu ìre Awaji ogwu ejit njijin, mè ogwu ejit nsan, owu òkakigwat lek ìnaan̄ ejit, òkijeen̄ ogbogbo imumechieen̄ mgbọ geelek, owu okima inwenwene ejit, mè itele isusulu ebi ìrọrọ owu ilọ osusut. 3 Mgbọ keyi, jei Okumugwem, mọnọ ugwem n̄a san̄a. Mije, mônwọn ibe emi ǹkwu, igak emi iluluk ugwem.”4 Okumugwem onenibe ọmọ, “Ìre îtat ni ibe owu ònaan̄ ejit?”
5 Jona osisibi itele ama ya ifo agan̄ mbum-ura ama ya, mè isi igwuun̄ atanga ge inyi lek kan̄, mè inin̄ emen isiki ikweek inan̄a me lek ura, inyi ọmọ ikikpọ-nu inu òborọ ikeme ama ya. 6 Okumugwem Awaji onenirọ inyi olik ge itibi isibi me ere ya, mè ikana ichit Jona, mè ikwek ọmọ ura me ibot, mè igele usini ufialek kan̄. Jona obebele ejit enenen mije olik ya. 7 Ire, me otu ewelegwe ofit iwele kan̄, Awaji oraria ituuk ge, inyi initaka olik ya igwak. Olik ya ochachiaak isan̄a. 8 Mgbọ ura otu ewelegwe obumbe, Awaji oneniria nchat efet agan̄ mbum-ura ibe iwut, unye ura otu ewelegwe onenibum itoon̄ Jona me eden̄ ibot, ikekigak iweek, mè iweek mkpa, mè itumu ibe, “Ire nkwu inan̄a, înwọn igak mbet lek ugwem keyi.”
9 Awaji onenibe Jona, “Ìre îtat ni ibe owu ònaan̄ ejit me lek olik ya?”
Jona ofọfọọk ibe, “Iin̄, unaan̄-ejit n̄a îtat. Îgbe ibe emi ǹnaan̄ ejit ǹkwu.”
10 Okumugwem onenibe ọmọ, “Owu òkisisaak lek mije olik yi. Ìkarere owu owop, owu òkakpọkpọ si chieen̄ me lek, inyi itibi. Ìtibi isibi me eririeen̄ ge, mè ichiaak ita si me eririeen̄ ògọgọọk. 11 Ire ikup ikeya me lek kwun̄, owu fat kpọ-nu otu ifuk ebi ìluk me ama Ninife òmimin ikeyi! Ema mîwa iso efit mè akọp obop iba, belebele ife ebi kperiọọn̄ ulom kiban̄, kperọriọọn̄ si ujit kiban̄, igbaalek ogbogbo anam kperiọọn̄ otu ifuk. Ìre ìkafat ìtat ibe emi ǹkaan̄ nsan me lek ikpele ama yi ni?”