Maika
1
Eyi ìre etip Okumugwem ònunu inyi Maika ogwu Moreset, òfo me lek Sameria mè Jeruselem, me ukot mgbọ Jotam mè Ayaji mè Ejikaya erebe ubọọn̄ me Juda. Okumugwem ìjeen̄ Maika inu chi me ilaak ọkpọchieen̄.Ufieejit òfo me lek Sameria mè Jeruselem
2 Otutuuk kinyi, ebi ife geelek, ìnọ,
linyọn̄ mè inu geelek òkup me emen, ìgban̄,
Ogwukaan̄-ene Okumugwem môkeke ata-ikọ ikeme enyi,
ìbokup me Uwu Mbuban kan̄ itumu ikọ ikeme enyi.
3 Ìkpọ! Okumugwem òkinan̄a me ere îlukbe inu;
isinan̄a isibi inu, mônije me ere òbebene me linyọn̄.
4 Ebi kè ogoon̄ mêtọk ita me irak ukot kan̄
kubọk mgbe otọk ita me lek ukan̄;
ebi kè iteke ijọn̄ mêtọọn̄ ibak
kubọk mun̄ okinan̄a me ere òbebene
ikigbuk igwook me ere òsisiki.
5 Otutuuk inu chi ìborọ mije nrọ-nlọ bọn kè Jekọp,
mè mije ijo inu ebi uwu kè Ijeren.
Ìre ekene otap nrọ-nlọ me lek ebi kè Jekọp?
Ìre ìkare ebi Sameria?
Ìre ere owa ore isi-ijọn̄ ebi Juda?
Ìre ìkare Jeruselem?
6 “Emi mârọ Sameria ikana
okpurukpu ǹrioon̄ me emen oron,
ere ebekiwop uko gerep.
Mâkpukpọt ewuuk uwu kiban̄ igwook me emen iteke,
mè isan̄a ewuuk ọdọ irak ijọn̄ uwu kiban̄ isibi.
7 Otutuuk mkpọmfaka kiban̄ cha,
mêsulu ikpukpuku;
otutuuk mkpukpe cha ema
ebọkọbe me lek barabat kiban̄ cha,
mêwọp itaka iriọk me ukan̄.
Otutuuk mkpọmfaka kiban̄ cha, mâjijaka isan̄a,
mije, îre mkpukpe òje oyet ke esa ikaan̄ ema,
eya orọ, mkpukpe òje oyet si ke ema ebeyaka ikana.”
Ito mè ufieejit môkup
8 Mije keyi, mâto ito mè ifieek ejit;
mâsa ukpọk ukot mè njak ije ikana ere.
Mâtaan̄ ukpo ito ito kubọk ibo oron afa,
mè ifieek ejit kubọk wukuwuku.
9 Mije, kpebekọt igwa unan ebi Sameria ita;
unan ya îre si lek ebi Juda.
Înire si otunchit ebi n̄a,
me Jeruselem me lek kan̄.
10 Ikakpa inu yi me Gat,
ikatoto si ito.
Enyi ebi Bet Leyafera,
ìfufuku lek me ntọn̄.
11 Enyi ebi ìluk me Safiri,
ìsa esip me isi ìje njak njak ìraka.
Ebi ìluk me Sayanan,
kpebenan̄a isibi itap isi.
Ebi Bet Eseli ekup me ito,
ema kpebeyaka ikọt itap ubọk inyi enyi.
12 Ebi ìluk me Marot ekikpọ chieen̄ ibe ema mêkaan̄ ata inu,
ire, mfufiat oyaka ininan̄a me
ubọk Okumugwem inire otunchit Jeruselem.
13 Enyi ebi ìluk me Lakis,
ìbọp ebi kè inyinya ìtele me lek uji akọn̄.
Îre enyi edasi irọ ijo inu me ama Sayọn,
mije, îre enyi ekigọọk ebi
Ijeren irọ nrọ-nlọ ema erọbe.
14 Eya orọ, enyi mêbe ebi Moreset Gat eriọọn̄ ubọk eje,
mè ititiin̄ akpan uwu olom inyi ema.
Ebi ama Akijip mêkana ebi ofiaan̄
inyi ebi ubọọn̄ ebi Ijeren.
15 Enyi ebi ìluk me Maresa,
mâria ogwu òbotim akọn̄ ikpan̄ enyi inu.
Ogwu òrere umin ebi Ijeren mônu me Adulam.
16 Ìkwọkọ ijeek me ibot ìfieek ejit,
mije bọn kinyi ebi mgbọ ìkibele enyi ejit cha;
ìkwọkọ ibot kinyi ìrọt kubọk ibot edene,
mije, mêkpulu ema me akọn̄ isan̄a me lek kinyi.