2
Emi mâkeke-nu me ere ebi mbem ekikup iban egwe ikikpọ,mè imọnọ irek me inyọn̄ mgban;
mâkup ikikpọ inu ìbobe emi ǹtumu,a
mè ufọọk-otu emi mâfọọkbe òfo me lek nana-lek n̄a.
Okumugwem îkpọk ifọọk Abakuk otu
2 Okumugwem onenifọọk emi otu ibe,
“Ge ilaak ọkpọchieen̄ ya omun̄be sun̄,
ge sibi me inyọn̄ akpakpa ewuuk,
inyi, ogwu ifuk, isa ilibi isi ikpa.
3 Mije, ilaak ọkpọchieen̄ ya ìkup ikikpọ mgbọ kan̄;
ìbogwagwat lek irọ iso ire okputut, ìkare ikọ ofiaan̄.
Ire ìkagwat lek ìrọ ìso, ìkup ìkpọ,
mije, ìkpolọlọ irọrọ iso, ìkpofiat mgbọ.
4 “Ìkpọ ogwu ugumulek yi;
ugwem kan̄ ìkatatat.
Ire, ogwu ata irọrọ môluk
ugwem sa me ichechieek kan̄.
5 Me atikọ, miin̄b ìkileke ogwu ugumulek ifiin̄;
ugumulek kan̄ ìkakichieek ọmọ ikup me ere ge isiki efuuk.
Ọmọ ìmin ejit kubọk udọn̄-ufuun̄,
mè ibet lek mkpa, owot ìkakijot.
Mije keya ke îkitim akọn̄ me lek otutuuk ido geelek,
mè ikikpulu otutuuk ebi ife
geelek isa irọ usun̄ inyi lek kan̄.
6 “Ife chi kpebelọlọ igwogwook ọmọ otu me lek, mè isa ọmọ irọk urọk, mè ikichak ọmọ me imọm ibe,
“ ‘Môfieek inyi ogwu òchichichim inu itiik ibene inyi lek kan̄,
ogwu òtititiin̄ inu ebi urieek enyibe ọmọ itet ikaan̄ me nsọọn̄,
isa ibọọn̄ ubọọn̄!
Ìre inu yi ìborọ ikeya isi ire mgbọ owa ni?’
7 Ebi urieek kwun̄ kpebelọlọ inanan̄a
ikeke inin̄ owu lek me uwuuk-lek;
ema mênan̄a ikeke, mè irọ owu òkoran.
Mgbọ ya, ema mêyaka inifum owu inọọn̄.
8 Mije, owu ofum owuwa ido,
ebi ìsisik me lek ebi ido cha mêfum si owu.
Owu ofiat eje ene,
mè irọ inu ikpak me inyọn̄ ijọn̄;
owu ogwak ama igwook,
mè ikpan̄ otutuuk ebi ìluk me emen isan̄a kpai.
9 “Môfieek inyi ogwu òsa ngan itap uwu kan̄ ijot,
mè isun̄ inu kan̄ me ere òbebene,
inyi mfufiat geege ikare lek.
10 Owu otap esip ichit isi ebi uwu kwun̄,
bak me lek okpan̄be owuwa ife;
mè isa me ikeya ifiat ugwem kwun̄.
11 Ewuuk esabe inama agba uwu
môtaan̄ ukpo ifieek owu ikọ;
mgbugban òkup me inyọn̄
uwu môbọkọ otu ibe owu orọ ilọ.
12 “Môfieek inyi ogwu òsa eje ene inama ama,
mè ogwu òsa ijo ubọk irọrọ ichili ama!
13 Me atikọ, Okumugwem Ogwukaan̄ Inyọn̄ mè Ijọn̄ îtumu ifieek,
ibe ke ikwaan̄ ife geelek ìbotataka ikọọk me ukan̄,
ke kwulukwulu ebi ido geelek ìbochechep me ikike.
14 Mije, ebi ìrọriọọn̄ ujamgbugbo
eyi Okumugwem mêjot otutuuk linyọn̄,
kubọk mun̄ ojot okwaan̄.
15 “Môfieek inyi owu ogwu òsa
me unaan̄-ejit inyi ogwu melek kwun̄ miin̄,
mè ikpọkpọ ikitọkọ miin̄ inyi, inyi inwọ isa,
mè owu òmun̄ njak kan̄.
16 Kpan̄asi umin, esip esip obojot owu owot;
mgbọ eyi kwun̄ îre!
Nwọ, mè gbugbe kubọk ogwu kpefieek afi!
Ekpen̄ oyerebet ònan̄a me ubọk
ulom Okumugwem îkana ire owu lek,
esip îkana umin kwun̄ ichit.
17 Inu afa orọbe me lek oron
Lebanọn môyaka ichit owu me ibot;
ikpakpan̄ okpan̄be anam cha môtap owu ukpook me lek.
Owu ofiat eje ene;
owu ojijaka ido, mè igwak ama igwook,
mè ikpan̄ otutuuk ebi ìluk me emen.
18 “Kpasi oruru okup me lek mkpọmfaka?
Ogwu ebilene otọ, mè ikọ;
îre gaalek inu etọtọkọ mè
inu òkijeen̄ ataak ataak ijejeen̄.
Ogwu òrorom ema ìyaka inikisa
inu ọmọ osabe ubọk kan̄ gaalek irom ikitoon̄ ejit;
ọmọ ìrom mkpọmfaka eyi ìkakikọt ìsan̄a amọn.
19 Môfieek inyi ogwu òkitumu inyi uti ibe,
‘Nan̄a keke!’
mè ìre ogwu òkitumu inyi
ewuuk kpunube ugwem me emen ibe,
‘Jibi lek bene!’
Ìre mkpọmfaka cha môkọt inyi ene nteme?
Kpọ, esa alata araran̄ mè alata okuket ichọkọ ichit lek,
efuuk ugwem geege kpunu me emen kiban̄.
20 Ire, Okumugwem òwa me Uwu Mbuban kan̄ okupbe;
otutuuk ebi linyọn̄ eriaan̄ ere me isi kan̄.”