Uriaak Abakuk oriaakbe
3
Eyi ìre uriaak Abakuk ogwu nriran oriaakbe, igọọk me ida okwa ito.a2 Okumugwem, nnọ etip ofolek kwun̄;
jei Okumugwem, ikwaan̄ kwun̄ îtet emi ukpook.
Ikwaan̄ cha orọbe me ukot ikaan̄,
yaka kpọk rọ si me ukot kiji;
inyi eji ebi mgbọ keyi eriọọn̄ ikwaan̄ cha.
Ejit isinaan̄ owu,
soso, keek nsan kwun̄.
3 Awaji mônan̄a me Teman inu;
Ogwu Mbuban ìbonan̄a me Paran inu.b
Òrirọ kan̄ îwele ichit akpabin inyọn̄;
mêkitọn̄ ọmọ me otutuuk ere me linyọn̄.
4 Òrirọ kan̄ ìbet lek ura okibum;
utoon̄ okimumen me ubọk kan̄;
emen utoon̄ ya ke unye kan̄ olet ikup.
5 Ijo orukan̄ okije me isi kan̄,
sà orukan̄ mkpa okigọọk ọmọ me udun̄.
6 Ọmọ isinan̄a ikeke, linyọn̄ îra isisik;
isiriraan̄ chieen̄, ebi ido geelek mîra ikiran.
Ogoon̄ karake akat îkpukpuku igwook,
orioon̄ ukot ikaan̄ îgbugbọ ilaak.
Oniin̄ kan̄ ìre oniin̄ òkukup mgbọ geelek.
7 Ufieejit înin̄ me ere ebi Kusan ekiluk;
ebi Midian mêkiran me ere ema elukbe.
8 Jei Okumugwem, ìre ònanaan̄ ejit inyi okwaan̄ ni?
Sà ìre okolo ke ejit kwun̄ oyok me lek?
Ìre okwaan̄ ile ke uga unaan̄-ejit kwun̄ okeme,
me mgbọ okikọp me inyọn̄ inyinya kwun̄ cha,
me emen uji akọn̄ kwun̄ cha òkisa ntim-mkpan̄ inu?
9 Owu ochili ogbaan̄ kwun̄ ibook,
mè inwunwan̄ oraan̄ kwun̄ me lek olik kiban̄.
Owu osa okwaan̄ itọọn̄ linyọn̄ ibak.
10 Ebi kè ogoon̄ mîmun̄ owu, mè ijijiin̄ lek;
ògbugbuk mun̄ okekijibi iraka;
ejit okwaan̄ okekigbugbut,
mè ikicho ekoon̄ ifo inyọn̄.
11 Ura mè onyan̄ mîyaka ikeke me isinyọn̄
mgbọ oraan̄ kwun̄ okikebe iraka,
mgbọ otunwa kwun̄ okimumen iraka.
12 Owu osa me uga unaan̄-ejit itọp ukot ije ikana linyọn̄,
mè isa me uyok uyok unaan̄-ejit
ijak ido geelek ikpukpuku.
13 Owu osibi inu ininyan̄a ebi kwun̄,
ininyan̄a ogwu owu otọkọbe aran̄ me ibot.
Owu osulu ogwu ibot ama ebi ikpak ya ikpukpuku,
mè inyiaan̄ ọmọ akpa, ibene me ibot isi ire otukot.
14 Otunwa kan̄ gaalek ke owu osa ichim ọmọ ibot itibi,
mgbọ ebi akọn̄ kan̄ enube
kubọk egwijo ibeniyiyala eji,
mè ikinwọọn̄ unwọọn̄ kubọk ema ebenimeen̄
ebi ijo irek me ere ebiba ekilet.
15 Owu osa inyinya kwun̄ ijak okwaan̄ ije iraka,
mè irọ inyi ikpele mun̄ ikifuku ikana ibaan̄ awo.
16 Nnọ inu chi geelek, lek okekiran emi,
ukpọk-otu n̄a okekigbaan̄
ikwak mgbọ nnọbe ida okput ya;
ukwuuk n̄a owọwọ isan̄a kpai,
ukot n̄a okekiran.
Ire, mâkat ejit ikup ikikpọ usen ya,
mgbọ ùrioon̄ obonitoon̄ ebi ido ìkinu eji akọn̄ me lek.
17 Ikerere ibe ke uti figi ìkagwook aya inwan̄ me lek,
ke kpunu mfut geege me lek olik gerep;
ikerere ibe ke uti olifu ìkatoto mfut geege,
ke inorie geege ìkasibi me uko;
ikerere ibe ke uwu arọọn̄ înọọn̄,
ke kpunu eriembuuk geege me ogọ kiban̄,
18 emi m̀banwọnwọọn̄ unwọọn̄ mije Okumugwem,
mè ibele ejit mije Awaji Ogwu Unyan̄a n̄a.
19 Ogwukaan̄-ene Okumugwem ore unye n̄a;
ọmọ onyi emi mfufet ukot
kubọk ukot ogaan̄ sanasana iko;
ọmọ okirọ emi ǹkọt ǹkenje
me inyọn̄ ubene ubene ogoon̄.
Nteme òkup inyi ogwu òjeen̄ okwa:
Mêsa nkwukwak n̄a echi olik ikwak.