Ònu-me-isi ama Jeruselem
3
Môfieek inyi Jeruselem, ama unye-ibot;ama òchaka mbuban, mè ama òtutuku ene!
2 Ìkakigban̄ utọn̄ me ida ene geege,
ìkakibọkọ ikan̄-inu geege ìtap.
Ìkatotoon̄ Okumugwem ejit me lek,
ìkakijeje ìgbet lek Awaji kan̄.
3 Ebi ibot kan̄ ekigbin me emen kan̄ kubọk egbe àtat;
ebi oyerebet kan̄ ebet lek
ibo oron òkisibi iweek urie me otu ikakwun̄,
eyi ìkakitaka ukwuuk ìsik ìban ewelegwe.
4 Ebi nriran kan̄ ekimọnọ lek,
ema ìre ebi ìkileke ene ifiin̄.
Ebi ngwugwa kan̄ mîchichaka
mbuban me lek inu òkup mbuban,
mè ijijaka Ikan Awaji.
5 Okumugwem, ogwu òkirọ ata irọrọ, òwa me emen kan̄,
ìkakirọ inu òlọlọ.
Ewelegwe geelek unen oyerebet kan̄ ìkisisibi utoon̄,
usen geelek, ìkakilọ,
ire, ebi ijo irọrọ kpekaan̄ esip me isi.
6 “Emi njijaka owuwa ido isan̄a,
mè igbugbọ okwukwek akọn̄ kiban̄ igwook.
Nrọ ibe lek oniin̄ kiban̄ inọọn̄,
kpunu ogwu òkije iraka me lek.
Mîgwak ama kiban̄ ilaak ukpọk,
ene geege ìkasik,
kpunu kubọk ene ge ikeyi òboluk me emen.
7 Emi ǹtutumu inyi ama ya ibe,
‘Me atikọ, owu môtet emi ukpook me lek,
mè ibọkọ ikan̄-inu n̄a itap!’
Sa me ikeya, kpebegwak ere nluk ama ya,
otutuuk osusut n̄a, kpunu geege òbore ọmọ lek.
Ire, ulọk kiban̄ ìkpọkpọ
ikimin ikekirọ inu ofiaan̄ ofiaan̄,
me emen inu geelek ema ekirọ.
8 Eya orọ, ìkup ìkikpọ emi!
Emi Okumugwem ntumu.
Ìkup ìkikpọ usen mbanan̄a ikeke inu initoon̄ enyi ikọ.
Ntumu ifieek ibe ke mâtitiin̄ ebi ido geelek,
mè igbaan̄ ebi ama ubọọn̄ geelek isun̄,
mè ida uga unaan̄-ejit n̄a igbuku ichit ema me lek,
uyok uyok unaan̄-ejit n̄a ya.
Mgbọ ya, ukan̄ eyi mba-ejit n̄a
môtaka otutuuk linyọn̄ iriọk.
9 “Emi mânenikpọk irọ ibe otu ebi ene ikup me mbuban,
inyi otutuuk kiban̄ mêkibọn̄ọ erieen̄ Okumugwem,
mè ikigbaan̄ isi ikwaan̄ inyi ọmọ me ejit ge.
10 Ebi ìkitọbọ ebum inyi emi,
ebi n̄a cha ìyiyiyala ikana,
mênan̄a me usaba agan̄ okwaan̄
Etiopia isa ngwugwa inigwa inyi emi.
11 Usen ya, esip ìkpoyaka itet enyi
me lek otutuuk inu cha enyi erọbe emi ilọ.
Mije, mâsan̄a ebi ugumu cha ìkibene lek
isan̄a me etete kinyi.
Enyi kpebeyaka ire ebi ìkibene oguga ofifi
me inyọn̄ ogoon̄ mbuban n̄a.
12 Ire, mâtele ebi ìsisiki lek mè ebi
irek kiban̄ osikibe me etete kinyi;
ema mêkitoon̄ ejit me lek erieen̄ Okumugwem.
13 Ebi ìsisik me lek ebi Ijeren kpeberọ nlilọ inu;
kpebekikan̄ ataak,
kpebekaan̄ ofiaan̄ me otu kiban̄.
Îre ebi ìkup ikeyi ebekirie, mè ikililam me ere ya,
kpunu ene geege òbonitap ema ukpook me lek.”
14 Enyi ebi ama Sayọn, ìtaan̄ ukpo unwọọn̄;
enyi ebi Ijeren, ìtaan̄ ukpo ìkọt okwa!
Enyi ebi Jeruselem, ìbele ejit,
mè ìnwọọn̄ unwọọn̄ me otutuuk ejit kinyi!
15 Okumugwem îben osusut kinyi isan̄a;
îrieen̄ ebi ochicha kinyi igwu ikom.
Okumugwem, ogwu ubọọn̄
ebi Ijeren ọmọ òwa melek kinyi,
enyi kpebeyaka ifieek owot ofifi
ibe unan môsak enyi me lek.
16 Usen ya, ebi ene mêkitumu inyi Jeruselem ibe,
“Owu Sayọn, kafieek owot,
kachieek ibe ubọk kwun̄ igbeen̄.
17 Okumugwem Awaji kwun̄ ọmọ òwa melek kwun̄,
ọmọ ìre ogwu unye òkinyan̄a ene.
Môbele ejit inwọọn̄ unwọọn̄ me ibot kwun̄;
môsa imumechieen̄ kan̄ irọ owu òkup dii,
môtaan̄ ukpo ikọt okwa
inwọọn̄ unwọọn̄ me ibot kwun̄.”
18 “Mâtitiin̄ ebi ìkifieek ejit me
etete kinyi mije mgbọ ijọk ikayakage ìkup,
mije, esip kinyi îkana ukwook inyi enyi.a
19 Mgbọ ya, ebi ìkitutuku enyi cha,
emi m̀basusulu ema osusut;
mânyan̄a ebi akọọk,
mè ititen̄e ebi elilababe isan̄a cha inigwook;
mârọ ebi ene eketọn̄ ema, mè ekenyi ema umin
me ere cha geelek erọbe ema inu esip.
20 Me mgbọ ya, mâkpulu enyi inigwook;
emi mâsa enyi ika inire uwu.
Mgbọ nsisa ebi kinyi ekpulube me akọn̄ igwu ikom ika,
me chieen̄ kinyi gaalek, mânyi enyi erieen̄;
mârọ inyi otutuuk ebi ido geelek me linyọn̄ eketọn̄ enyi.
Emi Okumugwem ntumu.”