2
Ìgbaan̄ lek kinyi ìtitiin̄, iin̄, ìgbaan̄ ìtitiin̄,enyi ebi ido ikariọọn̄ge esip.
2 Ìgbaan̄ ìtitiin̄ sabum oyerebet ya ònobene,
sabum usen ya môniraka
kubọk efet owut mfufe akpa ije;
ìtitiin̄ sabum uga unaan̄-ejit
Okumugwem ònorọn̄ okeme enyi,
sabum usen uyok uyok unaan̄-ejit
Okumugwem ònu onyi enyi.
3 Ìweek Okumugwem, enyi ebi ìsisiki lek me linyọn̄,
ebi ìkirọ inu ọmọ otọbe.
Ìkirọ ata irọrọ, mè ìkisiki lek;
usini mgbọ, Okumugwem môchit enyi
me usen unaan̄-ejit kan̄ ya.
Oyerebet ebi Filisia
4 Ebi Gaja mêyat ita kpai;
mêjijaka Asikelọn igwook.
Me ofọọk-chieen̄ ikarek,
Asidọdu môkana ukpọk ukpọk;
ebechachan Ekurọn ifiin̄.
5 Môfieek inyi enyi ebi Keret,
ebi ìluk me agba awaji;
enyi ebi ìluk me Kenan, me lek ijọn̄ ebi Filisia,
oyerebet Okumugwem îre enyi lek ibe,
“Emi mâjijaka enyi isan̄a kpai,
ene ge ikeyi ìkposik.”
6 Ijọn̄ agba awaji môkana ere anam obokibọm urie,
mè ere ebi òkpukpo arọọn̄
ebekigwugwuun̄ uwu ọfọ ikiluk,
mè ere mêwakbe ogọ itap arọọn̄ mè ebot.
7 Ijọn̄ ya môkup inyi ebi Juda ebi ìsisik;
ere ya ke anam kiban̄ obokibọm urie.
Me ikakwun̄, ema mêkililam
me emen uwu ebi Asikelọn.
Mije, Okumugwem Awaji kiban̄
môkpọ ema chieen̄ me lek,
mè iyaka ebi kiban̄ ekpulube me akọn̄ ika.
Oyerebet ebi Mowabu mè ebi Amọn
8 “Emi nnọ unyechieen̄ ebi Mowabu
mè usem ikpak ebi Amọn,
ebi ìkinye chieen̄ inyi ebi n̄a,
mè ikigugo lek me inyọn̄ ijọn̄ ebi n̄a eyi ema ebọkọbe.
9 Eya orọ, kè lek ugwem n̄a,
Mowabu ìbokup kubọk Sodọm;
ebi Amọn mêbet lek ebi Gomora,
òrere ama ere abọm egbe mè udọn̄ uchi ojotbe,
mè ijọn̄ ejijijaka, ire mgbọ geelek.
Ebi ìsisik me lek ebi n̄a mêfum inu kiban̄,
ebi ìnwọnwọnọ me lek ebi ido n̄a mêkaan̄ ijọn̄ kiban̄ me ìrot.
Îre emi Okumugwem Ogwukaan̄
Inyọn̄ mè Ijọn̄, òrere Awaji ebi Ijeren, ntumu.”
10 Eyi môre mkpukpe ugumulek kiban̄,
mije ochak ema echakbe
ebi eyi Okumugwem Ogwukaan̄ Inyọn̄ mè Ijọn̄,
mè unyechieen̄ kiban̄ ema enyebe inyi ife cha.
11 Okumugwem môtap ema urimi me lek
mgbọ môjijakabe otutuuk
awaji geelek isan̄a me linyọn̄.
Mgbọ ya, ebi ido geelek me
lek achọ usaba okwaan̄ geelek
mêkup me lek ijọn̄ kiban̄ itọbọ ebum inyi ọmọ.
Oyerebet ebi Etiopia
12 “Ebi Etiopia, enyi si,
oge akọn̄ n̄a ìbosọsọp enyi igwook.”
Oyerebet ebi Asiria
13 Okumugwem mônyana ubọk kan̄ ida agan̄ inyọn̄,
mè ikpukpuku ido Asiria iriọọk;
môjijaka Ninife, inyi ikana ukpọk ukpọk,
mè ichiaak kubọk emen èwê.
14 Urum eriembuuk mè arọọn̄ mè ebot,
mè ntiten̄e isi anam agan̄ geelek,
mêkililam me ere ya itap efuuk.
Ebi kè ikwurikwu emen èwê mè ikwurikwu ida ile
mênikililam me inyọn̄ ibot atà uwu kiban̄.
Ida unọn chi môkekitaan̄ itibi nruruk uwu cha.
M̀kpukpuku uwu cha môtọm isotu uwu cha ichit,
uti olik esabe igbaka ebek
uwu cha ìkpoyaka ikaan̄ okwukwek.
15 Ama ya ekinwọọn̄ unwọọn̄ me emen ire eyi,
ama òkekeke inye ya,
eyi òkitik lek kan̄ ibe,
“Emi òwa me ere nkupbe, kpunu ofifi ama, ilọ me lek n̄a.”
Ìjeje ikpukpuku igwook ni,
mè inikana ere ebi kè anam oron ekinililam?
Ebi geelek ìkije iraka me agba lek kan̄,
mîra ikigigam, mè ikinyan ubọk kiban̄.