Jefanaya
1
Eyi ìre etip Okumugwem ònunu inyi Jefanaya gwun̄ kè Kusi, gwun̄ kè Gedaliya, gwun̄ kè Amariya, gwun̄ kè Ejikaya, me ike mgbọ Josaya gwun̄ kè Amọn orebe ogwu ubọọn̄ Juda.Awaji môjijaka nrom
2 “Mâkpaan̄ otutuuk inu isan̄a kpai me lek ijọn̄.
Emi Okumugwem ntumu.
3 Mâkpaan̄ ebilene melek anam isan̄a;
mè ikpaan̄ ebi kè unọn òwulu me inyọn̄,
mè irin̄ òkup me okwaan̄ isan̄a.
Mâgbaan̄ ebi ìkito ukot inyi ene
melek ebi ikpak ichan isan̄a,
mè ikpaan̄ ebilene isan̄a me lek ijọn̄.
Emi Okumugwem ntumu.
Oyerebet ebi Juda
4 “Mânyana ubọk n̄a itoon̄ me lek ebi Juda,
mè itoon̄ si me lek otutuuk ebi ìluk me Jeruselem.
Mâchon Baali mè otutuuk inu
kan̄ geelek ifiin̄ isan̄a me ere keyi,
mè ifieek si erieen̄ ebi ibot
ikwaan̄ kan̄ mè ebi ngwugwa kan̄ cha isan̄a,
5 ema ebi ìkikup me inyọn̄ otoon̄-uwu igele igwook
itọbọ ebum inyi ura mè onyan̄
mè ntoronyan̄ me akpa isinyọn̄,
ebi ìkigele igwook isa Okumugwem inyan̄a ibot,
mè esa si Malikoma ènyan̄a ibot,
6 ebi ìgwugwu ikom, kpeyaka igọọk Okumugwem,
ebi kpeyaka iweweek Okumugwem,
kpekidodo si otu kan̄ me lek inu geege.
7 Ìriaan̄ ere me isi Ogwukaan̄-ene Okumugwem,
mije, usen oyerebet Okumugwem îta me ubọk.
Okumugwem înen̄e ebi kan̄
isun̄ isan̄a kubọk inu ngwugwa,
mè irọ ebi îgwenbe ibe
enekpan̄ ema egwọk lek kiban̄,
mè ebem lek.
8 Me usen ngwugwa Okumugwem ya,
emi, Okumugwem, mâsulu ebi ibot osusut,
mè isulu si bọn ogwu ubọọn̄,
mè ebi geelek ìkisa orọmijọn̄ ebi yọk irọ eyi kiban̄.
9 Me usen ya, ebi ìkiwulu isaba inyọn̄ isotu uwu yọk,
ebi ìtatap inu afa mè ofiaan̄ ijot uwu yọk kiban̄,
emi mâsulu ema otutuuk osusut iso.”
10 Okumugwem ìbe, “Me usen ya,
ukpo môbọn̄ me otunchit Irin̄;b
ito môdimi me agan̄ Aya Ama,
okput môkekitaan̄ unye unye me Inyọn̄ Orioon̄.
11 Enyi ebi ìluk me Emen Iteke,c ìdimi ito;
mêkpan̄ otutuuk ebi mbit kinyi isan̄a,
mè ijijaka ebi ìkisa alata okuket inyam ewe.
12 Me mgbọ ya, emi mâsa mkpukan̄
iwọlọ emen ama Jeruselem,
ikiweek ebi ife cha ìkiluk kubọk
ema kpekaan̄ saasaak,
ebi ìkup kubọk afuk miin̄ ògegen
ibia me edim ogbokot,
ebi ìkitumu me ejit kiban̄ ibe,
‘Okumugwem ìkporọ inu geege,
mè ìre atata mè ìre ijijo.’
Emi mâweek ema imun̄,
mè isulu ema osusut.
13 Inu ubọọn̄ kiban̄ cha, mêfum isan̄a,
uwu kiban̄, mêgbugbọ igwook.
Ema mênama uwu,
ire, kpebeluk emen;
ema mêwop uko gerep,
ire, kpebenwọ miin̄ gerep cha.
Ikpele usen oyerebet Okumugwem
14 “Ikpele usen oyerebet Okumugwem îta me ubọk,
îgbet enenen, mè ikinu ugwat ugwat.
Jei, ida ukpo môtaan̄ me usen oyerebet Okumugwem ya;
ebi ibot akọn̄ mêtaan̄ ukpo ito ito ujat ujat mgbọ ya.
15 Usen ya ìbore usen uyok uyok unaan̄-ejit Awaji,
usen ukwook mè ujaralek,
usen mfufiat mè jakajaka,
usen udun mè ugwuuk,
usen ofifit oduku inyọn̄ mè ekpuk udun.
16 Ìbore si usen otita mè ukpo akọn̄ môtaan̄be
me ibot ama mgban okanabe,
melek ubene ubene uwu-oket cha
òkup me agba mfufọ mgban ya.
17 Mâsa ukwook itet ebilene,
ema mêkitutun iweek agan̄ kubọk ebi ǹnàan̄,
mije, îre Okumugwem ke ema erọ ilọ.
Mêfiin̄ eje kiban̄ kubọk ìre achiaan̄,
mè igbuku nkat kiban̄ ifiin̄ kubọk ìre ifin.
18 Me usen uyok uyok unaan̄-ejit Okumugwem ya,
alata okuket kiban̄ mè alata araran̄ kiban̄ cha
ìkpokọt inyan̄a ema isibi.
Ukan̄ eyi mba-ejit Okumugwem
môtaka otutuuk linyọn̄ ikọọk,
mije, ọmọ môjijaka otutuuk
ebi ìluk me linyọn̄ mgbọ yaage isan̄a kpai,
me oniin̄ òkaan̄ ukpook.”