2 “Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Ife chi ekibe ke mgbọ ebekpọk inama Uwu Mbuban Okumugwem ìkakem-nu.’ ”

3 Okumugwem îtumu si ikọ itibi me otu ogwu nriran Agai ibe: 4 “Ìre îkem mgbọ enyi ebekiluk me emen ujuja uwu eyi kinyi, mè itele ibe uwu n̄a ijijaka isan̄a?”

5 Mgbọ yi, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ìgbala chieen̄ ìkpọ ugwem kinyi. 6 Enyi isiwop owuwa inu me uko kinyi, sọntiik gaalek ke enyi ekirọkọ. Enyi irie inorie, ìkakijot enyi owot. Enyi inwọ miin̄, ìkikup kubọk enyi kpenwọnwọ. Enyi itap ofọnti, ìkakikwek enyi utọọk me lek. Enyi ibọm ikpoko, ìkinin̄ me akpa ǹtibi edim.”

7 Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ìgbala chieen̄ ìkpọ ugwem kinyi.” 8 Okumugwem ìtumu ibe, “Ìnene inyọn̄ orioon̄ ìsi ìkeen̄ uti ìsa ìninama uwu n̄a, inyi ǹkup me emen ǹkembele ejit, mè ǹkenkaan̄ umin. 9 Enyi ekikpọ chieen̄ ikakaan̄ owuwa inu, ire, sọntiik gaalek ke enyi ekikaan̄. Enyi isibọm, mè iben inu me uwu, emi nra iwut iyiyala isan̄a kpai. Keke orọ mè ikup ikeya? Îre mije enyi etelebe ibe uwu n̄a ilaak ikeya jakajakajaka, mè ikigwuun̄ isi ikinama uwu echi kinyi. Emi Okumugwem Ogwukaan̄ Inyọn̄ mè Ijọn̄ ntumu. 10 Eya orọ, mije kinyi, akpabin inyọn̄ îtet ibot ikaan̄, ijọn̄ otetet si mfut kan̄ ikaan̄. 11 Emi ntap una ibot me inyọn̄ ijọn̄, mè inyọn̄ ogoon̄ geelek, mè lek akpa, mè aya miin̄, mè aran̄, mè lek mfut geelek òkitibi me ijọn̄, mè lek ebilene mè anam, mè lek otutuuk ikwaan̄ geelek ebilene esabe ubọk kiban̄ irọ.”

12 Jerubaben gwun̄ kè Sialitien, mè Josuwa gwun̄ kè Jeyosadak ogwu òban Awaji mè otutuuk ebi ene enenigban̄ utọn̄ me lek ida Okumugwem Awaji kiban̄, mè igban̄ si utọn̄ me lek ikọ kè Agai ogwu nriran, kubọk Okumugwem Awaji kiban̄ oriabe ibe inilook ema, mè inikitet ukpook me lek Okumugwem.

13 Agai ogwu etip Okumugwem onenisa etip Okumugwem inilook ebi ene ibe ikeyi: “Emi òwa melek kinyi, îre emi Okumugwem ntumu.” 14 Okumugwem onenitap ikpele ulọk me emen kè Jerubaben gwun̄ kè Sialitien ogwu ibot mkpulu Juda, mè Josuwa gwun̄ kè Jeyosadak ogwu òban Awaji, mè otutuuk ebi ene. Ema enunu inisi ikwaan̄ me lek Uwu Mbuban Okumugwem Ogwukaan̄ Inyọn̄ mè Ijọn̄, òrere Awaji kiban̄, 15 me òso akọp usen iba mè ini, me òso onyan̄ gweregwen, me òso acha iba me lek mkpulu ogwu ubọọn̄ Dariọs.