Nukën 'Ibu an unio 'ixun rabiti bana
148
¡Usa 'ain ka ësokin Dios rabikanti 'ikën!¡Naínu 'ikë Nukën 'Ibu Dios rabinun ka 'akan!
¡Manámi 'ikë Nukën 'Ibu Dios rabinun ka 'akan!
2 ¡Aín ángelkama atúnribi ka kamaxunbi Dios rabiti 'ikën!
¡Aín suntárukama naínu 'ikë atúnribi, ka Dios rabiti 'ikën!
3 ¡Bari 'imainun, 'uxënribi ka rabiti 'ikën!
¡An mananmixubi pëkakë, akamanribi ka rabiti 'ikën!
4 ¡Naíkamë 'ëo manami 'ikë anribi 'amainun ka a manami 'ikë
'umpax a kamanribi, naínuxunbi rabiti 'ikën!
5 Nukën 'Ibu ax ka rabikë 'iti 'ikën,
axa usai ka 'iti 'ikë kikëbëshi ka kamabi ñu ax kikësabi oi uniakëxa;
6 an ka kamabi ñu nëtë xënibua 'aínbia usabi 'inun,
'imianan ax kikësabi oí 'iti banakama aribi uínbia bëtsiokin 'atëkëntima okin 'akëxa.
7 ¡Nukën 'Ibu Dios ka menuxun 'amainun,
parúmpapanu 'ikë ñuinakan 'ëo, 'imainun parúmpapa nëminu 'ikë akamanribi rabiti 'ikën!
8 ¡'Amainun ka kaná mëríkë, matsi bëruñu,
'imainun matsi uxu kuainkë 'ianan kuénkuru akamanribi 'ati 'ikën!
¡'Amainun ka suñúan bënamë kuatsinkë anribi, ax kikësabiokin a rabiti 'ikën!
9 'Amainun ka bashikama 'ianan me matákama 'imainun.
Kamabi kunxankama 'ianan axa tuákë ikama anribi rabiti 'ikën
10 ¡'Imainun ñuina 'arakakë,
ñuina 'arakakëma a kamanribi 'ati 'ikën!
¡'Ianan ka pëchiu ñuinakama 'imainun pukun niríkë a kamanbi rabiti 'ikën!
11 ¡'Amainun ka kamabi menu 'ikë 'apukama 'imainun bëtsi bëtsi ëmanu 'ikë unikama!
¡'Amainunbi ka 'apukama 'imainun aín kushibu akamanribi rabiti 'ikën!
12 ¡'Imainun ka xanukaman,
'amainun uni bënábu xanu chipashbu 'imainun uni kaniakëkë akamanribi rabiti 'ikën!
13 ¡Kamaxunbi ka Nukën 'Ibu Diosan anë rabiti 'ikën,
an ka aín anë ñuikin usakin rabiti kuëënia!
¡Ax ka chaiira 'aish naíkamë 'ëo 'imainun mekama manámi 'ikën!
14 ¡Diosan ka aín unikama kushioia!
¡Usa 'ain ka nux aín uni 'ixun rabimainun aín uni a 'urama 'ikë akamanribi rabiti 'ikën!
¡Usa 'ain kananuna ashi ësokin rabiti 'ain!