Kamabi unin ka Nukën 'Ibu rabiti 'ikë kikë bana
145
Mixmi chaiira Dios 'aish 'apuira 'ikë;kana min anë sinánkin xënibua 'aínbi mi rabiti 'ain.
2 Kamabi nëtën kana upíokin sinánxunkin;
xënibua 'aínbi min anë rabiti 'ain.
3 Nun 'Ibu Dios an ka chaiira 'ixun nukaman rabiti kuëënia;
usa 'ain ka an 'akë ñukamax uisaira kara kixun nun 'unántisamaira 'ikën.
4 Usa 'ikë kananuna aín papa 'ixun nun bakë bëchikëkama min 'a ñukama ñuixunkin,
min kamina kushiira 'ixun kamabi ñu 'akë kixun atúnribi 'unánun ñuixunti 'ain.
5 Usakin ñuixunkëxa ax ka 'apu kushiira 'ikë,
kimainun kana 'ëx min kamina ñu chaiirabu unin iskëma ñukama 'akën kiax kiti 'ain.
6 Kikëbëa unikamax min kushínbi kamina anun rakuë́ti ñukama 'akën a ñui kimainun kana,
'ëx min kamina ñu chaiirabu 'akën kiax kiti 'ain.
7 Usakin ñuixunkëxun ka mixmi nuibanankë ax ka chaiira 'ikë ki,
munuma banakin ax ka upí 'ikë kikin mi rabikanti 'ikën.
8 Nukën 'Ibu Dios an ka nuibanairakë 'ixun,
bënëtishi ami nishkin 'atima okinma uni nuibatia.
9 Nukën 'Ibu Dios ax ka kamabi unibë upí 'ikën,
usa 'ixun ka an unio ñukama upíokin nuibakin bërúaia.
10 ¡Min unio ñukama an ka aín Dios 'ikë mi rabiti 'ikën!
¡'Amainun ka min unikaman asérabi min bana kikësabiokin 'akin upíokin sinánkin mi rabiti 'ikën!
11 ¡'Ianan ka min nëtë upíira a ñuiribi kiti 'ikën!
¡'Imainun ka min kushinbimi 'a akama ñuiribi kiti 'ikën!
12 ¡'Ianan ka unikamanribi min kushinmi ñu 'a a kamaribi 'unánmiti 'ikën.
Usakin 'anan ka mix anu 'ikë ax ka upíira nëtë 'ianan chaiira 'ikë kixun unikama ñuixunti 'ikën!
13 Mix 'apu 'ia ax ka xënibua 'ainbi mix 'apu 'iti 'ikën,
usa 'ain ka kamabi unin rëbúnki ax mix kuëënkësabi oi 'iti 'ikën.
14 'Ën 'Ibu Dios min kamina axa tëmërakë unikama,
'imainun axa atsankëkama aribi kushinun 'imin.
15 Kamabi unin ka
anun 'inánti nëtë 'ikëbëtan min 'inánkëxun piti binuxun kainia.
16 Usa 'ain kamina 'inántisabi tankin
a bitsi kuëënun axa ënë menu tsókë unikama 'inánan nuribi 'inánkin kamabi ñuina aín piti 'inánin.
17 Nukën 'Ibu ax ka uisakin ñu 'akatsi kara kia,
usakinbi kamabi ñu upíokin 'aia.
18 Nukën 'Ibu ax ka an rabikë unikama 'urama 'ianan,
an asérabi këmëkinma rabikë akamanu 'ia.
19 An ka an rabikë unikaman kuëënkësokin 'axuanan;
uínsaran kara 'akinun ñukatia anun ka ñukákëxun kuankin, 'akianan ië́mia.
20 Nukën 'Ibun ka an nuibakë unikama nuibakin bëruaia,
'aínbi ka an ñu 'atima 'akë unikama 'atima okin këñuia.
21 ¡'Ën kana 'ën kuëbitanbi Nukën 'Ibu rabiti 'ain!
¡'Amainun ka kamabi unínribi upíokin sinánxunkin aín anë upíira a rabiti 'ikën,
bërí 'ananbi ka xënibua 'aínbi rabiti 'ikën!