Diosan ka kamabi ñu 'unania kikë bana
139
Nukën 'Ibu min kamina uisa karana,'ëx 'ai kixun upíokin 'unanin;
2 usa 'ixun kamina kamabi 'ën 'akë ñukama 'unanin;
'ianan kamina 'uranxubi uisakin karana 'ën sinanin abi 'unanin.
3 Min kamina kamabi 'ën 'akë ñukama 'unánkin añu 'anan karana añu 'aima kixun,
¡kamabi 'ën 'akë ñukama 'unanin!
4 'Ën usai kiti bana 'unánkë 'aímabi kamina,
mix Dios 'ixun uisa banan karana kiti 'ai abi 'unanin.
5 Min kamina nëbë́tsiorakin 'ë bëararan;
usa 'ixun kamina min 'ë isin.
6 Usa 'ain ka min 'akë ñukama ax 'ën 'unántibëtan sënë́nmaira 'ikën;
¡usa 'ikë kana ax 'ëbëtan sënë́maira 'ikë 'unánkasmain!
7 ¿Uinu karana 'ëx min bëru ñunshin ëbiani kuanti 'ain? ¡Kana uinubi kuantima 'ain!
¿Uinu karana mi ëbiani 'ëx abati kuanti 'ain? ¡Uinubi kana kuantima 'ain!
8 'Ëx naíkamë 'ëo, manámi kuaruxunbi kana anuabi mi 'ën mërati 'ain;
'imainun kana me 'ukëmëuira kuabuxunbi,
anuaribi mi mërati 'ain;
9 'ëx pëchiu 'aish nuankiani kuani ami bari urukë ami kuananbi,
ami bari kuabúkë parúmpapa 'ikë au tsóti kuankëbi kamina,
10 'ë ënkinma isti 'ain;
¡usa 'ixun kamina 'ë 'akinkin bërúanti 'ain!
11 'Ën kana bëánkibukë ami unë́ti sinánti 'ain,
'ianan kana nëtë xabá axa 'ëx ami unë́nun bëánkibunun kixun sinánti 'ain,
12 usa 'aínbi ka bëánkibukë anbi min istisama okin 'ë unëtima 'ikën,
'ianan ka bëánkibukë ax nëtësaira 'inun pë́kikë 'iti 'ikën.
¡Min iskëx ka nëtë xabá usaribi bëánkikë ax 'ikën!
13 Min kamina kamabi 'ën namikama 'akën;
min kamina 'ën titan puku 'ukë mëu uninun 'ë 'imiakën.
14 Usa 'ixun kana unin iskëma ñu 'akinmi 'ë unio 'ixun mi rabin,
'ianan kana min 'akë ñukamaxa upí 'ain mi asábi ka kain.
¡Usa 'ain kana usakin mi 'a 'ikë asérabi ka ax 'ikë kixun 'unanin!
15 Min kamina 'unanima 'ikima 'ëx karana uisai kani a isakën,
unëax 'ikësa 'inun 'ën,
titan puku 'ukëmëúküax 'ëx kanikë ax ka me 'ukëmëúküax 'ëx kanikësa 'iakëxa.
16 Min kamina min bërúnbi uisai karana 'ëx uni 'inux 'irui abi isakën;
usa 'ain ka kamabi ax min kirikanu kuënëokë 'iakëxa.
Min kamina achúshi nëtërabi 'ëx uni tankëx tsókë 'aímabi, uisai karana 'ëx tsóti 'ai kixun abi mëníokë 'iakën.
17 'Ën 'Ibu Dios,
min sinánkë ax ka 'ën sinánkëbëtan sënë́maira 'ikën;
¡usa 'aish ka 'ën ñuitisama tëiratë 'iti 'ikën!
18 'Ën ñuitisatankëxbi ka parúmpapa masi bëru iskë usamaira a ñukama 'iti 'ikën;
usa 'ikë tupunkin ñuikin këñuamaxi 'uxax bësukinbi kana mibëbia 'ikë oti 'ain.
19 'Ën 'Ibu Dios,
an 'atima ñu 'akë unikama a këñunun 'imianan kamina,
an uni 'akë unikama aribi 'ë 'ura 'inun 'imiti 'ain,
20 'imianan kamina axa mi ñui 'atimati banakëkama a 'anan.
Axa min anë ñui 'atimati banakë unikamaribi 'ati 'ain.
21 'Ën 'Ibu,
¿'ëx kara ax mimi nishkë unikama ami nishin,
'ianan karana axa mi ñui 'atimati banakë amiribi nishima 'iti 'ain?
22 ¡'Ën kana atu asérabi istisama tanin!
¡Usa 'ain kana 'ëx a unikamami nishkësa 'ain!
23 Mix Dios
'ixun kamina, 'ën nuitu 'unánkin 'ë tanti 'ain;
'ianan kamina uisakara 'ën sinánkama 'ikë kixun 'unánti 'ain;
24 'unánan kamina 'ën karana 'atima ñu 'ai akamabi,
'unánkin uisai karana 'ëx ñu upí 'ai xënibuti tsóti 'ai kixun 'ë 'unánmiti 'ain.