Sinánñuira 'inuxun a 'unánti bana
3
5 An ñu 'unánkë unix ka ësai kiakëxa: Min nuitunënbi sinani kamina Nukën 'Ibu mi katamëti 'ain,usai 'i kamina rabiakati 'ën kana bëtsi unin 'akësamaira okin ñu 'unan kiax kitima 'ain.
6 Kamabi ñu 'akin kamina Nukën 'Ibu Dios mia 'akinun a pain ñukáti 'ain,
usokinmi 'akëxun ka kamabi upíokin 'anun mi 'amiti 'ikën.
7 Min sinanën kamina 'ëx kana ñu 'unainra 'ai kiax kitima 'ain;
usai 'ikima kamina Diosmishi katamëkin ñu 'atima 'atimi sinánkë a manuti 'ain:
8 ¡usai 'i kamina uni ro xëatankëx
'ikësai min nami kushiti 'ain!
9 Nukën 'Ibu Dios kamina ami 'arakakë min ñukama 'inánti nankë a 'inánan kamina,
min naënu 'apákëxa tsinasati tuákë aribimi bixun 'inántimi nankë a 'inánti 'ain;
10 usokin mi 'akëbë ka anu nanti 'akë anuax min piti ñukama këñutima 'imainun ami xëati nankëkama ax anu nankë anuax këñutima 'ikën.
11 Uni bënákama min kamina, Diosan usai 'iama 'inun kakëxun kuaisama tantima 'ain
'imainun kamina an mi usai kamina 'itima 'ai kixun kakëx a kuëënima nishtima 'ain;
12 an nuibakë uni a ka Diosan usakin kamina ñu upima 'atima 'ai kixun 'unánmia,
achúshi unían aín bakë bëchikë a nuibairakë a ñu 'atima 'axuma 'anun kakësaribi okin ka an 'aia.
13 Chuámarua ka an ñu 'unántibi sinánxun,
upíokin kuakin 'unánkë ax 'iti 'ikën;
14 usa 'ain ka usakian 'akë ax manë kuríki bikësamaira 'iti 'ikën,
an ñu 'unánkë an kuri marukin anun kanánkësamaira 'iti 'ikën.
15 Ñu 'unánkë ax ka maxá upíira iskësamaira 'ianan;
¡bëtsi ñukama unin kuëën irakë usamaira 'iti 'ikën!
16 Usa 'ain ka uni ñu 'unánkë ain mëkeu anun xënibua 'aínbi tsókësa 'ikën,
mëmiuribi mëshpakësa 'i kuëënkë ax 'iti 'ikën.
17 Usai 'ikian an nu 'ësëkë ax ka upíira 'ikën;
an ka ñu 'atima 'aíma upitax tsónun uni 'imia.
18 Uix kara ñu 'unairakë 'ikë ax ka i bimiñu unin upí iskë usaribi 'ixun 'atima ñu 'aisa tankinbi tënëia;
ax ka chuámarua tani usokin ñu 'akëma 'aish tsóti 'ikën.
¡Ax ka chuámarua usakin ñu 'akë 'aish tsotia!