Xanu bëtsi bëtsi unibë 'ikë uni paráni usai kikë bana
7
'Ën kakëxun kamina 'ën banakama kuati 'ain, bëná unikaman, 'ën bakë bëchikësa 'ikë kana mi kain;'ën mi kakë ax kikësaibi 'iti banakama ënë kamina manukinma sinánti 'ain.
2 'Ën bana ax kikësaibi 'iti 'imainun a 'unánti bana mi 'unánmikë akama kamina;
min bëru napu ami 'akësaribi okin upíokin bërúanti 'ain, usakin 'ai kamina upí tsókanti 'ain.
3 'Ianan kamina min mëkënan tuinkësa 'itánun 'akin,
min maxkánubi 'inun upíokin 'unánti 'ain.
4 Min chirabakë xanusaira 'ikë ñu 'unainra 'iti a nuibanan,
kamina min 'unánkë uni 'akësaribi okin sinánñuira 'iti bana aribi manukinma sinánti 'ain.
5 Usakin a banakama 'unánkë 'ixun kamina, an bëtsi ënxun bëtsi uni bikë xanun abë 'inun kakëxbi abë 'ikinma,
bana upitan mi kuëmëninkin kakëxunbi kuëëntima 'ain.
6 Achúshi nëtën kana 'ën xubu xëkuë chukúma anun isti 'akë anun,
uanxun aín xabankënën iskëxbi ka,
7 uni bënákama an usa ka kixun ñu 'unairakëmakama,
anu 'iakëxa, atubë ka achúshi uni bëna an ñu 'atima 'ati kuëëinrakë 'iakëxa usa 'ikë kana a isakën.
8 Iskëx ka anun xubunu kuanti bai kuanx anu këñúkë anun shitákiani,
kuani amia xanu aín xubu 'ikë amibi kikiani kuankëxa.
9 Kuanbi ka xupibuti ñantanbukëbë bë́ankibuakëxa.
10 Usaia 'ikëbëa xanu aín 'ikënuax chikitia uni an iskëxbi ka
bëtsi bëtsi unibë 'ikë xanu 'ikësaibi upiti mëníokakin upí chupa pañuxunbi aín nami bërúankëma 'iakëxa,
11 usa 'aish ka achúshi xanu an bënë́kinshi ñu 'akë 'imainun abi sinánxun uisa ñu kara 'aisatania usakin 'anan,
aín xubunubi tsóti 'unánma 'aish,
12 kuainbëkinishi ëmanu nianan anua uni tanti tsóti 'akë, 'ianan anun uni nikë bai aín sënë́nkë anuxunbi kainxun,
uinu 'ikë uni pain kara mëraia a bixun banakinkë xanu 'iakëxa.
13 Usa 'ain ka xanu an uni bëna a 'ikúkin bikin bëtsuku kakin,
sinanimaishi banakin kakëxa:
14 'Ën dioskama xaroxunkin bikë nami 'ën xubunu 'ikë a 'ëbë kuanxun pi kuanti kaina kuëëntima 'ain,
bërí kana 'ën usokin 'akatsi kikë usokinbi 'axuntankëx asábi 'iti 'ain.
15 Usa 'ain kana mibë mërananux anumi 'ikë anu chikían;
¡'ianan kana mi istisaira tan, usa 'ain kana bërí mi mëran!
16 Anu 'ëx 'uxkë anu kana upíira okin lino
anun rakuti 'akë egipcionua 'ën marukë a 'apabëtsian,
17 'anan kana sanuira 'itánun áloe 'imainun
canela kakë ro a 'imainun aroma kakë mirra 'akë anúnribi 'abëtsian.
18 Usa 'ain kamina 'ëbë anuxunu nun kuëënkësokin;
pëkaratamainun 'ë nami mi 'aminun anu kuanti 'ain, usai 'i kananuna anuax nu rabë́ kuëënti 'ain,
19 'ën bënë ka 'ën xubunuma 'ikën:
an ka 'uraira kuankin 'ëratsushi 'ë ëbianxa;
20 kuankin ka achúshi pisha kuríki buánxa;
usa 'ain ka anun 'uxë turuti nëtë 'itámainun masima utima 'ikën.
21 Usokin bana upitan kakëx,
kuëënkin ka uni bëna kana 'ati 'ai kixun sinánbiani,
22 uni bëna ax xanu a nuibiani abë kuani:
vaca bënë anuxun 'atinu buánkëx kuankësa usaribi kiani kuanxa,
usai 'ika chaxu ami 'iti maban nankëmi 'ikë usairibi 'ia,
23 pian aín xabánu 'akëx 'ikësa usaribiti 'ianan;
ñuina pëchiñu ami 'iti nankë 'aínbi ami,
'i kana bamati 'ai kixun 'unaxmabi ami 'ikësa usaribiti 'iaxa.
24 Usa 'ain kamina uni bëná mix 'ën kakëxun,
'ën bana kuati usaibi 'iti 'ain.
25 Usa 'ain kamina iskin amiokin sinántima 'ain;
'ianan kamina a nuibiani abë kuanti sinántima 'ain,
26 a xanu 'ucha kupí ka 'itsaira uni ñuaxa;
¡usa 'aish ka an ñumikë uni 'itsaira 'ikën!
27 Uinu 'ikë unikamax kara aín xubunu atsínia,
ax ka aín ñuti baria anu kuankë 'ikën.