Usai ñu 'unan 'aish upí 'iti bana
8
Ñu 'unankë 'iti axa munuma banai kikësai 'imainun ka;sinánñuira 'iti axribi 'ain bana kuanun munuma banai kushin kikësa 'iti 'ikën.
2 Ax ka 'ain bashi tësapanu nirakëkësa 'ianan,
anun 'inúkë baikamanu nirakëkësa,
3 'ianan ka anun atsínti xëkuë chakama 'urama nirakëax,
anun ëmanu atsínti xëkuënuax kikësa 'ikën:
4 'Ëx kikë banakama ënëx ka
mitsun kuati kikë bana 'ikën.
5 Bëná unikama ñu 'unairatisamakama,
¡mitsun kamina 'ashi buinxun upíokin ñu 'ati 'unánti 'ain!
6 'Ën mitsun uisa ñux kara upí 'ikë kanan,
uisa ñu 'aia kara bëtsin añux ka 'atima 'ikë mi katima bana kamainun kamina kuati 'ain.
7 'Ën mitsu kati bana ax ka asérabi 'ëx kikë 'ikën,
'ëx kana këmëi banati kuëëniman.
8 Kamabi bana 'ëx kikë ax ka asérabi upí 'ikën;
a bananu ka këmëi banakësa bana 'aíma 'ikën.
9 Uin kara 'ën bana kuatia,
an ka 'ën banakama ax ka asérabima 'ikë kixun mitsu katima 'ikën.
10 Usa 'ain ka ñuñu 'isatanan kuríkiñu 'ianan kuriñu 'isatankin sinánkë a 'imainun
'ën 'unánmikë banakama 'ashi 'unánkanti 'ikën.
11 Ñu 'unáinrakë 'iti ax ka maxá upíira pënë́kë abëbi sënë́nmaira 'ianan;
¡kuëëinrakin bikë ñukama axi abë sënë́nma 'ikën!
12 'Ëx kana ñu 'unáinrakë a 'ain,
usa 'aish kana sinaínrakë abëbi 'in,
usa 'ixun kana upíokin bana ñuixunkë a mërati 'unan.
13 Uin kara Diosan kakësokin 'aia an ka ñu
'atimakama a timati 'ikën.
'Ëx kana rabiakakë 'imainun, bëtsi unibëtan sënë́nma kana 'ai kikë uni ami 'ianan,
'atima ñu 'akë 'imainun këmëi banakë uni amiribi nishin.
14 Ënu ka anun ësëananti a 'imainun anun ñu upíshi 'akin pëuti ax 'ikën,
'ianan kana 'ëx anun ñu 'unainra 'iti a 'ianan, kana kushiñu 'iti aribi 'ain.
15 'Ë kupínka 'apukama 'apu 'ia,
usa 'ain ka aín kushikaman usai uni 'iti bana nania.
16 'Ën kana 'apukama aín kushibu,
'imainun anun sipuanuxun kati bana kikësabiokin 'apukama anun 'amin.
17 'Ën kana uikaman kara 'ë nuibatia a kamaribi nuibatin,
'imainun ka uikaman kara 'ë baria a kamanribi 'ë mëraia.
18 'Ën kana nuibakin ñuñuira 'imikin,
'aisamaira ñuñu 'ia bëráma 'iásamaira 'inun 'imin.
19 'Ën 'inánkë ax ka kuri charokëxa upíira 'ikë iskësamaira 'ikën;
'imainun ka 'ën 'inántisa tankë ax manë uxua upisamaira 'ikën.
20 'Ën kana ñu upí 'ati sinani bai puntëtan nikësa 'ixun,
upí ñushi 'ati sinanin.
21 Usa 'ixun kana an 'ë nuibakë akamaribi ainan 'iti ñu 'inánti 'ain;
usokin 'akëx ka aín xubukamanu 'itsaira ñu upíñu 'iti 'ikën.
22 Nukën 'Ibu Diosan ka kamabi ñu uniokin 'ë irapain uniokëxa,
usakin 'ë pain 'atankëxun ka kamabi ñuribi uniokin taëokëxa.
23 Usakin ka me uniokëmapan 'ixun 'ë irapain.
Uniokë 'iakëxa.
24 'Ë irapain ka parúmpapakamabëa,
xëxákama 'imainun baka rarakama 'isama pain 'ain uniokëxa.
25 Bashikama 'imainun matá mekama 'aisama pain 'ixun ka Diosan 'ëira pain 'ati sinánkë 'iakëxa;
26 usa 'aínbi ka me unionan anua kóti ñukamaribi 'anan,
uisa me chamarabi uniokëmapan 'iakëxa.
27 Uínsaran kara naíkamë 'ëo kuman batsisa a;
parúmpapa chaiira manámia 'inun uni oia anu kana 'ëxribi anu 'iakën.
28 Uínsaran kara naíkamë 'ëonu anubia 'itinu nëtë kuin 'imianan,
parúmpapa nëminra anubia 'itinu 'imianan,
29 anubia rakanun parúmpapa baka kanan,
meribi anuaxa shaíkitinuma 'imia,
30 anu kana 'ëxribi a ënima abëbi 'iakën.
Anu kana an ñu uniokë unisa 'aish nëtë́tibi 'ëx kuëënmi anu 'iakën,
usai 'ikana an ismainunbi kamabi nëtë abë kuaiakën;
31 usa 'ain kana Diosan me uniokë 'ain anuax kuëëni,
¡chuámaruatankin unikamabë kana 'ëx 'ai kixun sinani kuëëankën!
32 Usa 'ain kamina bërí mitsux uni bënábu 'ixun 'ën kakëxun kuati 'ain;
kuati kamina 'ëx 'ikësaribiti 'i chuámarua 'ikanti 'ain.
33 'Ën 'ësëkin kakëxun kuanan kamina;
sinánñuira 'iti bana 'ën mitsu ñuixunkë ënëribi kuaisamatankin timatima 'ain.
34 Chuámarua ka uin kara 'ën kakëxun 'ën bana kuatia ax 'iti 'ikën,
'ianan ka kamabi nëtë́an an bërúankë unisa 'ixun 'ën xubu xëkuë kamanuxun,
bana kuati ukë a ka Diosan 'akinti 'ikën.
35 Uin kara 'ën kakëxun kuatia an ka uisai
'ira kara upiti tsóti 'ikë kixun 'unánti 'ikën,
usai 'ia ka Diosan kuëënkin 'akinti 'ikën;
36 usa 'aínbi ka uix kara 'ën kakëxun kuaisama tani 'uchaia a unix ka uisa ñu kara 'iti 'ikë kixun 'unánimabi tsóti 'ikën;
¡uikaman kara 'ën kakëxun 'ën bana kuaisamatania an ka aín bamati baria!