Salomónnëxa ñu 'unáinrakë 'aish kia ñuikë bana
13
Uinu 'ikë unin bakë bëchikënën kara ñu 'unánkë isa tania an ka aín papan 'ësëkëxun aín bana kuatia;usa 'aínbi ka uin kara 'ësëkëxunbi bana kuaisama tania ax uisakinbi kaisama 'inun nishia.
2 Uix kara 'upiokin ñu 'akatsi kia an ka ax kikësabiokin 'axun ñu bitsia,
usa 'aínbi ka 'atima sinánñu unikamax upíokin sinánkin ñu 'aíma, 'aisama ñunu pakëti 'ikën.
3 Uix kara sinaínrax banaia an ka aín tsóti bërúaia;
usai 'imainun ka axa sinanima 'atimati banakë uni ax aín banakënënbi 'atimorakatia.
4 Uin kara chikishan tapun 'ixunbi ñu bisatania an ka añu ñubi bitsima;
usa 'aínbi ka uix kara ñu mëëkë uni 'ikë an kuni an bisatankë ñu bitsia.
5 Uni upí sinánñu an ka këmëi banakë a kuëënima;
uni ñu 'atima 'akë ax ka ñu 'atima 'aibi anunbi rabinti 'unánma 'ikën.
6 Uni upí sinánñukama ax ka an ñu upí 'akë anunbi upitax nitsia;
'aínbi ka an ñu 'atima 'akë anunbi uni 'uchañunëx tëmëraia.
7 Anu ka bëtsi bëtsi uni ñuñuma 'aishi ñuñu 'isatankë 'ikën,
'imainun ka bëtsi bëtsi uni ñuñuira 'aishi ñuñuma unisa 'ikën.
8 Ñuñuira uni a ka bëtsi unin aín ñu kupí ñatankë 'iti 'ikën, 'aínbi ka ñuñuira 'ixun aín kuríkinën kupíox chikiti 'ikën;
usa 'aínbi ka ñuñuma unikama atun uínsaranbi a 'akatsi uni kikë bana kuatima.
9 Upí sinánñu unikama ax ka tirítan pëkakësa 'aish kuëënti 'ikën;
'aínbi ka 'atima sinanñu unikama ax tirí bënákënu 'ikësa usaribi atun tsóti 'ikën.
10 Axa rabiakakë uni an ka bëtsi unibë mëëanantishi kuëënia;
usa 'aínbi ka sinan mëninñushi uni an 'ësëkin kakëxun bana kuatia.
11 'Itsaira ñu mëëi tëmërakinma bikë ñu ax ka basikëma 'aínshi këñutia;
usa 'aínbi ka unin ñu mëëxun bikë ax kuni munu bixun bixun nankë ax 'aisamaira 'inun chanun 'imia.
12 A 'ati sinánxun 'akë ñu ax 'ikëbëma ka uni masánuitutia,
'aínbi ka usakin 'ati sinánxun 'akë ñu ax 'ikëbë kuni uni kuëënia.
13 Uin kara kakëxunbi bana kuakinbi ñu 'aisama tania ax ka usakin 'axuma anuma kana 'ia kiax masánuituti insa tani kiti 'ikën;
usa 'aínbi ka an kakëxun bana kuakë ax kuni 'upitax tsóti kuëënti 'ikën.
14 An ñu 'unánkë unikaman 'unánmikë banakama ax ka anun tsóti 'ikën,
usa 'ixun ka bamatinu 'ikëbi nu ië́miti 'ikën.
15 Uix kara 'upiokin 'ësëkin bana uni ñuixunkë 'ikë a ka kamabi unin aín bana kuatia,
'aínbi ka an 'atimakin uni bana ñuixunkë uni ax ka aín bana unin kuaisamatankëbë tëmëraia.
16 Uni upí sinánñu an ka 'upiokin sinánkin ñu 'aia,
'aínbi ka 'atimakin ñu 'akë uni a usakin ka a unin ñu 'aia kixun unikaman 'unania.
17 An bana ñuitia bëtsi unin xukë uni an 'atima banaishi uni ñuixunkë an ka 'atima bana ñuixunkin uni 'aisama sinánmia,
'aínbi ka an bana upí ñuitia bëtsi unin xukë uni an kuni asérabi bana ñuia.
18 Uin kara kakëxunbi bana kuaisamatania a ka ñuñuma 'ia uínbi kuëënima;
'aínbi ka uin kara kakëxun bana kuatia a kuni unikaman kuëënti 'ikën.
19 Nun 'aisatankë ñu a 'atankëx kananuna upí tani kuëënin.
'Aínbi ka an kakëxunbi bana kuaisama tankë unikama an sinanakin ñu 'atima 'akë a ënti kuëënima.
20 Uin kara ñu 'unánkë uni kamabë nitsia an ka atun 'akësaribi okin ñu upí 'unania;
'aínbi ka uix kara ñu 'unántisama tankë unikamabë nitsia an ñu 'unanima.