Usaia uni upí sinani tsóti bana
15
Nishkë 'ikëbia bëtsin sinanamikin kakë, an ka uni nishkëbi upí 'inun sinanamia;'aínbi ka 'atimati banakin unin bëtsi atiaira nishnun 'imia.
2 Ax sinánñu unikaman ka bana ñuikin an 'unánkë ñukama bëtsi ñuixunia;
'aínbi ka an ñu unántisa 'ikëbi 'unánkëma atux 'atimakin sinánishi banaia.
3 Nukën 'Ibu Diosan ka uinu kara 'ikëbi,
uni an upíokin sinánkë akama 'imainun an 'atima ñu 'akë akamanbi isia.
4 Uix kara mënin sinánñu 'aish kuëmënini banaia ax ka achúshi i bimiñu unin upíokin iskësa usaribi 'ikën;
'aínbi ka uix kara 'atima sinánñu 'aish 'atimati banaia an bëtsi uni masá nuitunun 'imia.
5 An ñu 'unántisa 'ikëbi unántisama tankë an ka aín papan 'ësëkin kakëxunbi bana kuatima;
'aínbi ka uix kara sinánñu 'ikë an kuni 'ësëkëxun bana kuatia.
6 Upí sinánñu uni aín xubunu ka añu ñubi 'aimama 'ima aín piti 'itsaira 'ia,
'aínbi ka 'atima sinánñu uni ax aín kanankë anun ñuñu 'ima.
7 Sinánñu unikama an ka bëtsi unikama an 'unánkë ñukama ñuixunia;
'aínbi ka an 'unántisa 'ikëbi ñu 'unánkëma unikama an ñu 'unánma 'ixun bëtsi unikama 'unánmima.
8 Nukën 'Ibu Diosan ka uni 'atima sinánñukaman ñu 'axunkëxunbi a upí isima,
'aínbi ka uni upí sinánñukama an ñukákëxun kuni kuatia.
9 Nukën 'Ibu Diosan ka uni 'atima sinánñukama atux 'atimati tsókë a kuëënima;
'aínbi ka axa aín bana kikësoibi 'ikë unikama a kuni nuibatia.