Dios aín bana kuaisamatankë unikama tëmëramiti kikë bana
65
Ësai ka Nukën 'Ibu kiaxa:An añu ñubi 'ë ñukáma unikama ax ka 'ënu uakëxa;
an 'ëmi sinánkin 'ë bariama unikama anbi
ka 'ëmi sinánkin 'ë mërakëxa.
Achúshi ëmanu bukukë unikama an 'ë kuëënkëma akana kakën: Ënu kana aín.
2 Kamabi nëtën kana 'ën mëkënan mëshpakin
'ënu unun kixun kana bana kuakëma 'ikëbi atu kuëanken,
mitsux kamina min kuëënkësa okin ñu 'atima 'ai tsókën,
usakin 'ai kamina mitsun sinánkësa 'oíshi tsókën.
3 A unikamax ka 'ën kuamainunbi nëtëtibi 'ëmi 'atimati abi banakin 'ë 'atima tamia;
atun dioskama anua ñu 'apákë naënuxun ñuina xaroxuankëxa 'anan ka
anuxun ñuina xaroti ladrillo 'akë anuxun
sanuira ro aribi mënuakëxa.
4 An mënukë atux ka anu uni ñukë maínkë kini rapasu tsókëxa;
usai 'ikin ka anu kamabi imë́ unëax 'ikin; anuxun kuchi nami piakëxa,
pianan ka ain këntikama ñu pitima aín baka akama anu buchuokin 'aruakëxa.
5 A unikamax ka ësai kiakëxa, nu 'urama oíma kamina 'uri bërúti 'ain;
numi 'urama onuma kananuna upíira upí 'ain; usa 'ain kamina nu ramëtima 'ain.
Usa 'ain ka a unikamax tikakëxa tsi nëtë́timaira bari buini ërë́kë usaribi 'ikën;
usa 'ixun ka tsin kuinan rëtunkakëx ubikë usai 'inun 'ë 'imia.
Naí ió 'imainun me ió 'iti ñuikë bana
17 “Ësai ka Dios kiakëxa:
Ka kuat, 'ën kana naíkamë 'ëo ió 'anan me ióribi 'atëkënti 'ain.
Usa 'ain ka ax pain 'ia naíkamë 'ëo
xëni a 'imainun me xëni a uínbi sinántëkëntima 'ikën.
18 Kamina upiti xënibua 'aínbi,
kuëënti 'ain amiribishi kana ñukama unioti 'ain,
Jerusalén ió anuax kuëënti 'anuxun 'ain,
anuax ka anu tsókë unikamax kuëënti 'ikën.
19 'Ëxbi kana Jerusalén kupí kuëënti 'ain,
'ianan kana 'ën unikamami sinani kuëënti 'ain.
Usa 'ain ka a ëmanu 'ikë uni masá nuituti
kuënkëni inia kuatëkënti 'aíma 'inuxun 'aia.
20 'Anu ka tuá bërí bakënkë nëtë 'itsama 'aínshi bamakë a 'aíma 'iti 'ikën,
'ianan ka uni apankama axribia anúan ñuti nëtë 'ikë 'aímabia ñukë a 'aíma 'iti 'ikën.
Uix kara cien baritia 'ain ñuia ax ka bëná 'aísha 'ikë 'iti 'ikën,
usa 'aínbi ka axa cien baritia tsóamabi bamakë ax usai 'i ñukë ax ka Dios kuëënkë 'ikë 'iti 'ikën.
21 Anua 'ikë unikama ka atun xubu 'atankëx anu tsókanti 'ikën,
'ianan ka uvas 'apáxun bimia a kuti 'ikën.
22 Usa 'ain ka bëtsi unin anua bëtsi uni 'iti xubu 'ati 'aíma 'iti 'ikën,
uni itsin ka bëtsi unin piti ñu 'apátima 'ikën,
usa 'ain ka 'ën unikama achúshi i 'ikësai 'itsaira baritia tsókanti 'ikën.
'Ën kaískë unikamax ka ñu mëi tëëkin ain mëkënan ñu 'apáxun pi kuëëni tsókanti 'ikën.
23 Usa 'ain ka 'ën unikaman ñu mëëkë ax
ñankabi 'akëma 'iti 'ikën, 'ianan ka atun bëchikëkamax anun bamati nëtë 'ikëma 'aínbi bamatima 'ikën,
atux ka 'ën kaískë unikaman rëbúnki 'ikën.
Atux ka Nukën 'Ibu 'upiokin sinánxuan unikama aín bëchikëkama 'ikën,
usa 'aish ka aín rëbúnkikama atúxribi usaribi 'iti 'ikën.
24 'Imainun kana atun 'ë ñukákin sënë́onkë,
'aímabi 'akinti 'ain;
atúxa 'ëbë banai sënë́nkë 'aímabi kana 'ën 'unánkë 'iti 'ain,
'ën kana atun bana kuakë 'inuxun 'ain.
25 'Ianan ka shórapánanën carnerobë timë́xun,
pimainun paru 'inúanën vaca bënën 'akësaribi okin pasto piti 'ikën,
'imainun ka rununribi me putu piti 'ikën.
Usa 'ain ka an kamabi 'ën bashikamanu 'ikë,
unikama 'atima oti uinu 'ikë unibi 'aíma 'iti 'ikën.”
Usai ka Nun 'Ibu kiaxa.