64
Nukën Ibu Dios nux kananuna kuëënti 'ain, mixmi naíkamë 'ëo panárabëkë anun ukëbë aín bashikama shaíkitanun uti kuëënin,2 'ianan ka tsi rëkirukin i muxañukama xarokin këñukësaribi 'ianan,
anun ñu 'arukëxun 'umpaxan kubinmikë usaribi 'iti 'ikën.
Usa 'ain ka axa mimi nishkë unikaman mix kamina kushi 'ai kixun unántsianxa,
'imainun ka kamabi menu 'ikë unikamaribi mimi rakuë́ti bërëtsianxa.
3 Uisaran kaina min ñu 'atimaira ka inuti 'ikë kixun nun sinánkë 'aínmabi anun
mix ubúkëbë aín bashikama shaíkiakëxa.
4 Uinsaranbi ka uinu 'ikë unínbi,
anu ka misaribi bëtsi dios 'ikë kixun ñuia unin kuananbi 'isama 'ikën,
usa 'ain ka bëtsi dios an min 'akësokin an ñu 'akin, axa ami katamëkë unikama 'akinkin 'akë 'aíma 'iakëxa.
5 Min kamina uin kara upíokin ñu 'aia a asábi ka kuëënkin kain,
kakëxun ka min kuëënkësabi okin 'ati sinania.
Mix kamina nukamax 'uchakë anun nishan;
usa 'ain ka 'itsa baritia anun mi masá nuitumikin ñuikë 'ikën.
6 Kamabi nux kananuna uni achúshi upíma chuakë usaribi 'ain;
kamabi nun 'akë ñu upíkama ax ka chupa chua usaribi 'ikën;
'imainun kananuna nukamax pëi chushitankëx rëukubukë usaribi 'ain,
'ianan ka nun uni rëtëkë ax ka nun ñu 'atimaira 'akin, a tanti bana kikësokin 'akinma uni 'akë ax suñun kuainkin pëi pukë usaribi 'inun nu 'imia.
7 Uinu 'ikë unibi ka an mi 'akinun kixun ñukákë 'aíma 'ikën,
'ianan ka an mimi kushikin 'akinun kixun barikë 'aíma 'ikën;
usa 'ain kamina nukamami kasuakëkin nu ëan,
nun ñu 'atima 'ai 'uchakë kupín kamina nu rakan.
8 Usa 'aínbi kamina mix Nun 'Ibu 'aish nun papa 'ain;
nukamax kananuna me uniokë 'ain, usa 'ain kamina mix an me bëtsi bëtsi ñu tankin 'akë usaribi 'ain;
¡usa 'ain kananuna kamabi nukamax minbi me unío 'ain!
9 Nukën 'Ibu 'aisamairai kamina nishtima 'ain,
'ianan kamina nun 'atima ñuira 'akin a tanti bana kikësokin 'akinma uni 'akëkama a sinántima 'ain.
¡Kamina isti 'ain, nux kananuna min unikama 'ain!
10 Min ëmakama upíbu ax ka anu uni 'ikëma mesa bërí 'ikën,
'imainun ka Jerusalén axribi rurupakin masókankëxa.
11 Anuxun mi rabiti xubu upíira,
'axuan nun chaitiokëkaman mi rabia,
aka masókin tsin mënuakëxa.
¡A nun 'itsaira kuëënkan ñukama axribi ka masókan 'ikën!
12 'Imainun kaina ësai ñu 'ikëbëtanbi mix Nun 'Ibu 'ixun, ¿añu ñubi 'atima 'ain?
¿Usa 'ain karamina mix uisaibi banaima
'ianan mix ñuumarasa nunan 'iti aín?