Diosan anun atu 'ati nëtë 'ikëbëtan axa ami nishkë unikama tëmëramiti ñuikë bana
63
¿Ui kara axa Bosrá kakë ëma chaiira Edom kakë menua 'ikë anuax ai,aín chupa chëxëira tsákatsaka okë upíira a pañuax ain kushibëshi ukë ax 'ik?
'Ëx kana kana kanan kixun 'upiokin ñu 'akë a 'ianan,
kushiira 'ixun an uni ië́miti a 'ain.
2 —¿Uisa kupí kara min chupa chëxëira 'aish,
uvas taën amákin aín baka bikë anun tsakokësa 'ik?
3 'Ën kana uvas 'ëbi taën amákën,
uínbi ka 'ë 'akianma 'ikën;
usakin kana axa 'ëmi nishkë unikama atumi 'itsaira nishkin tëmërakin 'atimaira okën,
usakin 'akin chakakësa 'itánun amira nishkin 'akën,
usakin 'akëxun ka 'ain imin 'ën chupa tsaka tsaka 'itánun anskakëxa,
usakin 'akin ka 'ën chupa kamabi tsakokëxa.
4 'Ën kana bëráma sinánkë 'iakën, achúshi nëtën kana 'ëmi nishkë unikama tëmërakin 'ati 'ai kixun;
usa 'ain kana a nëtë 'ikëbëtan 'ën unikama bitëkënkin ië́miti 'ain.
5 Usa 'ain ka 'ën iskëx an 'ë 'akinti 'aíma 'iakëxa;
usa 'ain kana an 'ë 'akinti 'aíma 'ain sinánkasmakësa 'iakën.
Usai 'i nishkin kana 'ën kushínbi
'akin kamabi ñukama kanánkën.
6 'Ëx atumi 'itsaira nishkin kana kamabi ëmanu 'ikë unikama, 'atima okin këñukin,
aín imi menu 'apamikin 'akanun 'amiakën.
Diosan ka 'ain uni Israelkama nuibakin 'akinti 'ikën
7 'Ën kana ñuitisa tanin uisakin kara Nukën 'Ibun nu nuibatia kixun,
'ianan kana a rabi kantatisa tanin,
kamabi ñu an nukama 'axunkë a kupín,
an ka Israel 'aintsikama 'itsaira nu nuibakin,
ax nuibanankëira 'ixun usakin 'axa usa 'ain,
axëshi nuibanankë a 'ikën.
8 Ax ka ësai kiakëxa: “Atux ka 'ën unibu 'ikën,
usa 'ixun ka atun 'ën kuëënkësokin 'akin 'ë parántima 'ikën.”
An ka atu ië́miakëxa,
9 kamabi atun tëmërakë anuabi.
Usa 'ixun ka bëtsi uni an ië́minun xukinma,
Nukën 'Ibunbi ka ië́miakëxa.
An ka bitëkëánkëxa nuibanairakë 'ixun;
aín pëñanën birukësa 'inun 'akiankëxa.
Usakin ka bërámabi 'a 'ixun 'akiankëxa.
10 'Aínbi ka Nukën 'Ibun kakëxun atun kuaisamatankëxa
'ianan ka 'atimakin ñuikëx masá sinánkëxa;
usakin 'akëxun ka axbi atumi nishkin
atu 'akëxa.
11 Usakian 'akëxun ka bërámaira ñu 'ia kama a sinanan
Moisésnën aín unikama ië́mia a sinánkëxa,
sinani ka atúxbi ñukákanani kikankëxa:
“¿Uinu kara Dios Nilo kakë bakanu nankëbi an
Moisés ië́mia 'ixuan, an ñuina bërúankë uni 'akësokian aín unikama bërúanun 'amia ax 'it?
¿Uinu kara an Moisés aín bëru ñunshin upí 'inan ax 'it?
12 ¿Uinu kara aín kushin Moisés 'akian ax 'ik?
¿Uinu kara aín unikaman ismainun parúmpapa
panarabënun uinsaranbi nëtë́tima okin 'imia ax 'it?
13 ¿Uinu kara parúmpapa panárabëti me ëskikë anun inuti raíshkima,
caballokama anu uni 'ikëma me kuankë usaribi kiani kuanun 'imianan,
14 vaca me sapanën kuankësa kiani kuanun 'imia ax 'ik?”
Nukën 'Ibun bëru ñunshinanbi ka usaía kuania buánkëxa.
Usakin aín unikama buánkëxa
usa 'ain ka kamabi unikaman ax ka kushi 'ikë kixun 'unania.
Isaíasnëan Israel unikama 'akinun kixun Dios ñu ka bana
15 Nun 'Ibu min kamina naíkamë 'ëonuxunbi nu 'isti 'ain,
upíira anuxunbi kamina min isti 'ain.
¿Uinu kara mix nuibanankë chaiira 'imainun min kushi ax 'it?
¿Uinu kara nu sinánkinmi nukama nuibakë ax 'it?
¿Minmi nukama nuiba a kaina numi manukin ëan?
16 ¡Mix kamina nukaman papa 'ain!
Abrahamnëa nukama 'unanima 'imainuan
Israel unikama numi sinánkëbëmabi kamina,
Nun 'Ibu 'ianan nukaman papa 'ain;
usa 'ixun kamina ënënsaran nëtëma 'a 'ixunma min 'akësabi okin nu bitëkënin.
17 ¿Uisa 'ixun kaina mix Nun 'Ibu 'ixunbi mix kikësokin 'ati ëni,
min kakësokin 'aíma nun nuitu iruarakin min kakësabiokin 'aisamatanun nu 'imin?
Min unikama 'anan min kaisa aín ñakánu 'ikëkama nuibakë 'ixun,
kamina mixmi nishkë a sinanati 'ain.
18 ¡Usa 'ain ka 'itsama barishi ka min unikama upíira anua 'ikë atun menu tsóakëxa!
Axa numi nishkë unikaman ka anuxun mi rabiti xubu rurupakëxa.
19 Usa 'ain kananuna nux uínsaranbi min 'akinkëmasa 'ianan,
uínsaranbi min unibu 'ikëmasa 'iakën.