Israel unikama ka 'ië́ti 'ikë kixun ñui bana
61
Nukën 'Ibun kushi ax ka 'ëbë 'ikën,Usa 'ain ka Nukën 'Ibun 'ë kaístankëxun ñuñuma unikama aín bana ñuixunun 'ë xuaxa,
'imainun ka axa bëtsin 'atimokëx masá nuitukë,
a upíokin kanan axa ñatanbianxun tëmëramikë unikama a chikínun 'ë xuaxa,
'imainun ñatanxun sipunu nankë akamaxribi basiramashi ka chikiti 'ikën, kakin kuëëminun 'ë xuaxa;
2 'ianan ka anúan Nukën 'Ibun nu nuibati nëtë aribi ñuianan,
a nëtë 'ikëbëtan ax nun Dios 'ixun axa numi nishkë unikama 'atimoti aribi ñuinun.
'Imainun ka 'ë xuaxa axa masá nuitukë akamaribi upí sinánmikin kanan;
3 axa bëtsi menuax uax Jerusalénnu tsókë unikamax ka
chimaputan mataka kima mañuti, mañuax kuëënun mitsu 'imiti 'ain,
'imianan kana 'iníntisa ro sanuira anúnmi 'inun 'inankësa okin masá nuituti inkë a ënia kuëënun 'imiti 'ain,
'ianan kana masánuituti nitë́xëkinma 'ë rabi kantanun 'imiti 'ain.
Usa 'ikë ka i upí kanan, an kanankë kakin mitsu unikaman anëti 'ikën,
usa 'ixun ka Nukën 'Ibun anbi 'apá 'ixun aín kushi mitsu ismiti 'ikën.
4 Jerusalénnu 'ikë unikama mitsun kamina bërámaira rurupakan ëma xëni a birutëkënkin 'atëkënti 'ain,
'anan ka anu 'ikë xubu chaiirabu axa mitsumi nishkë unikaman rurupa akamaribi 'ati 'ikën,
'anan ka ami nishkë unikaman rurupa ëmakama aribi birukin mëníotëkënti 'ikën.
5 Bëtsi menu 'ikë unikaman ka utankëxun,
mitsun 'arakakë oveja 'imainun cabrakama, bërúanan mitsun naë bërúanan uvas anu 'apákë naëkamaribi mitsu bërúanxunti 'ikën.
6 Anan ka mitsu kati 'ikën, Nukën 'Ibun sacerdote ka atux 'ikë kixun kanan,
nukaman Diosan unikama ka atux 'ikë kixunribi mitsu kati 'ikën.
Mitsun kamina bëtsi menu tsókë unikaman piti nëish tankin pi bukukanti 'ain,
'ianan kamina atun 'akë ñu upíirabu 'aish ichu ichukikë akamaribi tëñuanan mëñuti 'ain.
7 Axa 'ën unimi nishkë unikaman ka 'itsaira 'ichananbi
bëtsi bëtsi okin ñuikëxa katë́nun tëmëramiakëxa,
usa 'ixun ka aín menuxun atúnbi 'itsaira ñu chaiirabu biti 'ikën,
bitsi ka xënibua 'aínbi kuëënti 'ikën.
8 Usa 'ain ka Nukën 'Ibun upí ñuishi 'ati kuëënia,
'ianan ka mëkamanan an usai 'iti bana nankë a tankinma 'atima ñuira 'akin bëtsin uni 'akë a kuëënima.
Usa 'ixun ka ax kikësabiokin ënkinma 'akinkin an biti ñu upí 'inánti 'ikën,
'ianan ka ax kiásabiokin achúshi ñu këñutima okin atubëtan 'ati 'ikën.
9 Usa 'ain ka aín rëbúnkikamax bëtsi bëtsi menu 'ikë unikaman upíokin 'unánkë 'iti 'ikën;
usokin 'unánkë ka an iskë unikaman,
atux ka Nukën 'Ibunbia aín uni 'ikë upíokin sinánxukin 'akinkë 'ikë kixun 'unánkanti 'ikën.
10 ¡Uisai karana 'ëx Nukën 'Ibumi chuámarua tani kuëënti 'ain!
Diosan ka kuëëira kuëënun 'ë 'imiaxa,
usa 'ixun ka,
¡kamabi ñu kanankin 'anun 'ë 'amiaxa!
Usa 'ain kana an xanu biti unían mëníokakin mañuti mañukësa 'ianan,
achúshi xanun birakanuxun mëníokin ain ñu 'upíikama pañukë usaribi 'ain.
11 Me tukabëtsianx chikiti koia naë chukúmanu 'apákëx ñu 'ikësa,
usaribi okin ka Nukën 'Ibun an 'akë ñukama ismikin 'ën,
kamabi menu 'ikë unikaman kantakin a rabinun 'imiti 'ikën.